ޤުދުރަތީ ލޮނުން އެތައް ބައްޔަކަށް ފަރުވާ
ގަނޑު ލޮނު ބޭނުން ކޮށްގެން ފަރުވާ ދޭ ބައެއް މީހުން ބުނާ ގޮތުގައި، މި ލޮނުގެ އެހީގައި ނޭވާ ލުމުގެ ނިޒާމަށް ހެޔޮ ބަދަލުތަކެއް ގެނުވާ
މި ލޮނަކީ ނެގެޓިވް ޗާޖް ހުންނަ ލޮނުފުށް އެކުލެވޭ އެއްޗަކަށްވާއިރު، މި ގަނޑު ލޮނުގައި 84 ބާވަތެއްގެ މާއްދާތައް އެކުލެވިގެންވޭ
ޤުދުރަތީ ގޮތުން މި ދުނިޔެއަށް ލިބިފައިވާ ވަޞީލަތްތަކުގެ ބޭނުން ހެޔޮ ގޮތުގައި ހިފަން އެނގުނު ބަޔަކަށް ދިރިއުޅުމުގެ އެތައް ކަމަކަށް ލުއިފަސޭހަ ކަން ލިއްބައިދެއެވެ. މަސްނޫޢީ ބާވަތްތަކަށް ބަރޯސާވުމުގެ ބަދަލުގައި، ޤުދުރަތީ ގޮތުން ލިބެން ހުރި ނިޢުމަތްތަކާއި ވަޞީލަތްތަކުގެ ބޭނުން ހިފުމުގައި އެތައް ފައިދާއަކާއި މަންފާއެއްވެސް އޮވެއެވެ. އިންތިހާ ހަނަފަސްކަމާއި ގަދަ ހޫނާ ކުރިމަތިލާން ޖެހިފައިވާ އެކުވެރި ޢަރަބި ޢިމާރާތް (ޔޫއޭއީ) އިން މިކަމުގެ ރީތި މިސާލެއް ފެނިގެންދެއެވެ.
އަލް ޢައިންގައި ބަޔަކު އަމިއްލައަށް ހެދި މި ހޮހަޅާގައި މުޅިންވެސް ބޭނުންކޮށްފައި ވަނީ ގަނޑު ލޮނެވެ. މިއީ އެކި ކަހަލަ ތަޣައްޔަރު ކަމުން ނުތަނަވަސް ކުރުވާފައިވާ ހަލަބޮލިވެށިން މިންޖުވެ، ތާޒާ ވައިގެ ތެރެއަށް ނޭވާލާނެ ފުރުޞަތު ހޯދާދޭ ހިތްގައިމު މަންޒިލެކެވެ. ޤުދުރަތީ ވަޞީލަތްތަކުން، އެތައް ކަމަކަށް ތަޞައްލީ ހޯދާދޭ މާޙައުލެކެވެ.
މި ހޮހަޅައިން ފޯރުކޮށްދޭ ފަރުވާގެ ޚިދުމަތްތަކުގެ ތެރެއިން އެންމެ ފާހަގަ ކޮށްލެވޭ އެއް ކަމަކީ ހޭލޯތެރަޕީ ސެޝަންތަކެވެ. މި ސެޝަންތައް ފަރުމާ ކޮށްފައި ވަނީ، ލޮނުގެ ތެތްކަން ނުވަތަ ލޮނު ވަސް އެކުލެވޭ ވައި ބޭނުންކޮށްގެންނެވެ. ލޮނުވައިގެ ތެރޭގައި ނޭވާލައިގެން ނަފުސަށް ހޯދަން ބައެއް މީހުން އަންނައިރު، އަނެއް ބަޔަކު ހޮހަޅައަށް ޒިޔާރަތް ކުރަނީ ސިކުނޑި ތާޒާ ކޮށްލުމުގެ ބޭނުމުގައެވެ. އެ ތާޒާކަން ހޯދަނީ ދެފައިތިލަ ނުވަތަ މުޅި މީހާ އެއްކޮށް، ލޮނުފުންޏެއްގެ ތެރޭގައި ވަޅުލެވިފައި އޮވެގެންނެވެ.
ހޮހަޅަ ތައްޔާރު ކުރުމަށް ބޭނުން ކޮށްފައިވާ ގަނޑު ލޮނަކީ ޕޯލަންޑްގެ ސިޓީއެއް ކަމަށް ވާ ކަރާކޯވްއިން ޔޫއޭއީއަށް އެތެރެ ކޮށްފައި ވާ ލޮނެވެ. މި ލޮނަކީ ނެގެޓިވް ޗާޖް ހުންނަ ލޮނުފުށް އެކުލެވޭ އެއްޗެކެވެ. އަދި 84 ބާވަތެއްގެ މާއްދާތައް މި ގަނޑު ލޮނުގައި އެކުލެވިގެންވެއެވެ. ގަނޑު ލޮނު ބޭނުން ކޮށްގެން ފަރުވާ ދޭ ބައެއް މީހުން ބުނާ ގޮތުގައި، މި ލޮނުގެ އެހީގައި ނޭވާ ލުމުގެ ނިޒާމަށް ހެޔޮ ބަދަލުތަކެއް ގެނުވައެއެވެ. ހަމަށް ޖެހޭ އެކި ކަހަލަ އިންފެކްޝަންތަކާ ދެކޮޅަށް މަސައްކަތް ކުރެއެވެ. އަދި ނަފުސަށް ވެރިވާ ނުތަނަވަސްކަން ނުވަތަ ސްޓްރެސްގެ މިންވަރު ކުޑަކޮށްދެއެވެ.
އެކި މަސްދަރުތަކުގައިވާ މަޢުލޫމާތަށް ބަލާއިރު ހޭލޯތެރަޕީ އެންމެ ފުރަތަމަ ދަނެގަނެވުނީ މީލާދީން 1800ގެ އަހަރުތަކުގެ ތެރޭގައެވެ. އެއީ ޕޯލަންޑްގައި ލޮނު ނެގުމުގެ މަސައްކަތުގައި އުޅުނު މީހުންގެ ނޭވާލުމުގެ ނިޒާމުގެ ދުޅެހެޔޮ ކަމަށާއި، އެމީހުންގެ ގައިގެ ހަންގަނޑަށް އެދެވޭ ބަދަލުތަކެއް އަންނަކަން ފާހަގަ ކުރެވެން ފެށި ހިސާބުންނެވެ. ހޭލޯތެރަޕީގެ ފަރުވާ ހޯދަން، ޔޫއޭއީގެ ހޮހަޅައަށް އަންނަ ކަސްޓަމަރުންގެ ފަރާތުންވެސް އިވުނީ އެކަހަލަ ވާހަކަތަކެކެވެ.
ނެޗުރޯޕެތިކް ފިޒީޝަން ޚާލިދު އަހުމަދު ބުނި ގޮތުގައި، ފަރުވާ ކުރަން ދަތި ހަމުގެ މައްސަލަތައް ތަޙައްމަލު ކުރަމުންދާ ގިނަ ޢަދަދެއްގެ ޕޭޝަންޓުން، މިއަދު ދަނީ ހޮހަޅައިން ދޭ ތެރަޕީގެ ޚިދުމަތް ހޯދަމުންނެވެ.
ކަން މިހެން އޮތް ނަމަވެސް، ޒަމާނީ ސައެންސްގެ ބޭސްވެރިކަމުގެ ދާއިރާގައި މަސައްކަތް ކުރާ ޑޮކްޓަރުން، ހޭލޯތެރަޕީއާ މެދު ދެކޭ ގޮތުގައި ޚިލާފުތަކެއް އެބަހުއްޓެވެ. ހޭލޯތެރަޕީގެ ފަރުވާއިން ލިބިދޭ ފައިދާތަކާ މެދު ޑޮކްޓަރުން ސުވާލު އުފައްދައެވެ. ޑޮކްޓަރުން ބުނާ ގޮތުގައި ހަމަ އެކަނި ހޭލޯތެރަޕީއަށް ބަރޯސާވުމުގެ ބަދަލުގައި، ހޭލޯތެރަޕީއާއެކު ޑޮކްޓަރީ ބޭސްވެސް ކުރިއަށް ގެންދިއުން މުހިންމެވެ.
