ސާފް ޗެމްޕިއަންޝިޕް ފުޓްބޯޅަ މުބާރާތުގެ އެންމެ މޮޅު ކުޅުންތެރިޔާގެ މަގާމާއި މުބާރާތުގެ އެންމެ ގިނަ ގޯލު ޖަހާ ކުޅުންތެރިޔާއަށްދޭ ރަންބޫޓު އިންޑިޔާގެ ކެޕްޓަން ސުނިލް ޗެތްރީ ހޯދައިފި އެވެ.

މި ދެ މަގާމަކީ މީގެ ދެ އަހަރު ކުރިން ރާއްޖޭގައި ބޭއްވި މުބާރާތުގައި ވެސް ޗެތްރީ ހާސިލްކޮށްފައިވާ ދެ މަގާމެވެ.

އަދި މިއީ ސަރަހައްދީ އެންމެ ބޮޑު ފުޓްބޯޅަ މުބާރާތުގެ މޮޅު ކުޅުންތެރިޔާގެ މަގާމު ޗެތްރީ ހޯދި ހަތަރު ވަނަ ފަހަރެވެ. އުމުރުން 38 އަހަރުގެ ފޯވަޑަކީ މި މުބާރާތުގެ އެންމެ ގިނަ ގޯލު ޖަހައިގެން ރަންބޫޓު ހޯދި ކުޅުންތެރިޔާ ވެސްމެއެވެ. މި މުބާރާތުގައި އޭނާ ޖެހި ފަސް ގޯލުގެ ތެރެއިން ތިން ގޯލު ޖެހީ ޕާކިސްތާން ކޮޅަށެވެ. އަނެއް ދެ ގޯލު ޖެހީ ގްރޫޕް ސްޓޭޖުގައި ލެބަނަން އާއި ނޭޕާލް ކޮޅަށެވެ. މި ފަހަރު ރަންބޫޓު ހޯދުމުގެ ކުރިން ޗެތްރީ ވަނީ މި މުބާރާތުގެ ރަންބޫޓު މީގެ ކުރިން ދެ ފަހަރަކު ހޯދައިފަ އެވެ.

އަށް ޓީމު ވާދަކުރި މުބާރާތުގެ އެންމެ މޮޅު ގޯލްކީޕަރަކަށް ހޮވުނީ ސެމީ ފައިނަލްގައި ކުވޭތު އަތުން ބަލިވި ބަނގްލަދޭޝްގެ ކީޕަރު އަނީސުއްރަހުމާނެވެ. މުބާރާތުގެ ފެއާޕްލޭ ޓީމަކީ ނޭޕާލެވެ.

މުބާރާތުގެ ރަނައަޕް ޓީމަށް އިނާމް ފައިސާގެ ގޮތުގައި ދީފައިވަނީ 25000 އެމެރިކާ ޑޮލަރެވެ. އަދި ޗެމްޕިއަން ޓީމަށް ދީފައިވަނީ 50000 އެމެރިކާ ޑޮލަރެވެ.