މީހަކު ރަހީނުކުރި މައްސަލައަކާ ގުޅިގެން ހައްޔަރުކުރި ފިރިހެން މީހާގެ ބަންދަށް 15 ދުވަސް ޖަހައިފި
ހައްޔަރުކުރީ 43 އަހަރުގެ ފިރިހެނެއް
ފުލުހުންގެ މައި އިދާރާ
މާލޭގެ ގެއެއްގައި މީހަކު ރަހީނުކުރި މައްސަލައެއްގައި ހައްޔަރުކުރި ދިވެހި ފިރިހެން މީހާގެ ބަންދަށް 15 ދުވަސް ޖަހައިފިއެވެ.
ރާއްޖެއެމްވީއަށް ފުލުހުންގެ މީޑިއާ އޮފިސަރު ވިދާޅުވީ މާލޭގައި މީހަކު ރަހީނުކޮށް، ފައިސާ ފޭރުނު މައްސަލައަކާ ގުޅިގެން އަންގާރަ ދުވަހު 43 އަހަރުގެ ދިވެހި ފިރިހެނަކު ހައްޔަރުކޮށްފައިވާ ކަމަށެވެ.
ފުލުހުން ބުނީ އިތުރު ބަޔަކާ ބައިވެރިވެގެން މާލޭގެ ގެއެއްގައި ފިރިހެނަކު ހުއްދަނޫން ގޮތުގައި ހިފަހައްޓައި އަނިޔާކޮށް، އޭނާގެ ބޭންކް އެކައުންޓުން ފައިސާ ޓްރާންސްފަރކުރި މައްސަލައެއް އޮގަސްޓް މަހުގެ 4 ވަނަ ދުވަހު ރިޕޯޓުކޮށްފައި ވާކަމަށެވެ.
އެ މައްސަލައާ ގުޅިގެން ކޯޓު އަމުރެއްގެ ދަށުން އޯގަސްޓް މަހުގެ 29 ވަނަ ދުވަހު 43 އަހަރުގެ ދިވެހި ފިރިހެނަކު ހައްޔަރުކޮށްފައި ވާކަމަށާއި އޭނާގެ ބަންދަށް ކްރިމިނަލް ކޯޓުން މިއަދު 15 ދުވަސް ޖަހާފައި ވާކަމަށެވެ.
މައުލޫމާތު ލިބިފައިވާގޮތުގައި މި މައްސަލާގައި ހައްޔަރުކޮށްފައިވަނީ މީގެ ކުރިން ފިލްމީ ދާއިރާގައި ހަރަކާތްތެރިވެ މަޝްހޫރުވެފައިވާ އަލީ ޝާހިދު (ސްޓެޕް އައްޔަ)އެވެ.
މި މައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.
