މާދަމާ ފަށާ އޭޝިޔާ ކަޕުގެ ޝެޑިއުލް އޮތް ގޮތުން ޕާކިސްތާނަށް އެޑްވާންޓޭޖް އެބައޮތް ކަމަށް ކެޕްޓަން ބަބަރް އަޒަމް ބުނެފި އެވެ.

ޕާކިސްތާނާއި ލަންކާގައި ބާއްވާ މުބާރާތުގައި ޕާކިސްތާނުގެ ފުރަތަމަ މެޗު އޮތީ މާދަމާ ނޭޕާލާ ދެކޮޅަށެވެ. ތިން ޓީމު ހިމެނޭ ގްރޫޕުގެ ފަހު މެޗުގައި އިންޑީޔާއާ ދެކޮޅަށް ނުކުންނާނީ ސެޕްޓެމްބަރު މަހުގެ ދެ ވަނަ ދުވަހު އެވެ. ގަދަ ހަތަރަކަށް ގޮސްފިނަމަ ޕާކިސްތާނުގެ ފުރަތަމަ މެޗު އޮންނާނީ ސެޕްޓެމްބަރު މަހުގެ ހަޔެއއްގަ އެވެ. އޭގެ ފަހުން ދެ ވަނަ މެޗު އޮންނާނީ ސެޕްޓެމްބަރު 9ގަ އެވެ.

ބަބަރް އަޒަމް ބުނީ ޕްރޮފެޝަނަލް ޓީމެއްގެ ގޮތުން ޕާކިސްތާން އޮތީ ކޮންމެ ޝެޑިއުލަކަށް ވެސް މެޗު ކުޅެން ތައްޔާރަށް ކަމަށެވެ. ނަމަވެސް މިހާރު މެޗުތައް ހުރި ގޮތުން އެޑްވާންޓޭޖަކީ ދެ މެޗު ދޭތެރޭގައި އަރާމުކުރަން ލިބޭ ވަގުތު ގިނަވުން ކަމަށެވެ.

އޭނާ ބުނީ ޕާކިސްތާނުގައި ބާއްވަން އޮތް މުބާރާތް އިންޑީޔާގެ ސަބަބުން ލަންކާއާ ބައިވެރިވެގެން ބޭއްވުމުގެ ބަދަލުގައި ޕާކިސްތާނުގައި އެކަނި ކުޅެން ލިބުނުނަމަ ވަރަށް ފުރިހަމަވީސް ކަމަށެވެ. ނަމަވެސް ދެ ގައުމެއްގައި މުބާރާތް ކުޅުނަސް ޝަކުވާއެއްނެތް ކަމަށެވެ.

އޭނާ ވެސް ބުނީ މުބާރާތުގައި އެންމެ ހާއްސަ މެޗަކީ އިންޑިޔާއާ ދެކޮޅަށް ކުޅޭ މެޗު ކަމަށާއި އެއް ދުވަހުގެ 50 އޯވަރުގެ މެޗުތަކުގައި ޕާކިސްތާނު ދައްކާފައިވާ ކުޅުމަށް ބަލާއިރު މުބާރާތަށް ޓީމު އޮތީ ވަރަށް އިތުބާރާއެކުގައި ކަމަށެވެ. އަދި މުޅި ޓީމު ވެސް މަސައްކަތް ކުރަނީ އެ ގައުމުގެ ގިނަ ކުޅުންތެރިންތަކެއް ކްރިކެޓްގެ ގަދަ 10ގެ ރޭންކިންގައި ހިމެނުމަށް ކަމަށެވެ.