މާލެ ލީގުގެ ގަދަ ހަތަރަކުން ޖާގަ ހޯދުމަށް ޓިސީއަށް އޮތީ ހަނި ފުރުސަތެއް ނޫން ކަމަށާއި، ހުރިހާ ޓީމަކަށް ވެސް އޮތީ ހަމަހަމަ ފުރުސަތެއް ކަމަށް ޓީސީގެ ކޯޗް އަހުމަދު ނިޒާމް (ނިޒާމްބެ) ބުނެފިއެވެ.

މާލެ ލީގުގައި ހުކުރު ދުވަހު ހަވީރު ޔުނައިޓެޑް ވިކްޓްރީއާ ދެކޮޅަށް ކުޅޭ މެޗުގެ ކުރިން އެފްއޭއެމް ހައުސްގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަމުން ނިޒާމްބެ ބުނެފައި ވަނީ، ޓީސީ އަދިވެސް ގަދަ ހަތަރަކަށް ވަނުމަށް އޮތް ޖާގަ ހަނި ނޫން ކަމަށާއި، ގަދަ ހަތަރަކަށް ވަންނަން މަސައްކަތް ޖުރާ ކޮންމެ ޓީމަކަށް ވެސް އޮތީ ހަމަހަމަ ފުރުސަތެއް ކަމަށެވެ. އެގޮތުން ނިޒާމްބެ ބުނީ، ޓީސީއިން އަމާޒުހިފާފައިވަނީ ބާކީ އޮތް ދެ މެޗު ވެސް ކާމިޔާބުކޮށް 22 ޕޮއިންޓް ހޯދައިގެން ޕްރެމިއާ ލީގުން ޖާގައެއް ކަށަވަރު ކުރަން ކަމަށެވެ.

މެޗާ ގުޅޭ ގޮތުން ވާހަކަ ދައްކަމުން ނިޒާމްބެ ބުނީ، ޔުނައިޓެޑް ވިކްޓްރީއަކީ ވެސް ފަސޭހަ ޓީމެއް ނޫން ކަމަށާއި، އެހެންކަމުން މެޗު ފަސޭހަކޮށްލުމުގެ ފުރުސަތެއް ނެތް ކަމަށެވެ.

ނިޒާމްބެ ބުނީ ޔޫވީ އަށް ގަދަ ހަތަރަކަށް ވަނުމުގެ ފުރުސަތު ގެއްލިފައި އޮތް ނަމަވެސް އެޓީމުން ޓީސީއާ ދެކޮޅަށް ނިކުންނައިރު ތިން ޕޮއިންޓަށް އަމާޒު ހިފައިގެން ނިކުމެއްޖެ ނަމަ މެޗު ވެގެންދާނީ ވަރުގަދަ ޗެލެންޖަކަށް ކަމަށެވެ. އެހެންކަމުން ޓީސީ އިން މެޗަށް ނިކުންނާނީ ފާއިތުވި ދެ މެޗުގައި ވެސް ޓީސީއަށް ދިމާވި މައްސަލަތައް ބަލައި، އެކަންތައްތައް ހައްލު ކޮށްގެން ކަމަށް ވެސް ނިޒާމްބެ ވަނީ ބުނެފައެވެ.

އިތުރަށް ވާހަކަ ދައްކަމުން ނިޒާމްބެ ބުނީ، މިސީޒަނުގައި ޓީސީއަށް ދިމާވެފައިވާ މައްސަލައަކީ ރަނގަޅު ފޯމެއްގައި ޓީމު އޮށްވައި ދިގު ބްރޭކެއް އައުމުން ދިމާވި މައްސަލައެއް ކަމަށާއި، ކުޅުމަށް ބަލާއިރު އެޓޭކްތައް ވެސް ރަނގަޅު ކަމަށެވެ. ނިޒާމްބެ ބުނީ ޓްރާންސްފާގައި ޓީމު ވަރުގަދަ ކުރުމަށް ވެސް މަސައްކަތް ކުރަމުން އަންނަ ކަމަށާއި، އެގޮތުން ޒުވާން ހުނަރުވެރި ކުޅުންތެރިންނާއި އަދި މީގެ އިތުރަށް ދެ ބިދޭސީ ކުޅުންތެރިއަކު ވެސް ޓީމާ ގުޅިފައި ވާކަމަށެވެ.

ލީގުގެ ގަދަ ހަތަރަކަށް ވަނުމަށް ޓީސީއިން ބުރަކޮށް މަސައްކަތް ކުރަމުން އަންނައިރު މިހާތަނަށް ލީގުގައި ކުޅުނު 12 މެޗުން އެޓީމަށް ލިބިފައިވަނީ 16 ޕޮއިންޓެވެ. އެޓީމު އޮތީ ތާވަލުގެ ހަ ވަނަ މަގާމުގައެވެ. ލީގުގައި ޔުނައިޓެޑް ވިކްޓްރީއަށް ކުޅުނު 12 މެޗުން އެންމެ ތިން ޕޮއިންޓް ލިބިފައި ވާއިރު އެޓީމު އޮތީ އެންމެ ފުލުގައެވެ.