72 ކިލޯ ޑްރަގް މައްސަލަ: ވަކި މީހަކަށް އަދަބުދޭން މަސައްކަތް ކުރާ ކަމުގެ ތުހުމަތު
ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އިބްރާހިމް އިޙްސާން
މި މައްސަލައިގައި އެންމެ އިސްކޮށް ހުރި ކަމަށް ދައުލަތުން ތުހުމަތު ކުރާ އިރުފާން ތަގިއްޔު
72 ކިލޯ މަސްތުވާތަކެތި ދިވެހިރާއްޖެއަށް އެތެރެކޮށް އެތަކެތި ޓްރެފިކްކުރަން އުޅުނު މައްސަލައިގައި އެންމެ އިސްކޮށް ހުރި ކަމަށް ތުހުމަތު ކުރާ އިރުފާން ތަގިއްޔުގެ މައްޗަށް އުފުލާފައިވާ، ޑައިމޯފިން ޓްރެފިކް ކުރުމުގެ ދައުވާގެ އަޑުއެހުމެއް އާދިއްތަ ދުވަހު ކްެރިމިނަލް ކޯޓުގައި ކުރިއަށް ގެންގޮސްފިއެވެ.
މި އަޑުއެހުމުގައި އޮތީ މި މައްސަލައިގެ ޝަރީއަތް ފަށައި އިފްތިތާޙީ ބަޔާން އިއްވުމެވެ.
އޭނާގެ މައްޗަށް ދައުލަތުން އުފުލާފައިވަނީ ޑައިމޯފިން ޓްރެފިކް ކުރުމުގެ ކުށުގެ ދައުވާއެވެ.
މި އަޑުއެހުމުގައި ދައުލަތާއި ދިފާއުންވެސް ވަނީ އިފްތިތާޙީ ބަޔާން އިއްވާފައެވެ. އެގޮތުން ދިފާއުން ވަނީ މި މައްސަލައިގެ ތަހުގީގު ކުރިއަށް ގެންގޮސްފައިވަނީ އިންސާފުވެރިކޮށް ނޫންކަމަށް ބުނެފައެވެ.
އޭގެ އިތުރުން، ފަހުން މި މައްސަލައިގެ ދައުވާލިބޭ ގިނަ ބައެއްގެ މައްޗަށް ކުރި ދައުވާ ކުއްލިގޮތަކަށް އަނބުރާ ގެންގޮސްފައިވާ ގޮތާމެދުވެސް ދިފާއީ ވަކީލު ވަނީ ފާޑުވިދާޅުވެފައެވެ. އެގޮތުން މި މުޅި މައްސަލައިގައި އިރުފާން ތަޤިއްޔުއަށް ހަރުކަށި އަދަބު ދިނުމަށް ޕްރޮސެކިއުޓަރ ޖެނެރަލް އޮފީހުން އަމާޒު ހިފާފައިވާކަމަށް ދިފާއީ ވަކީލު ވިދާޅުވިއެވެ.
މި މައްސަލައިގައި ޑައިމޯފިން ޓްރެފިކް ކުރުމުގެ ދައުވާ ދައުލަތުން 10 މީހެއްގެ މައްޗަށް އުފުލިއެވެ. ނަމަވެސް އޭގެ ތެރެއިން 7 މީހަކަށް ކުރާ ޓްރެފިކިންގ ދައުވާ ފަހުން ދައުލަތުން ވަނީ އަނބުރާ ގެންގޮސްފައެވެ. އޭރު ދައުވާ ހުށައެޅިތާ އަހަރަކަށްވުރެ ގިނަ ދުވަސް ވަނީ ވެފައެވެ.
މިހާރު މި މައްސަލައިގައި ދައުވާ އުފުލާފައިވަނީ ޢިރުފާން ތަގިއްޔުއާއި، މުހައްމަދު އަކްރަމްގެ އިތުރުން، އަހުމަދު ނަސީރުގެ މައްޗަށެވެ. ދައުލަތުން ބުނާ ގޮތުގައި މަސްތުވާތަކެތި އުުފުލާފައިވާ ކާރަކީ އަކްރަމްގެ ހިޔާޒަތުގެ ދަށުގައިވާ ކާރެކެވެ. އަދި މަސްތުވާތަކެތި ގެނައި ލޯންޗަކީ ނަސީރު ދުއްވި ލޯންޗެއްކަމަށް ދައުލަތުން ބުނެއެވެ.
މިއީ ގިނަ ބައެއްގެ މައްޗަށް ދައުވާ އުފުލާފައިވާ މައްސަލައަކަށްވާއިރު، މި މައްސަލައިގެ ހެކިބަސް ނެގުމުގެ މަރުޙަލާ ކުރިއަށް ގެންދަވާނީ ދައުވާލިބޭ އެންމެންގެ ބައި އެއްކޮށްކަމަށް ގާޒީ ވިދާޅުވިއެވެ.
މި މައްސަލައިގައި ދައުލަތުން 65 ޝަފަހީ ހެކިން ހުށައަޅާފައިވެއެވެ.
ދައުލަތުގެ ވަކީލު ވިދާޅުވީ، ދައުލަތުން ހުށައަޅާފައިވާ ކަންކަން ސާބިތު ކުރުމަށް ކާފީ ހެކި ލިބޭ މިންވަރަކަށް ބަލައި ހެކިން އަނބުރާ ގެންދަން ޖެހޭނަމަ ގެންދަވާނެ ކަމަށެވެ.
ގާޒީ ވިދާޅުވީ، އޮގަސްޓު މަހުގެ ފުރަތަމަ ހަފްތާގައި މި މައްސަލައިގެ ހެކިބަސް ނެގުން ކުރިއަށް ގެންދަވާނެ ކަމަށެވެ.
ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އިބްރާހިމް އިޙްސާންއެވެ.
