ބެންޖަމިން މެންޑީގެ މައްޗަށް ރޭޕްގެ ދައުވާ ސާބިތެއްނުވި

މެންޗެސްޓާ ސިޓީގެ ކުރީގެ ޑިފެންޑަރު ބެންޖަމިން މެންޑީގެ މައްޗަށް ރޭޕްގެ ކުށް ސާބިތުނުވާކަމަށް ކޯޓުން ނިންމައިފިއެވެ.

މެންޑީގެ މައްޗަށް ރޭޕްކުރުމުގެ ހަ ދައުވާއަކާއި ޖިންސީ ގޯނާގެ އެއް ދައުވާ އުފުލާފައިވާއިރު، މިދިޔަ ޖެނުއަރީ މަހު ކުށް ސާބިތުނުވާ ކަމަށް ކޯޓުން ނިންމިއެވެ. ޗެސްޓާ ކްރައުން ކޯޓުގައި އަލުން ޝަރީއަތް ކުރިއަށް ގެންގޮސް، އެ ޝަރީއަތް ނިމުނުއިރުވެސް މެންޑީއަށް ކުށް ސާބިތެއް ނުވެއެވެ.

މި މައްސަލަ ފުލުހުން ތަހުގީގު ކުރަން ފެށިތާ ގާތްގަނޑަކަށް ތިން އަހަރު ވެފައިވާއިރު، އެ މަރުހަލާގެ ސަބަބުން އޭނާއަށް ވަނީ ވަރަށް ބޮޑު އަސަރެއް ކޮށްފައިކަމަށް މެންޑީގެ ސޮލިސިޓާ ނެރުނު ބަޔާނެއްގައި ބުންޏެވެ.

އުމުރުން 28 އަހަރުގެ ކުޅުންތެރިޔާ 2017 ވަނަ އަހަރު ސިޓީއާ ގުޅުނުއިރު، އޭނާގެ މައްޗަށް 13 އަންހެނަކު ތުހުމަތު ކުރުމުން އޭނާއާ ދެކޮޅަށް ފުލުހުންގެ ތަހުގީގެއް ފެށިއެވެ.

މެންޑީ އެންމެ ފަހުން 2021 ވަނަ އަހަރުގެ އޮގަސްޓް މަހު ޓޮޓެންހަމް ހޮޓްސްޕާސްއާ ދެކޮޅަށް ސިޓީއަށް ކުޅުނު އިރު، އެ މަހުގެ ފަހުކޮޅު އޭނާ ހައްޔަރުކުރުމުން ޕްރިމިއާ ލީގުގެ ކުލަބުން ވަނީ އޭނާ ސަސްޕެންޑް ކޮށްފައެވެ. ސިޓީން އޭނާ ދޫކޮށްލީ މިދިޔަ މަހު އޭނާގެ އެއްބަސްވުން ހަމަވުމުންނެވެ.

ފްރާންސްގެ އިންޓަނޭޝަނަލް ކުޅުންތެރިޔާ 2017 ވަނަ އަހަރު ފްރާންސް ލީގު ޓީމެއް ކަމަށްވާ އޭއެސް މޮނާކޯއިން ސިޓީއަށް ސޮއިކުރީ ގާތްގަނޑަކަށް 52 މިލިއަން ޕައުންޑުގެ ފީއަކަށެވެ.