ކޮފީއިންވެސް ޑޮލަރު ރައްކާ ކުރެވިދާނެކަން އެނގޭތަ؟

މިޞްރުގެ ޤަނާތު ސުވައިސް ނުވަތަ ސުއެޒް ކެނާލްގެ އައްސޭރި ފަށުގެ ސިޓީއެއް ކަމަށް ވާ އިސްމާޢިލިއްޔާއަކީ މިޞްރުގެ އެންމެ ހިތްގައިމު މަންޒިލްތަކުގެ ތެރޭގައި ގުނާލެވޭ ތަނެކެވެ. ބޮޑެތި ބަގީޗާތަކަށް އިތުރު ފުރިހަމަކަމެއް ގެނެސްދޭ ސާފު މަގުތަކެއް އޮންނަ، ތަރުތީބު ސިޓީއެކެވެ. މި ހުރިހާ ކަމެއް މިހެން ހުރި އިރުވެސް، މިޞްރަށް މިއަދު ކުރިމަތިލާން ޖެހިފައިވާ އިޤްތިޞާދީ އަދި މާލީ ތަކުލީފުތަކުގެ ބަނަ ވިލާގަނޑު، އިސްމާޢިލިއްޔާގެ ފަޒާވެސް ދަނީ ކަޅު ކުރަމުން ކަން ފާހަގަ ކުރަން ޖެހެއެވެ. ނަމަވެސް، އެ ކޮޅިގަނޑުގެ ދަށު ނުވާން، އެމީހަކަށް ވީ ގޮތަކަށް މަސައްކަތް ކުރާ މީހުން އިސްމާޢިލިއްޔާގައި އެބަ ތިއްބެވެ. އެފަދަ އެކަކީ އަހުމަދު އަލް-ޙައްޤާވީއެވެ.

މިޞްރަށް އުފަން އިންޖިނޭރެއް ކަމަށް ވާ އަހުމަދަކީ އިސްމާޢިލިއްޔާގައި އޮންނަ އޭނާގެ ދަނޑުގައި ކޮފީ ހެއްދުމުގެ ތަޖުރިބާތައް ކުރަމުން އަންނަ މީހެކެވެ. އެކަމުގައި އޭނާ މަޝްހޫލުވެ އުޅޭތާ މިހާރު 4 ވަރަކަށް އަހަރު ވެދާނެއެވެ.

މިޞްރުގެ އާދަކާދައަށް ބަލާއިރު، އެ ޤައުމަކީ އަހަރެއްގެ މައްޗަށް ގާތްގަނޑަކަށް 70000 ޓަނުގެ ކޮފީ ބީންސް ބޭނުން ކުރާ ޤައުމެކެވެ. އެ ހުރިހާ ކޮފީ ބީންސްއަކީވެސް ބޭރުގެ އެކިއެކި ޤައުމުތަކުން މިޞްރަށް އިމްޕޯޓް ކުރާ ކޮފީ ބީންސް ކަމަށް ރޮއިޓަރޒްއާ ވާހަކަދެއްކި މިޞްރުގެ އިމްޕޯޓް ވިޔަފާރިވެރިން ވަނީ ފާހަގަ ކޮށްފައެވެ.

ނޭވާ ހިފަހައްޓާލަން ޖެހޭ ފަދަ އިޤްތިޞާދީ ކާރިޘާއެއް ތަޙައްމަލު ކުރަން ޖެހުމުގެ އިތުރުން މިޞްރަށް ވަނީ ނަޤުދު ފައިސާގެ ދަތިކަންވެސް އޭގެ އެންމެ އިންތިހާއަށް ކުރިމަތިވެފައެވެ. ނަތީޖާއެއްގެ ގޮތުން، ތާރީޚު ނުދެކޭ މިންވަރަށް، މި އަހަރު ތެރޭގައި މިޞްރުގެ އިންފްލޭޝަން ރޭޓް ވަނީ އުފުލިގެން ގޮސްފައެވެ. ހަމަ އެއާއިއެކު މިޞްރުގެ ސަރުކާރުން ވަނީ އެ ޤައުމަށް މުދާ އެތެރެ ކުރުމާ ދެކޮޅަށް ހަރުކަށި ފިޔަވަޅުތަކެއް ތަންފީޒު ކުރަންވެސް ފަށާފައެވެ.

ކޮފީ ހެއްދުމުގެ ތަޖުރިބާތައް ހިއްސާ ކުރަމުން އަހުމަދު ބުނީ، އެ މަސައްކަތަކީ މިއަދު މިޞްރަށް އެންމެ ބޭނުން ޖެހިފައި ވާ ޑޮލަރު ރައްކާ ކުރުމަށް މަގު ފަހި ކުރާނެ ކަމެއް ކަމަށެވެ. ނަމަވެސް އެނގުމެއް ވާ ވަރު ވާނީ، އޭނާއަށް އިތުރު އެހީތެރިކަން ލިބި، އެ އުކުޅުތައް ބޭނުން ކޮށްގެން ހައްދާނެ ބޮޑު ދަނޑުބިމެއްވެސް ލިބުނު ދުވަހަކުން ކަމަށް އަހުމަދު ބުނެއެވެ. 

މި އަހަރު ތެރޭގައި އަހުމަދު ހެއްދި ކޮފީ ގަސްތަކުގެ ތެރެއިން ކޮންމެ ގަހަކުންވެސް ގާތްގަނޑަކަށް 5 ކިލޯއާއި 8 ކިލޯއާ ދެމެދު މިންވަރެއްގެ ކޮފީ ބީންސް ލިބޭ ވަރު ވިއެވެ. އަހުމަދު މިހާރު ދަނީ އެ ކޮފީ ބީންސްތައް، އެހެން ދަނޑުވެރިންނަށް ވިއްކަމުންނެވެ. އެއީ އެހެން ދަނޑުވެރިންވެސް އެ ކޮފީ ބީންސްގެ ތަޖުރިބާ ކޮށްލުމުގެ ފުރުޞަތު ދިނުމުގެ ގޮތުންނެވެ.

ދުނިޔެއަށް މިއަދު ކުރިމަތި ވަމުން ދާ މޫސުމީ ނޭދެވޭ ބަދަލުތަކާއެކު މިޞްރަށްވެސް ދަނީ އާދަޔާ ޚިލާފަށް ހޫނު ގަދަ ވަމުންނެވެ. ނޭދެވޭ ބަދަލެއް ކަމަކު، އެއީވެސް މިޞްރުގައި ކޮފީ ގަސްތައް ހައްދަން ތަނަވަސް ވާ ފުރުޞަތަކަށް ވާނެ ކަމަށް އަހުމަދު ޢުއްމީދު ކުރެއެވެ.