ހުވަފެނީ މަންޒިލަށް ދެވޭނީ ދަތުރަށް ފަށައިގެންނެވެ. ބާ ބައިސްކަލުގަނޑެއްގައި ނަމަވެސް ދަތުރަށް ފަށާށެވެ!

އެންމެ ފެންވަރު ރަނގަޅު ޔުނިވަރސިޓީތަކުގެ ތެރޭގައި ގުނާލެވޭ ޔުނިވަރސިޓީއަކުން، އިސްލާމީ ތަވްޙީދުގެ ރޮނގުން މަތީ ތަޢުލީމު ފުރިހަމަ ކުރުމަކީ، މަމަދޫ ޞަފަޔޫ ބާރީ ކަނޑައެޅި ޢަޒުމެކެވެ. ނަމަވެސް އުފަން ފަސްގަނޑު ކަމަށް ވާ ގިނީއިން، އޭނާގެ މަންޒިލް ކަމަށް ވާ މިޞްރަށް ދާން ޓިކެޓެއް ގަންނާނެ ފަދަ މާލީ ތަނަވަސްކަމެއް އޭނާ އަތަކު ނެތެވެ. އެވަރުންވެސް އުންމީދު ކަނޑައެއް ނުލައެވެ. މަމަދޫގެ އަތުގައި އޮތް އާދައިގެ ނޯޓުފޮތެއްގައި، އެފްރިކާގެ ޗާޓު ކުރަހާލިއެވެ. އަދި މީހަކު ބޭނުން ކުރުމަށްފަހު ދޫކޮށްލާފައި ހުރި ބާ ބައިސްކަލެއްގައި މިޞްރަށް ފުރިއެވެ. ދަތުރަށް ބަރުކުރިހާވެސް އެއްޗަކީ، ބަދަލުކޮށްލާނެ ހެދުމަކާއި، ޓޯޗެއްގެ އިތުރުން އިސްކުރު އަނބުރާ ކަށިގަނޑެކެވެ.

ދަތުރަށް ފުރިތާ 4 މަސްދުވަސް ފަހެވެ. 7 ޤައުމު ހުރަސްކޮށް، ޢުމުރުން 25 އަހަރު މަމަދޫ މިއަދު ހުރީ މިޞްރުގެ ވެރިރަށް ޤާޚިރާގައެވެ. އަލް-އަޒްހަރު ޔުނިވަރސިޓީއިން މަތީ ތަޢުލީމު ފުރިހަމަ ކުރުމަށް، ހުރިހާ ޚަރަދެއް ހަމަޖައްސައިދޭ ސްކޮލަރޝިޕްއަކާއެކުވެސް އެކުގައެވެ. އަލް-އަޒްހަރު ޔުނިވަރސިޓީއަކީ މުޅި ދުނިޔޭގެ ނިސްބަތުން ބަލާއިރުވެސް އެންމެ ޒަމާންވީ ޔުނިވަރސިޓީތަކުގެ ތެރޭގައި ގުނާލެވޭ، ޤަދަރު ހުރި ޔުނިވަރސިޓީއެކެވެ. އަދި ސުންނީ އިސްލާމީ ތަރުބިއްޔަތު ފެތުރުމުގައި އެފަދަ ދެވަނައެއް ނެތް ޢިލްމީ ދަންމަރެކެވެ.

މަމަދޫ ފަދައިން، ހުޅަނގު އެފްރިކާ ސަރަޙައްދަށް ނިސްބަތްވާ އެތައް ހާސް މީހުންނެއް ކޮންމެ އަހަރަކުވެސް ސަހަރާ ހުރަސް ކުރުމަށްޓަކައި ނުރައްކާތެރި ދަތުރުތަކެއް ކުރެއެވެ. ދިރިއުޅުމުގެ ޙާލަތު ރަނގަޅު ކުރުމުގެ ޢަޒުމުގައެވެ. އިޤްތިޞާދީ ގޮތުން ތަނަވަސް ފުރުޞަތެއްގެ އުންމީދުގައެވެ.

ނަމަވެސް، ގިނަ މީހުންނަކަށް މަންޒިލާ ހިސާބަށް ދެވޭ ގޮތެއް ނުވެއެވެ. މިދިޔަ އަހަރު އެކަނިވެސް އެ ރާސްތާއިން ދަތުރު ކުރަމުން ދިޔަ 500 މީހަކު ވަނީ މަރުވެފައެވެ. ނުވަތަ ވީނުވީ އެއް ނޭނގި ގެއްލިފައެވެ. މިއީ ހިޖުރަވެރިންނާ ބެހޭ ބައިނަލްއަޤުވާމީ އިދާރާ (އައޯއެމް)ގެ ތަފާސް ހިސާބުތަކުން ފެންނަ މަންޒަރެވެ.

ނުރައްކާ ކިތަންމެ ބޮޑުވި ކަމުގައި ވީ ނަމަވެސް، އެ ކަމާ ކުރިމަތި ލުމަށް މަމަދޫ ނިންމީ، ލިބެން އޮތް އިނާމުގެ އަގު ބޮޑު ކަމުންނެވެ.

ބާ ބައިސްކަލުގަނޑެއްގައި މިޞްރަށް ކުރި ދިގު ދަތުރުގައި ކޮންމެ ދުވަހަކުވެސް ގާތްގަނޑަކަށް 100 ކިލޯމީޓަރުގެ ރާސްތާއެއް، މަމަދޫ ކަޑަތު ކުރެއެވެ. މަމަދޫގެ ދަތުރުގައި ކަޑަތު ކުރި ބައެއް މަންޒިލްތަކުގެ ތެރޭގައި މާލީ، ބުރުކީނާ ފާސޯ، ޓޯގޯ ބެނީން، ނައިޖަރ އަދި ޗާޑް ފަދަ ޤައުމުތައް ހިމެނެއެވެ. އެ ޤައުމުތަކަކީ، އާންމު ގޮތެއްގައިވެސް މީހުން ގޮސް އުޅެން މާ ރައްކާތެރި އަދި މާ ފަސޭހަ ޤައުމުތަކެއްވެސް ނޫނެވެ.

މިޞްރަށް ކުރި އުންމީދީ ދަތުރުގައި މަމަދޫ ވަނީ 3 ފަހަރެއްގެ މަތިން ހައްޔަރުވެސް ކޮށްފައެވެ. ބުރުކީނާ ފާސޯގައި 2 ފަހަރު ހައްޔަރު ކުރިއިރު، ދެން އޭނާ ހައްޔަރު ކޮށްފައި ވަނީ ޓޯގޯގައެވެ. ޓޯގޯގެ ސަލާމަތީ ބާރުތަކުން ވަނީ 9 ދުވަސް ވަންދެން މަމަދޫ ހައްޔަރުކޮށްގެން ގެންގުޅެފައެވެ. އަދި ދަޢުވާ ކުރުމަކާ ނުލާ އޭނާ ދޫކޮށްލީ، ކަފާލާތުގެ ގޮތުގައި ގާތްގަނޑަކަށް 56.35 އެމެރިކާ ޑޮލަރުގެ ފީއެއް ދައްކައިގެންނެވެ. އެ ފައިސާއަކީ ދަތުރުގެ ބާކީ އޮތް ބަޔަށް ޚަރަދު ކުރުމަށް މަމަދޫ އަތުގައި ހުރިއްޔާ ހުރި، ހުރިހާ ފައިސާއެކެވެ.

މަމަދޫގެ ނަޞީބު ބަދަލުވާން ފެށީ ޗާޑް އާ ހިސާބުންނެވެ. އެއީ ޗާޑްގައި އެކި ގޮތް ގޮތުން މީސްމީހުންނަށް އެހީވުމުގެ މަސައްކަތުގައި އުޅުނު މީހަކާ ބައްދަލުވި ހިސާބުންނެވެ. އެމީހަކީ މަމަދޫ ކުރަމުން ދިޔަ ޢަޒުމުން ފުރިގެންވި ދަތުރުގެ ވާހަކަތައް، އޮންލައިންކޮށް ކިޔަމުން ދިޔަ މީހެކެވެ. އެ މީހަކު ވަނީ، ހަނގުރާމަ ދިގުލާ ގޮސްފައި ވާ ސޫދާންއަށް ދާން ނުޖެހޭ ގޮތަށް، ޗާޑްއިން ސީދާ މިޞްރަށް، ވައިގެ މަގުން ދަތުރު ކުރެވޭނެ އިންތިޒާމް، މަމަދޫއަށް ހަމަޖައްސާދީފައެވެ.

މަމަދޫއަށް މިޞްރަށް ދެވުނީ ސެޕްޓެމްބަރ 5 ވަނަ ދުވަހުއެވެ. އޭގެ ދުވަސްކޮޅެއް ފަހުން، އަލް-އަޒްހަރު ޔުނިވަރސިޓީގެ ފުލް-ސްކޮލަރޝިޕް ކަށަވަރު ކުރިއެވެ. މަމަދޫ ހުރީ، ތަޢުލީމު ފުރިހަމަކޮށް ނިންމާލުމަށްފަހު އޭނާގެ އުފަން ވަޒަނަށް ދިއުމުގެ ނިޔަތުގައެވެ. އެއީ މިއަދު އޭނާ އެ ހުރި ހިސާބަށް ގެނެސް ދިން ގިނީގައި އިސްލާމީ ހިދާޔަތު ފެތުރުމުގެ މަޤްޞަދުގައެވެ. 

2022 ވަނަ އަހަރުގެ ތަފާސް ހިސާބުތަކަށް ބަލާއިރު، ގިނީގެ އާބާދީގެ 89 ޕަސެންޓް މީހުންނަކީ މުސްލިމުންނެވެ. މުސްލިމުންގެ އާބަދީގައި ގިނައީ ސުންނީ މަޒްހަބުގެ މީހުންނެވެ.