ރަނގަޅު މުދައްރިސުން ލިބުމުގެ ދަތިކަމަކީ ހުރިހާ ޤައުމަކަށް ދިމާވެފައިވާ ބޮޑު ގޮންޖެހުމެއް ކަމަށާއި ރަނގަޅު ނަތީޖާ ހޯދާ ދަރިވަރުން މުދައްރިސުންނަށް ވާން ބޭނުން ނުވާ ކަމަށް އެޑިއުކޭޝަން މިނިސްޓަރު ޑރ. އާއިޝަތު އަލީ ވިދާޅުވެއްޖެއެވެ.
އެކަމަނާ އެފަދައިން ވިދާޅުވީ މުދައްރިސުންގެ ދުވަހުގެ މުނާސަބަތުގައި ދެއްވި ހިތޯބުގައެވެ.
ޔުނެސްކޯ އިން މި އަހަރުގެ މުދައްރިސުންގެ ދުވަހުގެ ޝިއާރުގެ ގޮތުގައި ކަނޑައަޅާފައި ވަނީ "ދަ ޓީޗަރސް ވީ ނީޑް ފޯދަ އެޑިއުކޭޝަން ވީ ވޯންޓް - ދަ ގްލޯބަލް އިންޕެރެޓިވް ޓު ރިވަރސް ދަ ޓީޗަރ ޝޯޓޭޖް" އެވެ. މާނައަކީ "އެދޭ ތައުލީމް ދިނުމަށް ބޭނުންވާ މުދައްރިސުން ލިބުމުގެ ދަތިކަން ހައްލުކުރުން - އާލަމީ ޒަރޫރަތެއް" މިއެވެ.
އެ ޝިއާރާ މެދު ވާހަކަފުޅު ދައްކަވަމުން މިނިސްޓަރު ވިދާޅުވީ އެ ޝިއާރުގެ މާނައަކީ ދަރިންނަށް ދޭން ބޭނުންވާ ތައުލީމާއި ތަރުބިއްޔަތު ދަރިވަރުންގެ ކިބައިގައި އަށަގެންނެވުމަށް ކޮންމެހެން މުދައްރިސުން ބޭނުންވުން ކަމަށެވެ. ގައުމުތަކަށް ދިމާވެފައިވާ މުދައްރިސުންގެ ދަތިކަން ބަދަލުކޮށްލުމަކީ ހުރިހާ ޤައުމަކުން ހަރަކާތްތެރިވާން ޖެހޭ މަޖުބޫރީ ހާލަތެއްގައި އޮތް ކަމެއް ކަމަށް ވެސް އެކަމަނާ ވަނީ ވިދާޅުވެފައެވެ. އެ ޝިއާރުން ތަރައްޤީވެފައިވާ ގައުމުތަކަށާއި، ތަރައްޤީވަމުން އަންނަ ޤައުމުތަކަށް ވެސް އެ މައްސަލަ ކުރިމަތިވެފައިވާކަން އަންގާދޭ ކަމަށް މިނިސްޓަރު ވަނީ ވިދާޅުވެފައެވެ.
އެ ހިތާބުގައި އިތުރަށް މިނިސްޓަރު ވިދާޅުވީ ޔުނެސްކޯ އިން ފާހަގަކުރާ ގޮތުގައި މި މައްސަލަ އަކީ ރާއްޖެ ހިމެނޭހެން ގިނަ ޤައުމުތަކަށް ދިމާވެފައިވާ މައްސަލަ އެއް ކަަމަށެވެ. ޔުނެސްކޯ އާއި ހަވާލާދެއްވާ މިނިސްޓަރު ވިދާޅުވީ ޤައުމުތަކަށް ދިމާވެފައިވަނީ މައިގަނޑު ދެ މައްސަލަ އެއް ކަމަށެވެ. އޭގެ ތެރޭގައި ފެންވަރު ރަނގަޅު ދަރިވަރުން މުދައްރިސުކަން ޚިޔާރު ނުކުރުން ހިމެނޭ ކަމަށެވެ. މުދައްރިސުން މަސައްކަތް ކުރަން ޖެހޭ މާހައުލުގެ ސަބަބުން އެ ދާއިރާ އަށް އޮތް ޒަމާންވީ ޝައުގުވެރިކަން ނެތެމުންދާ ކަމަށް މިނިސްޓަރު ވިދާޅުވިއެވެ.
އެކަމަނާ ވިދާޅުވީ ޔުނެސްކޯ އިން ފިރިހެނުން މުދައްރިސުންގެ ގޮތުގައި މަސައްކަތް ކުރާ ނިސްބަތް މަދުކަމަށް ފާހަގަކުރާ ކަމަށެވެ. ރާއްޖޭގެ ތަފާސްހިސަބުތަކަށް ބަލާއިރު 75 އިންސައްތަ މުވައްޒަފުންނަކީ އަންހެން މުދައްރިސުން ކަމަށާއި ކޮންމެ ހަތަރު މުދައްރިސުންގެ ތެރެއިން ތިން މީހުންނަކީ އަންހެނުން ކަމަށް މިނިސްޓަރު ވިދާޅުވިއެވެ. އަދި ރާއްޖޭގައި މަސައްކަތް ކުރާ މުދައްރިސުންގެ 22 އިންސައްތަ ހިއްސާކުރަނީ ބިދޭސީން ކަމަށް ވެސް އެކަމަނާ ވިދާޅުވިއެވެ. އެ ހިސާބުތަކަށް ބަލާލުމުން ތައުލީމީ ދާއިރާ ކުރިއަރުވަން އޮތް ފުޅާ ފުރުސަތުތައް ފެންނަ ކަމަށް އެ ކަމަނާ ވިދާޅުވިއެވެ.
މުދައްރިސުން ލިބުމުގައި ހުރި ދަތިކަން ހައްލުކުރަން ޔުނެސްކޯ އިން ވަނީ ބައެއްކަންކަން ހުށަހަޅާފައެވެ. އޭގެ ތެރޭގައި
1. ފަށައިގަންނަ މުދައްރިސުންނަށް ދޭ ތައުލީމާށް ދޭ ސަމާލުކަން އިތުރުކުރުން
2. ކޯސްތަކުގެ ފީގެ އިތުރަށް ކިޔަވާ މުއްދަތުގައި މުދައްރިސުންނަށް އެލަވަންސެއް ދިނުން
3. މުދައްރިސުންގެ އުޖޫރަ އާއި އިނާޔަތްތައް މުދައްރިސަކަށް ވާން ކިޔަވާ މުއްދަތާއި ގަޑިއާއި އަޅާ ބަލާއިރު އެހެން ދާއިރާތަކާއި އެއްފަދަ އެއްޗަކަށް ހެދުން
4. މުދައްރިސުން ކިޔަވާދިނުމަށް ހުސްވާގޮތަށް އިދާރީ މަސައްކަތްތައް މަދުކުރުން
5. މަސައްކަތު ވަގުތު އެދެވޭ މިންވަރަށް ހިފެހެއްޓުން
6. މަދަރުސާތައް ހިންގާ މީހުން މަސައްކަތަށް ވާގިވެރިކަން ދިނުން
އެކަންކަމަށް އިސްކަން ދީފި ނަމަ ތައުލީމީ ދާއިރާ އަށް ދިމާވެފައިވާ އެންމެ ބޮޑު ގޮންޖެހުމަށް ހައްލެއް ލިބިގެންދާނެ ކަމަށް އެކަމަނާ ވަނީ ވިދާޅުވެފައެވެ. 21 ވަނަ ގަރުނުގެ އުފެއްދުންތެރި ވިސްނުމާއި ކުރިމަތިލާއިރު އިއްޔެ އުނގަންނައިދިން ގޮތަށް އުނގަންނައިދީގެން ފަރުޖައްސާލެވެން ނެތް ކަމަށް ވެސް އެކަމަނާ ވިދާޅުވިއެވެ. ކުރިއަރާފައިވާ ޤައުމުތަކުގެ ތައުލީމީ ނިޒާމްގައި ފަހިކޮށްދޭ ފަދަ ފަހި ފުރުސަތުތަކަކާއެކު، ތައުލީމީ މަންހަޖުގައި ބުނާ ފަދަ ދިރިއުޅުމަށް ތައްޔާރުވެފައިވާ ކުދިން ތަމްރީންކުރަން ޖެހޭ ކަމަށް އެކަމަނާ ވިދާޅުވިއެވެ. އެކަން ކުރުމަށް ފަންނީ ހުނަރުތަކާއި ޒަމާނީ ޓެކްނޮލޮޖީ އަށް ދަރިވަރުންގެ ލޯތައް ހުޅުވާލުން މުހިންމުކަމަށް މިނިސްޓަރު ވަނީ ވިދާޅުވެފައެވެ.
ދަރިވަރުންގެ ކުރިއެރުމަކީ އެންމެ ބޮޑު ސަމާލުކަމެއް ދެމުންދާ މަސައްކަތް ކަމަށް އެކަމަނާ ވިދާޅުވިއެވެ. ސްޓެމް ޕްރޮގްރަމާއި ލޭމްޕް ޕްރޮގްރާމްގެ ބޭނުމަކީ ވެސް އެއީ ކަމަށް އެކަމަނާ ވިދާޅުވިއެވެ. ބޭނުންވަނީ ހަގީގީ މާނައި ލިޔަންކިޔަން ދަންނަ ދިރިއުޅުމަށް ތައްޔާރުވެފައިވާ ދަރިވަރުންތަކެއް ބިނާކުރުން ކަމަށް އެކަމަނާ ވިދާޅުވިއެވެ.
މުދައްރިސުންގެ މުސާރައަށް މި ސަރުކާރުން ވަނީ ބޮޑު ކުރިއެރުމެއް ގެނެސްދެއްވާފައެވެ. ނިސްބަތުން ހުރިހާ މުދައްރިސުންގެ މުސާރަ 60 އިންސައްތަ އަށް ވުރެ މަތިކޮށްދީފައިވާ ކަމަށް އެޑިއުކޭޝަން މިނިސްޓްރީން ބުނެއެވެ.
