72 ކިލޯ މަސްތުވާތަކެތި ދިވެހިރާއްޖެއަށް އެތެރެކޮށް އެތަކެތި ޓްރެފިކްކުރަން އުޅުނު މައްސަލައިގައި އެންމެ އިސްކޮށް ހުރި ކަމަށް ތުހުމަތު ކުރާ އިރުފާން ތަގިއްޔުގެ މައްޗަށް އުފުލާފައިވާ، ޑައިމޯފިން ޓްރެފިކް ކުރުމުގެ ދައުވާގެ އަޑުއެހުމެއް ބުރާސްފަތި ދުވަހު ކްެރިމިނަލް ކޯޓުގައި ކުރިއަށް ގެންގޮސްފިއެވެ.

މި މައްސަލައިގައި އެންމެ ފަހުން އަޑުއެހުމެއް ބާއްވާފައިވަނީ 24 މެއި 2023 ގައެވެ.

ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އިބްރާހިމް އިޙްސާންއެވެ.

ބުރާސްފަތި ދުވަހުގެ އަޑުއެހުމުގައި އޮތީ ދިފާއުގެ ހުށައެޅުންތަކަށް ގޮތް ނިންމެވުމެވެ.

ދިފާއުގެ ފުރަތަމަ ހުށައެޅުމުގައި ދައުލަތުން ހުށައަޅާފައިވާ 106 ހެއްކެއް ޝަރީއަތަށް ބަލައިނުގަތުމަށް އެދިފައިވެއެވެ.

ގާޒީ ވިދާޅުވީ، ދައުވާ ސާބިތު ކުރުމަށް ދައުލަތުން ހުށައަޅާފައިވާ 106 ހެކި ބަލައިނުގަތުމަށް ދިފާއުން އެދިފައިވަނީ އެއީ ގުޅުން ނެތް ހެކިކަމަށް ބަޔާންކޮށް ކަމަށެވެ. އޭގެ ތެރޭގައި ޝަފަހީ އަދި ކިތާބީ ހެކި ހިމެނެއެވެ.

ގާޒީ ވިދާޅުވީ، އެއީ ގުޅުން ނެތް ހެކިކަމަށް ދިފާއުން ބުނި ނަމަވެސް، އެ ހެކިތަކަކީ މި މައްސަލައަކީ ރާވައިގެން ހިންގާފައިވާ ކުށުގެ މައްސަލައެއްކަމަށް ބުނެ ދައުލަތުން ހުށައަޅާފައިވާ ކަންކަން ސާބިތު ކުރުމަށް މުހިންމު ހެކިތަކަކަށް ވެދާނެ ކަމަށެވެ. ވުމާއެކު ގާޒީ ވަނީ ދިފާއުގެ އެ ހުށައެޅުން ބަލައިނުގަތުމަށް ނިންމަވާފައެވެ.  

ދެވަނަ ހުށައެޅުމަކީ ހެކި ހާމަކޮށްދިނުން އެދި ހުށައަޅާފައިވާ ހުށައެޅުމެކެވެ. އެއީ ކޯލް ޑީޓެއިލް ޗާޓެއްގެ އިތުރުން ދެ އިންޓެލިޖެންސް ރިޕޯޓެއް ހާމަކޮށްދިނުން އެދި ހުށައަޅާފައިވާ ހުށައެޅުމެކެވެ.

ގާޒީ ވިދާޅުވީ، އެ ހެކިތައް މި މައްސަލަ ހުށައެޅުނުއިރުވެސް ހުށައަޅާފައިވަނީ ސިއްރު ލިއުމެއްގެ ގޮތުގައި ކަމަށާއި، އެ ހެކިތަކާ ގުޅޭގޮތުން ހެކި ރައްކާތެރި ކުރުމުގެ ވަގުތީ އަމުރެއް ނެރެފައިވާ ކަމަށެވެ.

އެހެންނަމަވެސް ހެކި ރައްކާތެރި ކުރުމުގެ ދާއިމީ އަމުރެއް ނެރެދިނުމަށް ދައުލަތުން ފަހުން އެދިފައިނުވާކަން ފާހަގަ ކުރައްވައި ގާޒީ ވަނީ ދިފާއުގެ އެ ހުށައެޅުން ބަލައިގަތުމަށް ނިންމަވާފައެވެ.

ތިންވަނަ ހުށައެޅުމަކީ ދައުވާއާއެކު ކޯޓަށް ހުށައެޅިފައިނުވާ ލިއުންތައް ބަލައިނުގަތުމަށް އެދި ހުށައެޅި ހުށައެޅުމެކެވެ. އެ ހުށައެޅުން ޝަރީއަތުން ބަލައިގެންފައެއް ނުވެއެވެ.

ގާޒީ ވަނީ މިއީ މައުޟޫއީ ގޮތުން ކުރިއަށް ގެންދެވޭނެ މައްސަލައެއްކަމަށް ކަނޑައަޅުއްވާފައެވެ.

ދެން އޮންނާނީ މި މައްސަލައިގެ ޝަރީއަތް ފަށައި އިފްތިތާޙީ ބަޔާން އިއްވުމާއި އެއަށްފަހު ހެކިންގެ ހެކިބަސް ނެގުމެވެ.

މި މައްސަލައިގައި ދެން ދައުވާ އުފުލާފައިވާ ފަރާތްތަކުގެ ބައިގައި މިހާރު ވަނީ ޝަރީއަތް ފަށައި އިފްތިތާޙީ ބަޔާން އިއްވާފައެވެ.

މިއީ ގިނަ ބައެއްގެ މައްޗަށް ދައުވާ އުފުލާފައިވާ މައްސަލައަކަށްވާއިރު، މި މައްސަލައިގެ ހެކިބަސް ނެގުމުގެ މަރުޙަލާ ކުރިއަށް ގެންދަވާނީ ދައުވާލިބޭ އެންމެންގެ ބައި އެއްކޮށްކަމަށް ގާޒީ ވިދާޅުވިއެވެ.

މި މައްސަލައިގައި ޑައިމޯފިން ޓްރެފިކް ކުރުމުގެ ދައުވާ ދައުލަތުން 10 މީހެއްގެ މައްޗަށް އުފުލިއެވެ. ނަމަވެސް އޭގެ ތެރެއިން 7  މީހަކަށް ކުރާ ޓްރެފިކިންގ ދައުވާ ފަހުން ދައުލަތުން ވަނީ އަނބުރާ ގެންގޮސްފައެވެ.

މިހާރު މި މައްސަލައިގައި ދައުވާ އުފުލާފައިވަނީ ޢިރުފާން ތަގިއްޔުއާއި، މުހައްމަދު އަކްރަމްގެ އިތުރުން، އަހުމަދު ނަސީރުގެ މައްޗަށެވެ.