ދުނިޔޭގެ 735 މިލިއަން މީހުން އަންނަނީ ބަނޑުހައިހޫނުކަން އިހުސާސްކުރަމުން: އދ

މުޅި ދުނިޔޭގެ 735 މިލިއަން މީހުން 2022 ވަނަ އަހަރު އިންތިހާ ދަރަޖައިގެ ބަނޑުހައިހޫނުކަން ތަހައްމަލުކޮށްފައިވާކަމަށް އދ ން ބުނެފިއެވެ.

މިއީ ކޮވިޑް-19ގެ އާލަމީ ވަބާ ކުރިމަތިވުމުގެ ކުރީގެ އަދަދަށްވުރެ މަތީ އަދަދެއްކަމަށާއި މިއާއެކު 2030 ވަނަ އަހަރު އަންނަންވާއިރަށް ބަނޑުހައިހޫނުކަން ދުނިޔެއިން ނައްތާލުމަށް ކަނޑައަޅާފައިވާ ލަނޑުދަނޑި ހާސިލުކުރުމަށް ގޮންޖެހުންތައް ކުރިމަތިވާނެކަމަށް އދ ން ބުނެއެވެ. ކޮވިޑް-19 ޕެންޑަމިކުން އަރައިގަނެ ގައުމުތަކުގެ އިގްތިޞާދު ރަނގަޅު ހާލަތަކަށް މިދިޔަ އަހަރު އައި ނަމަވެސް ރަޝިޔާ ޔޫކްރެއިން ހަނގުރާމައިގެ ސަބަބުން ކާނާ އާއި ހަކަތައިގެ އަގު މައްޗަށް ގޮސްފައިވާކަމަށް އދ ގެ ފުޑް ސެކިޔުރިޓީ އެންޑް ނިއުޓްރިޝަންގެ ދުނިޔޭގެ ހާލަތާއި ގުޅޭ ރިޕޯޓްގައި ބުނެފައިވެއެވެ.

Advertisement

އޭގެ ނަތީޖާއަކީ 2019 ވަނަ އަހަރަށްވުރެ 2022 ވަނަ އަހަރު އިތުރު 122 މިލިއަން މީހުން އިންތިހާ ދަރަޖައިގެ ބަނޑު ހައި ހޫނުކަން ތަހައްމަލުކުރުންކަމަށް އދ ގެ ރިޕޯޓްގައި ބުނެފައިވެއެވެ. މިއާއެކު 2030 ވަނަ އަހަރު އަންނަންވާއިރަށް ދުނިޔެއިން ބަނޑު ހައި ހޫނުކަން ނައްތާލުމަށް ކަނޑައަޅާފައިވާ ލަނޑުދަނޑި ފަހަތަށް ޖެހި 2030 ވަނަ އަހަރު އިތުރު 600 މިލިއަން މީހުންނަށް އެކަށީގެންވާ މިންވަރަށް ކާނާ ނުލިބި ދާނެކަމަށް ވަނީ ލަފާކޮށްފައެވެ.

ރިޕޯޓްގައި ބުނެފައިވަނީ ބަނޑުހައިހޫނުކަން އިތުރުވެފައިވަނީ މޫސުމީ ބަދަލުތަކާއެކު ކާބޯތަކެތި އުފެއްދުމަށް ކުރިމަތިވަމުން އަންނަ ހުރަސްތަކާއި ކޮވިޑް-19 ޕެންޑަމިކާއެކު ކުރިމަތިވެފައިވާ އިގްތިޞާދީ ދަތިކަމެވެ.

ދުނިޔޭގެ ބައެއް ހިސާބުތަކުގައި ބަނޑުހައިހޫނުކަން ތަހައްމަލުކުރާ މީހުންގެ އަދަދު ދަށަށްގޮސްފައިވެއެވެ. އޭގެތެރޭގައި ދެކުނު އެމެރިކާ އާއި އޭޝިޔާގެ ބައެއް ގައުމުތައް ހިމެނެއެވެ. ނަމަވެސް ކެރީބިއަން، ހުޅަނގު އޭޝިޔާ އަދި އެފްރިކާގައި އަންނަނީ ބަނޑުހައިހޫނުކަން ތަހައްމަލުކުރާ މީހުންގެ އަދަދު އިތުރުވަމުންނެވެ.

ދުނިޔޭގެ ފުޑް އެންޑް އެގްރިކަލްޗަރ އޯގަނައިޒޭޝަނުން ހާމަކޮށްފައިވާ ގޮތުގައި މިދިޔަ އަހަރު އެފްރިކާގައި ބަނޑުހައިހޫނުކަން ތަހައްމަލުކުރި މީހުންގެ އަދަދު ވަނީ ކޮވިޑް ޕެންޑަމިކުގެ ކުރިއާ އަޅާބަލާއިރު 19.7 އިންސައްތަ އިތުރުވެފައެވެ. އަދި މިއަދަދު އޯޝޭނިއާގައި ވަނީ 7 އިންސައްތަ އިތުރުވެފައެވެ.