ކޭ ޕާކު މައްސަލަ: ބައެއް ކޮމްޕިއުޓަރ ސިސްޓަމްތަކުގެ ސީޕީޔޫއާއި، މައްސަލައާ ގުޅުންހުރި ބައެއް އެގްރީމަންޓު މަދު
މިހާރު ކްރިމިނަލް ކޯޓުން ވަނީ އޭނާގެ ބަންދަށް އިތުރު 10 ދުވަސް ޖަހާފައި
ކޭ ޕާކު މައްސަލާގައި ދައުވާލިބޭ މަމްދޫހު
ހުޅުމާލޭގައި ތަރައްގީކުރަމުންދާ ކޭ ޕާކް ރެޒިޑެންސްގެ ފްލެޓްތަކުގެ މައްސަލާގައި ބޮޑެތި ތުހުމަތުތަކެއް ކުރެވިފައިވާ ހަސަން މަމްދޫހު (މަންޑޭ)ގެ ބަންދަށް އިތުރު 10 ދުވަސް ޖަހައިފިއެވެ.
ހުޅުމާލޭގައި ތަރައްގީކުރަމުން އަންނަ ކޭ ޕާކު ފްލެޓްތަކުގެ މައްސަލާގައި ގިނަ ތުހުމަތުތަކެއް އަމާޒުވެފައިވާ ހަސަން މަމްދޫހު (މަންޑޭ) ހައްޔަރުކުރީ ޖުލައި 5 ވަނަ ދުވަހުއެވެ.
އޭނާ ހައްޔަރުކޮށްފައިވަނީ އޭނާ ފިލަން މަސައްކަތް ކުރާކަމަށް ތުހުމަތު ކުރުމަށްފަހުއެވެ. އޭނާ ހައްޔަރުކޮށްފައި ވަނީ ހުޅުމާލޭ މެޖިސްޓްރޭޓް ކޯޓުގެ އަމުރަކާއެކު ކަމަށް ވާއިރު، އޭނާގެ ބަންދާމެދު ގޮތެއް ކަނޑައަޅަން ހުޅުމާލޭ ކޯޓަށް އޭނާ ގެންދިއުމުން، އެ ކޯޓުން ވަނީ 15 ދުވަހުގެ ބަންދުގެ މުއްދަތެއް ޖަހާފައެވެ. މަންޑޭ ހައްޔަރުކުރަން ހުޅުމާލޭ ކޯޓުން ނެރުނު އަމުރުގައި ވަނީ އޭނާ ފުރުން މަނާކޮށްފައެވެ.
ބަންދުގެ މުއްދަތު ހަމަވުމުން، މިހާރު ކުރިމިނަލް ކޯޓުން ވަނީ އޭނާގެ ބަންދަށް އިތުރު 10 ދުވަސް ޖަހާފައެވެ.
ކޯޓު އަމުރުގައި ބުނެފައިވަނީ ކުންފުނީގެ އޮފީސް ބަލައި ފާސްކުރިއިރު ބައެއް ކޮމްޕިއުޓަރ ސިސްޓަމްތަކުގެ ސީޕީޔޫއާއި، މައްސަލައާ ގުޅުންހުރި ބައެއް އެގްރީމަންޓު މަދުކަމަށް ފުލުހުން ބުނެފައިވާކަމަށެވެ.
ކުރިމިނަލް ކޯޓުގެ އަމުރުގައި އިތުރަށް ބުނެފައިވަނީ، މިއީ ގިނަ ބައެއްގެ މަސްލަހަތު ހިމެނޭ މައްސަލައެއް ކަމަށާއި، މަންޑޭ މި މައްސަލައިގެ ހެތްކަށް ނުފޫޒު ފޯރުވައި، ހެކި ނައްތާލުމަށް މަސައްކަތް ކުރަމުންދާކަން ފާހަގަވެފައިވާކަމަށް ފުލުހުން ބުނާކަމަށެވެ. އެގޮތުން އެޕާޓްމަންޓު ގަތުމަށް ފައިސާ ދެއްކި ބައެއް ފަރާތްތަކުން ގުޅުމުން، އެ ފަރާތްތަކަށް ގުޅައި މައްސަލަ ފުލުހުންނަށް ހުށަނޭޅުމަށް މަންޑޭ އެދެމުންދާކަމަށްވެސް ކޯޓު އަމުރުގައި ބުނެއެވެ.
އޭގެ އިތުރުން، ބައެއް އެޕާޓްމަންޓުތައް ޑަބަލްކޮށް އެކި މީހުންނަށް ވިއްކުމަށްފަހު، އޭނާގެ އަމިއްލަ ބޭނުމަށް އެ ފައިސާ ބޭނުންކޮށްފައިވާކަން މައްސަލައިގެ ތެރެއިން ފާހަގަވެފައި ވާކަމަށްވެސް މައްސަލައިގެ އައިއޯ ކޯޓުގައި ބުނެފައިވެއެވެ.
ކޭ ޕާކު ފްލެޓްތައް ތަރައްގީކުރަމުންދާ ހަންބޯ މޯލްޑިވްސްގެ ނަމުގައި ހަދާފައިވާ ފޯޖު ލިޔުންތަކެއް ބޭނުން ކުރުމާއި، މަކަރާއި ހީލަތުން އެޕާޓްމަންޓުތައް ވިއްކުމަށްފަހު އެ ފައިސާއަށް ޚިޔާނާތްތެރިވި ކަމަށް އޭނާގެ މައްޗަށް ވަނީ ތުހުމަތު ކުރެވިފައެވެ. ފުލުހުން މި ފަދަ މައްސަލައެއް ތަހުގީގުކުރަން ފަށާފައިވަނީ ހަންބޯ މޯލްޑިވްސްގެ މައި ހިއްސާދާރު ހުށަހެޅި މައްސަލައަކާ ގުޅިގެންނެވެ.
މަންޑޭއަށް ކުރާ ތުހުމަތުތައް އޭނާ ދޮގުކުރެއެވެ. އަދި އެ މަޝްރޫއު ހިންގާ ކުންފުނިކަމަށްވާ ހަންބޯ މޯލްޑިވްސްގެ މައި ހިއްސާދާރު އުޅެނީ ފައިސާ ހިފައިގެން ފިލަން ކަމަށްވެސް މަންޑޭ ތުހުމަތުކޮށްފައި ވެއެވެ.
މިމައްސަލައާ ގުޅިގެން، މީގެ ކުރިން ފުލުހުން އެދިގެން ކްރިމިނަލް ކޯޓުން ވަނީ މަންޑޭގެ ޕާސްޕޯޓް ހިފަހައްޓަން އަމުރެއް ނެރެދީފައެވެ. ނަމަވެސް ކުރީގެ އަމުރު މުރާޖާ ކުރުމަށްފަހު ޕާސްޕޯޓު ވަގުތީގޮތުން ދޫކޮށްލުމަށް ވަނީ ނިންމާފައެވެ. އެގޮތުން ކޯޓުން ބުނީ އޭނާގެ ޕާސްޕޯޓު ދޫކުރީ ޒަރޫރީ ބޭނުމެއްގައި ދަތުރުކުރުމަށްޓަކައި ކަމަށާއި، 45 ދުވަހުގެ ތެރޭގައި ދަތުރު ނިންމުމަށްފަހު ކޯޓަށް އަންގަން ޝަރުތު ކޮށްފައިވާކަމަށެވެ.
އެ ނިންމުން ހައިކޯޓުގައި އިސްތިއުނާފު ކޮށްފައިވާއިރު، ދެން އޮންނާނީ އެކަމުގައި ހައިކޯޓުން ގޮތެއް ނިންމުމެވެ.
