ރަބިއޮޓް ޔުވެންޓަސްއާއެކު ހަދާފައިވާ އެއްބަސްވުން އެއް އަހަރު ދުވަހަށް އިތުރުކޮށްފި

ފްރާންސްގެ މިޑްފީލްޑަރު އެޑްރިއަން ރަބިއޮޓް ޔުވެންޓަސްއާ އެކު ހަދާފައިވާ އެއްބަސްވުން އެއް އަހަރު ދުވަހަށް އިތުރުކޮށްފިއެވެ.

އުމުރުން 28 އަހަރުގެ މިޑްފީލްޑަރު މި އަހަރުގެ ހޫނު މޫސުމުގައި ކޮންޓްރެކްޓް ހަމަވެ ޓީމު ދޫކޮށްލަން އުޅުނު އިރު، އޭނާ ހޯދުމަށް މެންޗެސްޓާ ޔުނައިޓެޑުން ދިޔައީ މަސައްކަތް ކުރަމުންނެވެ.

ޕެރިސް ސެއިންޓް ޖާމަން (ޕީއެސްޖީ) ދޫކޮށް 2019 ވަނަ އަހަރުގެ ހޫނު މޫސުމުގައި ޔުވެންޓަސްއާ ގުޅުނު ރަބިއޮޓް ވަނީ އެ ކްލަބަށް 177 މެޗު ކުޅެދީ 17 ލަނޑު ޖަހައިދީފައެވެ. އޭނާ ވަނީ އެ ޓީމަށް 2019-20 ވަނަ އަހަރުގެ އިޓާލިއަން ލީގުގެ ޗެމްޕިއަންކަން ހޯދައިދިނުމަށް އެހީތެރިވެދީފައެވެ.

ޔުވެންޓަސްގައި ހޭދަކުރި މުއްދަތުގައި ކޮޕާ އިޓާލިއާ އާއި ސުޕަކޮޕާ ވެސް ކާމިޔާބުކޮށްފައިވާ ރަބިއޮޓް ވަނީ މިދިޔަ ސީޒަނުގައި އެ ޓީމަށް 11 ލަނޑު ޖަހައި 6 ލަނޑު އެސިސްޓް ކޮށްފައެވެ.

ރަބިއޮޓް ވަނީ 2022 ވަނަ އަހަރުގެ ވޯލްޑް ކަޕްގެ ފައިނަލަށް ފްރާންސް ގެންގޮސްދިނުމަށް ވެސް އެހީތެރިވެދީފައެވެ.