ފުއްގިރި މައްސަލަ: ދައުލަތުގެ ހެކިން ހާޒިރު ނުކުރެވިގެން އަޑުއެހުން ކުރިއަށް ނުގެންދެވުނު
އަޑުއެހުން ކެންސަލްވެފައިވަނީ ދައުލަތުގެ ހެކިން ހާޒިރު ނުކުރެވިގެން
ކްރިމިނަލް ކޯޓް
ރ ފުއްގިރި ކުއްޔަށް ދޫކުރުމުގެ މުއާމަލާތުގެ ތެރެއިން, މަގާމުގެ ނުފޫޒު ބޭނުންކޮށް, ރިޝްވަތު ނެގި މައްސަލައިގެ އަޑުއެހުން ކެންސަލްވެއްޖެއެވެ.
މި އަޑުއެހުން ތާވަލު ކޮށްފައި އޮތީ އާދިއްތަ ދުވަހުގެ ހެނދުނު 09:00 އަށެވެ. ނަމަވެސް އަޑުއެހުން ކެންސަލްވެފައިވަނީ ދައުލަތުގެ ހެކިން ހާޒިރު ނުކުރެވިގެންނެވެ.
މި މައްސަލައިގައި ކްރިކް ރިޒާގެ މައްޗަށް ކޮށްފައިވާ ދައުވާތައް ދައުލަތުން ވަނީމިވަގުތަށްއަނބުރާ ގެންގޮސްފައެވެ. އެއީ ކްރިކް ރިޒާ 31 ދުވަހުގެ މެޑިކަލްއެއް ހުށައަޅާފައި ވުމުގެ ސަބަބުން މި މައްސަލަ ލަސްވާތީއާއި، ކްރިކްގެ ފަރާތުން ހުށައަޅާފައިވާ ދިފާއީ ހެއްކާ ގުޅޭގޮތުން އިތުރަށް ބަލަންޖެހޭ ކަންތައްތަކެއް ހުރުމުގެ ސަބަބުންނެވެ.
ވުމާއެކު، މިހާރު ކުރިއަށްދަނީ ކުރީގެ ރައީސް އަބްދުﷲ ޔާމީނާއި، ސަން އިންވެސްޓްމަންޓް އަދި ސަން ކޮންސްޓްރަކްޝަންގެ މައްޗަށް ކޮށްފައިވާ ދައުވާތަކުގެ އަޑުއެހުންތަކެވެ.
ދައުލަތުގެ ހެކިންގެ ހެކިބަސް ނެގުމުގެ މަރުޙަލާގައި އޮތް މި މައްސަލައިގައި އެންމެ ފަހުންއަޑުއެހުމެއްބާއްވާފައިވަނީ 13 ޖުލައި 2023 ގައެވެ. އެ އަޑުއެހުމުގައި ފުރަތަމަ ހެކިވެރިއެއްގެ ގޮތުން ހާޒިރުވެވަޑައިގެންނެވީ ރައްޔިތުންގެ މަޖިލީހުގެ މާފަންނު މެދު ދާއިރާގެ މެންބަރު އިބްރާހީމް ރަޝީދު (ބޮންޑާ) އެވެ.
ދައުލަތުގެ ދެވަނަ ހެއްކެއްގެ ގޮތުން ހާޒިރުވި އަހުމަދު ޝާއިރަކީ ތިމާވެށީގެ ދާއިރާގެ ކޮންސަލްޓެންސީ މަސައްކަތް ކުރާ ކުންފުންޏެއްގެ ސީއީއޯއެވެ.
