އެއްލައިދޫ ރިސޯޓްގައި ކައްކާ މަރާލި މައްސަލަ: އަންނަ މަހު ހެކިބަސް ނަގަން ފަށަނީ

އދ. އެއްލައިދޫ ރިސޯޓްގައި ލަންކާ ދެ މީހެއްގެ ދެމެދުގައި ހިންގި މާރާމާރީއެއްގައި އެ ރިސޯޓުގެ ކައްކާ މަރާލި މައްސަލައިގެ އަޑުއެހުމެއް ހޯމަ ދުވަހު ކުރިއަށް ގެންގޮސްފިއެވެ.

މި މައްސަލައިގައި ހޯމަ ދުވަހު ކުރިއަށް ގެންގޮސްފައިވަނީ އިދާރީ އަޑުއެހުމެކެވެ.

Advertisement

މި މައްސަލައިގައި އެންމެ ފަހުން ތާވަލުކުރި 4 އަޑުއެހުންވެސް ވަނީ ކެންސަލްވެފައެވެ. އެއީ ލަންކާ ބަހުން ވާހަކަދައްކަން އެނގޭ ތަރުޖަމާނަކު ނެތުމުގެ ސަބަބުންނެވެ.

ވުމާއެކު، ހޯމަ ދުވަހުގެ އަޑުއެހުމުގައި ގާޒީ ވަނީ އިނގިރޭސި ތަރުޖަމާނަކާއެކު މައްސަލަ ކުރިއަށް ގެންދިއުމާމެދު އިއުތިރާޒެއް އޮތްތޯ ސުވާލު ކުރައްވާފައެވެ.

އެ ސުވާލާއެކު އޭނާ ވަނީ ދިވެހި ބަހުން ފަރިތަކޮށް ވާހަކަ ދައްކައި، އޭނާއަށް ދިވެހި ބަހުން ޝަރީއަތް ކުރިއަށް ގެންދިއުން މާ ރަނގަޅުކަމަށް ބުނެފައެވެ.

އޭނާއަށް އިނގިރޭސިބަހަށްވުރެ ދިވެހިބަސް ފަރިތަކަމާއި، ދިވެހިބަހުން ލިޔެފައި ހުންނަ އެއްޗެހި ލިޔަންވެސް ކޮންމެސް ވަރަކަށް މިހާރު އެނގޭކަމަށް އޭނާގެ ދިފާއީ ވަކީލުވެސް ވިދާޅުވިއެވެ.

ގާޒީވެސް ވަނީ އޭނާއާ ބައެއް ސުވާލުތައް ކުރައްވައި އެކަން އިތުރަށް ކަށަވަރު ކުރައްވާފައެވެ.

ގާޒީ ވިދާޅުވީ، މައްސަލައިގެ އެއްވެސް ހިސާބަކުން އޭނާ ތަރުޖަމާނެއް ބޭނުންވާނަމަ އެހިސާބުން ތަރުޖަމާނެއް ފޯރުކޮށްދެއްވާނެ ކަމަށެވެ.

މި މައްސަލައިގައި މިހާރު ވަނީ ޝަރީއަތުގެ ކުރީގެ ހުށަހެޅުންތަކަށް ގޮތް ނިންމާފައެވެ. އެއީ 3 އޯގަސްޓު 2022 ގައެވެ. އޭގެ ފަހުން މި މައްސަލައިގެ އަޑުއެހުމެއް ބާއްވާފައެއް ނުވެއެވެ.

މިހާރު މި މައްސަލައާ ޙަވާލުވެވަޑައިގެންފައިވާ ގާޒީ އިބްރާހިމް އިޙްސާން ވަނީ އެހިސާބުން މައްސަލަ ކުރިއަށް ގެންދިއުމަށް ނިންމަވައި، އިފްތިތާޙީ ބަޔާން އިއްވުމަށް ފުރުސަތު ދެއްވާފައެވެ.

ވުމާއެކު ދެން އޮންނާނީ މި މައްސަލައިގެ ޝަރީއަތް ފަށައި ހެކިބަސް ނެގުމެވެ. ގާޒީ ވިދާޅުވީ، ސެޕްޓެމްބަރު މަހު ހެކިބަސް ނެގުން ކުރިއަށް ގެންދަވާނެ ކަމަށެވެ.

.މި މައްސަލައިގައި މަރުވެފައި ވަނީ ސްރީލަންކާއަށް ނިސްބަތްވާ ޕަތުމް ދިލްޝަން ޑި ސިލްވާ އަގަމްޕޮޑިއެވެ.

މި މައްސަލައިގައި ޖަޔަލަތުގެ މައްޗަށް އުފުލާފައިވާ ދައުވާގައި ބުނަނީ، އެ ދެމީހުންގެ މެދުގައި ހިނގި ޒުވާބެއްގެ ތެރެއިން ހައެއްކަ އިންޗީގެ ވަޅިއެއް ބޭނުންކޮށްގެން ކައްކާގެ ކަރުން ތިރިއަށް މޭމައްޗަށް ހަރައިލީކަމަށެވެ.