ކުޅުދުއްފުށީ މަގުތަކުގައި ތާރުއެޅުމުގެ ދެވަނަ ފިޔަވަހީގެ މަސައްކަތް ފަށައިފި
27 ސެޕްޓެމްބަރު 2023 | ބުދަ 10:13މަގުތަކުގައި ތާރު އަޅަން ފަށާފައިވަނީ ޑީވޯޓަރިންގ ސިސްޓަމާއި، ފަޔަރ ހައިޑްރަންޓް ސިސްޓަމް ގާއިމުކުރުމަށްފަހު
ކުޅުދުއްފުށީ މަގުތަކުގައި ތާރު އެޅުމުގެ ދެވަނަ ފިޔަވަހި ފެށުން
ކުޅުދުއްފުށި ސިޓީގެ މަގުތައް ރަނގަޅު ފެންވަރަކަށް ތަރައްގީކުރުމުގެ މަޝްރޫއުގެ ދަށުން، މަގުތަކުގައި ތާރު އެޅުމުގެ ދެވަނަ ފިޔަވަހީގެ މަސައްކަތް މިއަދު ފަށައިފިއެވެ.
މިއަދު މަގުތަކުގައި ތާރު އަޅަން ފަށާފައިވަނީ ޑީވޯޓަރިންގ ސިސްޓަމާއި، ފަޔަރ ހައިޑްރަންޓް ސިސްޓަމް ގާއިމުކުރުމަށްފަހުއެވެ. މިއީ މާލޭ ސަރަހައްދު ފިޔަވައި އެހެން ރަށެއްގައި ޑީވޯޓަރިންގ ސިސްޓަމް ގާއިމުކުރި ފުރަތަމަ ރަށެވެ.
ދެވަނަ ފިޔަވަހީގެ ދަށުން މިއަދު ތާރު އަޅަން ފެށީ ދޮންއުމަރުކަލޭފާނުގެ މަގުގެ އިރުމަތީކޮޅުގައެވެ. ތާރު އެޅުމުގެ މަސައްކަތް ކުރަނީ ޗައިނާގެ ކުންފުންޏަކުންނެވެ. އާރުޑީސީއާ ހަވާލުކޮށްގެން ކުރިއަށްގެންދާ މި މަސައްކަތުގައި، މަގުތަކުގައި ވަޅުލަންޖެހޭ ގިނަ ހޮޅިތަކެއް ވަނީ ވަޅުލާފައެވެ. އޭގެތެރޭގައި ކުރިން މަގުތައް ހެދިއިރު ގާއިމުނުކުރާ ފަޔަރ ހައިޑްރަންޓް ސިސްޓަމާއި ޑީވޯޓަރިންގ ސިސްޓަމް ހިމެނެއެވެ. އަދި ކުރިން ހެދި މަގުތަކުގައި ފެން ނުހިނދޭ މައްސަލަވެސް ބޮޑުވާތީ އެކަން ހައްލުކުރުމަށްޓަކައި، އަލަށް ހަދާ މަގުތަކުގައި ސްޓޯމްވޯޓާ ސިސްޓަމްވެސް ވަނީ ގާއިމުކޮށްފައެވެ.
ކުރީގައި މަގުތައް ހެދިއިރު، އޭބީސީ ލޭޔަރ ހަދާފައިވަނީ ދޮންވެއްޔާއި ސިމެންތި ބޭނުންކޮށްގެން ވަރަށް ތުނިކޮށްނަމަވެސް، މިފަހަރު މަގުތަކުގައި އޭބީސީ ލޭޔަރ ހަދަނީ ތަފާތު ތިން ސައިޒެއްގެ ހިލަވެލި ބޭނުންކޮށްގެންނެވެ. އަދި އޭބީސީ ލޭޔަރގެ ބޯމިނުގައި 100 އެމްއެމް ހުރެއެވެ. ތާރު ފަށަލައިގެ ބޯމިނަކީ 40 އެމްއެމްއެވެ. ޖުމްލަ ފަށަލައިގެ ބޯމިނުގައި 140 އެމްއެމް ހުރެއެވެ.
ދެވަނަ ފިޔަވަހީގެ މަސައްކަތް ފެށިގެން ދިޔައީ ކައުންސިލުން އެދުނު ކަންތައްތައް، މަޝްރޫއުގައި ހިމެނުމަށްފަހުއެވެ. އެހެންކަމުން ކުރިން 106 މިލިއަން ރުފިޔާގެ މަޝްރޫއެއްގެ ގޮތުގައި އޮތް މަގުހެދުމުގެ ދެވަނަ ފިޔަވަހި މިހާރުވަނީ 199 މިލިއަން ރުފިޔާގެ މަޝްރޫއަކަށް ބަދަލުވެފައެވެ. ދެވަނަ ފިޔަވަހީގެ ދަށުން 33 މަގެއް ތަރައްގީކުރުމަށް ވަނީ ހަމަޖެހިފައެވެ.
