ކޯލިޝަންގެ މަޝްވަރާތަކުން ފެހި ސިގްނަލެއް ވަނީ ލިބިފައި: ރައީސް ޞާލިޙު
ކުރިއަށް އޮތީ ރަސްމީކޮށް އިއުލާން ކުރުން ފައިނަލް ކުރުމަށް ކުރަން ޖެހޭ ކަންކަން
ރިޔާސީ އިންތިޚާބުގެ ފުރަތަމަ ބުރުގައި ވޯޓުލެއްވުމަށްފަހު ރައީސް ޞާލިޙު ކާރަށް އަރާވަޑައިގަންނަވަނީ
ރިޔާސީ އިންތިޚާބުގެ ދެ ވަނަ ބުރަށް ކުރިމަތިލާއިރު، ފުރަތަމަ ބުރުން ނާކާމިޔާބުވި ފަރާތްތަކާއެކު ކޯލިޝަނެއް ހެދުމުގެ މަޝްވަރާތައް ފައްޓަވާފައިވާ ކަމަށާއި، މަޝްވަރާތަކުން ފެހި ސިގްނަލެއް ލިބިވަޑައިގެންފައިވާ ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވިދާޅުވެއްޖެ އެވެ.
ރައީސް ޞާލިޙު މިހެން ވިދާޅުވީ، ހޯމަ ދުވަހުގެ ހެނދުނު ރާއްޖެ ޓީވީގެ ފަށާއިރު ޕްރޮގްރާމަށް ދެއްވި ޚާއްސަ ފޯން އިންޓަވިޔުއެއްގަ އެވެ. އެ އިންޓަވިޔުގައި ރައީސް ޞާލިޙު ވިދާޅުވީ، ކޯލިޝަނެއް ޤާއިމު ކުރުމުގެ ވާހަކަތައް ބައެއް ޕާޓީތަކާއެކު އާދިއްތަ ދުވަހު ދައްކަވާފައިވާ ކަމަށެވެ. އޭގެ ތެރޭގައި އެމްޑީޕީ އާއެކު ކުރިއަށް ދާނެ ކަމުގެ ފެހި ސިގްނަލް ދެއްވާފައިވާ ބައެއް ބޭފުޅުން އެބަ ތިއްބެވި ކަމަށް ވެސް ރައީސް ވިދާޅުވި އެވެ. އިތުރަށް ރައީސް ވިދާޅުވީ، ރަސްމީކޮށް އެކަން އިއުލާން ކުރެވޭ ހިސާބަށް އަދި ނުދާ ކަމަށާއި، ނަމަވެސް ދެން އޮތް މަސައްކަތަކަށް ވާނީ އެކަން ރަސްމީކޮށް އިއުލާން ކުރުން ކަމަށެވެ. ރައީސް ޞާލިޙު ވިދާޅުވީ އެމަނިކުފާނަށް ޤަބޫލު ކުރެއްވޭ ގޮތުގައި އޭގެ ތެރެއިން ދެ ބައެއް ނުވަތަ ތިން ބައެއް އެމްޑީޕީ އާއެކު ކުރިއަށް ދާނެ ކަމަށެވެ.
މިއަހަރުގެ ރިޔާސީ އިންތިޚާބުގެ ދެ ވަނަ ބުރުގައި ވާދަކުރައްވަނީ ރައީސް ޞާލިޙުގެ އިތުރުން އިދިކޮޅު ޕީއެންސީގެ ކެންޑިޑޭޓް ޑރ.މުޙައްމަދު މުއިއްޒު އެވެ. ފުރަތަމަ ބުރުގައި ރައީސް ޞާލިޙަށް ވަނީ 85،935 ވޯޓު ލިބިވަޑައިގެންފަ އެވެ. އިދިކޮޅު ކެންޑިޑޭޓު ޑރ.މުއިއްޒު އަށް ވަނީ 101،180 ވޯޓު ލިބިވަޑައިގެންފަ އެވެ. ދެ ވަނަ ބުރުގެ ވޯޓުލުން ކުރިއަށް ދާނީ ސެޕްޓެމްބަރު މަހުގެ 30 ވާ ހޮނިހިރު ދުވަހު އެވެ.
ޖުމްލަ 8 ކެންޑިޑޭޓަކު މިއަހަރުގެ ރިޔާސީ އިންތިޚާބުގައި ވާދަކުރައްވާފައިވާއިރު، އޭގެ ތެރެއިން ހަ ބޭފުޅަކަށް ވަނީ ފުރަތަމަ ބުރުން ނާކާމިޔާބުވެވަޑައިގެންފަ އެވެ. އެއީ ތިން ވަނަ އަށް އެންމެ ގިނަ ވޯޓު ލިބިވަޑައިގެންނެވި ދަ ޑިމޮކްރަޓްސްގެ ކެންޑިޑޭޓް އިލްޔާސް ލަބީބް، ހަތަރު ވަނަ އަށް އެންމެ ގިނަ ވޯޓު ލިބިވަޑައިގެންނެވި އަމިއްލަ ކެންޑިޑޭޓް އުމަރު ނަސީރު، އަދި ފަސް ވަނަ އަށް އެންމެ ގިނަ ވޯޓު ލިބިވަޑައިގެންނެވި ޖުމްހޫރީ ޕާޓީގެ ކެންޑިޑޭޓް ޤާސިމް އިބްރާހީމާއި ހަ ވަނަ އަށް ވޯޓު ވަޑައިގެންނެވި އެމްއެންޕީގެ ކެންޑިޑޭޓް ކާނަލް ރިޓަޔާޑް މުޙައްމަދު ޏާޒިމް، ހަތް ވަނަ ވޯޓު ލިބިވަޑައިގެންނެވި އަމިއްލަ ކެންޑިޑޭޓް އަޙުމަދު ފާރިސް މައުމޫން އަދި އަށް ވަނަ ލިބިވަޑައިގެންނެވި އަމިއްލަ ކެންޑިޑޭޓް ޙަސަން ޒަމީލް އެވެ.
މިއަހަރުގެ ރިޔާސީ އިންތިޚާބަށް އެމްޑީޕީއާއެކު ރައީސް ޞާލިޙު ނުކުންނެވީ ވެސް ކޯލިޝަނެއްގެ ތެރެއިންނެވެ. އެއީ އެމްޑީއޭ އަދި އަދާލަތު ޕާޓީ ހިމެނޭ ކޯލިޝަން އެވެ.
