މީހަކު ރަހީނު ކުރި މައްސަލައެއްގެ ތުހުމަތުގައި ބިދޭސީއެއް ބަންދަށް 15 ދުވަސް
ހައްޔަރުކޮށްފައިވަނީ ބަންގްލަދޭޝް މީހެއް ކަމަށްވާ 37 އަހަރުގެ މުހައްމަދު އާރިފް ހޮސައިން
ފުލުހުން ކުރިއަށް ގެންދިޔަ ޚާއްސަ އޮޕަރޭޝަނެއްގެ ތެރެއިން
މީހަކު ރަހީނު ކުރި މައްސަލައެއްގެ ތުހުމަތުގައި ގާނޫނާ ހިލާފަށް އުޅޭ ބިދޭސީއެއް ހައްޔަރުކޮށްފިއެވެ.
މި މައްސަލާގެ ތުހުމަތުގައި ހައްޔަރުކޮށްފައިވަނީ ބަންގްލަދޭޝް މީހެއް ކަމަށްވާ 37 އަހަރުގެ މުހައްމަދު އާރިފް ހޮސައިން އެވެ.
އެމީހާގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން އެމީހާގެ ބަންދަށް ވަނީ 15 ދުވަސް ޖަހާފައެވެ.
ކޯޓުގެ އަމުރުގައި ބުނެފައިވަނީ އިތުރު ބަޔަކާ އެކު އޭނާ ބައިވެރިވެ އަނިޔާވެރި އަމަލުތަކެއް ކަމަށް ބެލެވޭ ކަންތައްތަކެއް ހިންގާފައިވާ ކަމަށް ބެލެވޭ ކަމަށާއި، އެފަދަ އަމަލުތަކެއް ހިންގާ މަންޒަރު ފެންނަ ވީޑިއޯ ފުޓޭޖެއް ހެކީގެ ގޮތުގައި ފުލުހުން ކޯޓަށް ހުށަހަޅާފައިވާ ކަމަށެވެ. އަދި އޭނާ އަކީ ރާއްޖޭގައި ގާނޫނާ ހިލާފަށް އުޅޭ މީހެއް ކަމަށް ވާތީ ފިލައިގެން ދިއުމުގެ އިހުތިމާލު އޮތް ކަމަށެވެ.
މިމައްސަލަ ފުލުހުން އިތުރަށް ތަހުގީގު ކުރަމުންދާއިރު، 29 އޯގަސްޓް 2023 ވީ އަންގާރަ ދުވަހު ވެސް ވަނީ މާލޭގެ ގެއެއްގައި މީހަކު ރަހީނުކުރި މައްސަލައެއްގައި ދިވެއްސެއް ހައްޔަރުކޮށްފައެވެ. މީގެ އިތުރުން 8 އޮކްޓޫބަރު 2023 ވީ އާދިއްތަ ދުވަހު މާލޭގެ ގެއެއްގެ ތެރޭގައި ރަހީނުކޮށްފައި ހުރި ބިދޭސީއަކު އަމިއްލައަށް ސަލާމަތްވެގެން އާއްމުންގެ އެހީތެރިކަމަށް އެދިފައިވެއެވެ.
