ޑެމްބެލޭގެ މޮޅު ކުޅުމާއެކު، އަލް އިއްތިފާގުން ޑަމަކް ބަލިކޮށްފި

މޫސާ ޑެމްބެލޭގެ މޮޅު ކުޅުމާއެކު، ސައުދީ ޕްރޯ ލީގުގައި ޑަމަކާ ދެކޮޅަށް ކުޅުނު މެޗުން އަލް އިއްތިފާގު މޮޅުވެއްޖެ އެވެ.

ހޮނިހިރު ދުވަހުގެ ރޭ ކުޅުނު މެޗު އަލް އިއްތިފާގުން ކާމިޔާބު ކުރީ 3-1 އިންނެވެ. މެޗު އަލް އިއްތުފާގުން ކާމިޔާބު ކުރީ ފަހަތުން އަރައި ތިން ލަނޑު ޖަހައިގެންނެވެ. މެޗު ފަށައިގެން ހަތް ވަނަ މިނެޓުގައި ޑަމަކް އިން ވަނީ ލަނޑު ޖަހައި ލީޑު ނަގައިފަ އެވެ. އެއީ ލިބުނު ޕެނަލްޓީއެއް ކާމިޔާބުކޮށް، ކޫޑޫ ޖެހި ލަނޑުންނެވެ. ނަމަވެސް އޭގެ ފަހުން 13 ވަނަ މިނެޓުގައި ޑެމްބެލޭ ވަނީ ލަނޑު ޖަހައި، އަލް އިއްތިފާގަށް ނަތީޖާ ހަމަހަަމަ ކޮށްދީފަ އެވެ. އޭގެ 10 މިނެޓު ފަހުން ޑެމްބެލޭ ވަނީ އިތުރު ލަނޑެއް ޖަހައި އެ ޓީމަށް ފުރަތަމަ ފަހަރަށް ކުރި ހޯދައިދީފަ އެވެ. މެޗުގައި އަލް އިއްތުފާގުގެ ތިން ވަނަ ލަނޑު ޖެހީ ހަމްދާން އަލް ޝަރްމާނީ އެވެ. އެއީ 68 ވަނަ މިނެޓުގަ އެވެ.

މިއީ މި ސީޒަންގެ ލީގުގައި އަލް އިތިފާގުން ހޯދި ތިން ވަނަ މޮޅެވެ. އެއް މެޗު އެއްވަރުވީއިރު، އެއް މެޗުން ވަނީ ބަލިވެފަ އެވެ. ފަސް މެޗުން ޖުމުލަ 10 ޕޮއިންޓު ހޯދައިގެން އެ ޓީމު އޮތީ ފަސް ވަނައިގަ އެވެ. ލީގުގައި ދެން އެ ޓީމަށް އޮންނާނީ ސެޕްޓެމްބަރު މަހުގެ 16 ވަނަ ދުވަހު އަބްހާއާ ދެކޮޅަށް ކުޅޭ މެޗެވެ.