ނެދަރލޭންޑްގެ ރަސްގެފާނު ކޭ.އެލް.އެމް.ގެ ޕައިލެޓްކަން ކުރައްވާކަން އެނގޭތަ؟

ނެދަރލޭންޑްގެ ރަސްގެފާނު ވިލެމް އެލެގްޒެންޑަރ އެ ގައުމުގެ ރަސްކަމާ ހަވާލުވެ ވަޑައިގަތީ 2013 ވަނަ އަހަރުއެވެ. އެއީ އެމަނިކުފާނުގެ މަންމާފުޅު ކްއީން ބީޓްރިކްސް، އައު ޖީލަކަށް ވެރިކަން ހަވާލު ކުރުމުގެ ވަގުތު އަތުވެއްޖެ ކަމަށް ވިދާޅުވެ ތަޚުތު ދޫކޮށްލެއްވުމާ އެކުގައެވެ.

އެހެން ކަމުން ފާއިތުވެ ދިޔަ ހަތަރު އަހަރު އެ ގައުމުގެ ރަސްކަމުގެ ޒިންމާ އުފުއްލަވަމުން ގެންދެވީ އެލެގްޒެންޑަރ އެވެ. އެކަމަކު، އެއީ އެމަނިކުފާނުގެ ހަމައެކަނި ވަޒީފާއެއް ނޫނެނެވެ.

ދާދިފަހުން ހާމަވެގެން ދިޔަ ކަމަކީ، ނެދަރލޭންޑްސްގެ ރަސްމީ އެއަރލައިންގެ ސަބްސިޑަރީ އެއް ކަމުގައިވާ ކޭ.އެލް.އެމް.ގެ ޕައިލެޓެއްގެ ގޮތުގައި ރަސްކަން ލިބި ވަޑައިގެންފަހުންވެސް އެމަނިކުފާނު މަސައްކަތްޕުޅު ކުރައްވަމުން ގެންދިޔައެވެ. ރަސްކަމާ ހަވާލުވެ ވަޑައިގަތުމުގެ ކުރިންވެސް އެމަނިކުފާނަކީ އެ އެއަރލައިންގެ ޕައިލެޓެވެ. އޭރުވެސް އަދި ރަސްކަމަށް ވަޑައިގަތުމަށް ފަހުވެސް އެ ވަޒީފާ އަދާކުރައްވަމުން ގެންދެވިކަން އޮތީ ނޭނގުމުގެ ތެރޭގައެވެ. މިހާތަނަށް ޕައިލެޓް ކަމުގައި ޖުމްލަ 21 އަހަރު އެމަނިކުފާނުވަނީ ހޭދަ ކުރައްވާފައެވެ.

މިކަން ހާމަވެގެން ދިޔައީ، ޑަޗް ނޫހެއް ކަމުގައިވާ ޑީ ޓެލެގްރާފްއަށް ދާދި ފަހުން އެމަނިކުފާނު ދެއްވި އިންޓަވިއު އެއްގައެވެ.

ރަސްގެފާނު ވިދާޅުވީ، މަތިންދާ ބޯޓު ދުއްވުމަކީ ވަރަށް ކުރައްވާ ހިތްޕުޅުވާ ކަމެއް ކަމުގައި ވާތީ، ފަސިންޖަރުން ގޮވައިގެން ގިނަ ފްލައިޓްތަކެއްގެ އުދުހުމުގައި ބައިވެރިވެ ވަޑައިގެންފައިވާނެ ކަމަށެވެ. އަދި އެކަން ކުރައްވަމުން ގެންދެވީ ހޮބީ އެއްގެ ގޮތުގައި ކަމަށްވެސް ވިދާޅުވިއެވެ.

ރަސްގެފާނު ވިދާޅުވީ ބޯޓު އުދުއްސުމަކީ، ފުރިހަމަ ކޮންސަންޓްރޭޝަން ބޭނުންވާ ކަމެއް ކަމުގައި ވުމުން، އެހެން ހުރިހާ ފިކުރުތަކެއް ބޯޓުގައި ދަތުރު ކުރާއިރު ދޫކޮށްލަން ޖެހޭނެ ކަމަށެވެ. އެހެން ކަމުން އެއީ ޝާހީ މަސައްކަތްތަކާ ގުޅޭ ކަންކަމާ ދުރުވެ ވަޑައިގަތުމަށް ލިބިވަޑައިގަންނަވާ ރަނގަޅު ފުރުސަތެއް ކަމަށްވެސް ވިދާޅުވިއެވެ.

ޕައިލެޓެއްގެ ގޮތުގައި ކުރައްވަނީ މަހަކު ދެ ދަތުރު ކަމަށްވެސް ރަސްގެފާނު ވިދާޅުވިއެވެ.

ރަސްގެފާނު ޕައިލެޓްކަން ކުރައްވާ ފްލައިޓްތަކުން ދަތުރުކުރާ ފަސެންޖަރުންނަށް ބޯޓު ދުއްވަން އިންނެވީ ރަސްގެފާނުކަން އެނގުމުގެ ފުރުސަތު އޮވޭތޯ ދެންނެވުމުން އެމަނިކުފާނު ވިދާޅުވީ، ކޮކްޕިޓުން ފަސެންޖަރުންނާ ވާހަކަފުޅު ދައްކަވަނީ އަމިއްލަފުޅު ނަން ބޭނުން ކުރައްވުމުގެ ބަދަލުގައި ކެޕްޓަންގެ ނަމުގައި ކަމަށްވުމާއެކު އެކަން އެނގޭނެ ގޮތެއް ނޯންނާނެ ކަމަށެވެ. އަދި އެހެން ނޫނަސް ކޮކްޕިޓުން ވާހަކަ ދެއްކާއިރުވެސް އެކަމަށް ސަމާލުކަން ދޭ ފަސެންޖަރުން ތިބޭނެހެން ހީފުޅުނުވާ ކަމަށް ވެސް ވިދާޅުވިއެވެ.