ގްރޫޕް ސްޓޭޖްގައި ގްލޯރިއަސް ވިކްޓްރީ ކުޅުނު ފަހު މެޗުގައި ބޮޑު މޮޅެއް ހޯދައިގެން ކެންދޫ ފުޓްބޯލް ޗެލެންޖްގެ ސެމީފައިނަލްގެ ޖާގަ ޔަގީންކޮށްފިއެވެ.

ހަތަރު ޓީމް ހިމެނޭ ގްރޫޕްގައި ގްލޯރިއަސް ވިކްޓްރީ ސެމީގެ ޖާގަ ކަށަވަރުކުރީ 9-0ން އެފްސީ ރައިވަލްސް ބަލިކޮށްގެންނެވެ. މިނަތީޖާއާއެކު ރައިވަލްސް ވަނީ މުބާރާތުން ކަޓާފައެވެ. ގްރޫޕް ސްޓޭޖްގައި އެޓީމް ކުޅުނު ތިން މެޗުންވެސްވީ ބައްޔެވެ. ގްލޯރިއަސް ވަނީ ތިން މެޗުގެ ތެރެއިން ދެ މެޗުން މޮޅުވެ, އެއް މެޗު އެއްވަރުކޮށް 7 ޕޮއިންޓް ހޯދާފައެވެ.

ރައިވަލްސްއާ ވާދަކުރި މެޗުގައި ގްލޯރިއަސްއިން މެޗުގެ ފުރަތަމަ ހާފްގައިވެސް ހަތް ލަނޑު ޖެހިއެވެ. އެޓީމްގެ ނުވަ ލަނޑުގެ ތެރެއިން ހަތަރު ލަނޑު ޖެހީ މެޗުގެ މޮޅު ކުޅުންތެރިޔާ ޝާފިއު ހަމީދެވެ. ރަޝާދު އަބްދުލް މަތީނާއި ރަޝާފް މުހައްމަދު, ކޮންމެ ކުޅުންތެރިއަކު ދެ ލަނޑު ޖެހިއެވެ. އެޓީމަށް ދެން ލަނޑު ޖަހައިދިނީ މުހައްމަދު ޝިމާނެވެ.

މުބާރާތުގެ ގްރޫޕް ބީން ސެމީފައިނަލް ޔަގީންކޮށްފައިވަނީ ޑައިމަންޑެވެ. ޑައިމަންޑް ވަނީ ތިން ޓީމް ހިމެނޭ ގްރޫޕްގައި ކުޅުނު ދެ މެޗުން ހަތަރު ޕޮއިންޓް ހޯދާފައެވެ. ވެންގާޑްވެސް އެއަދަދަށް ޕޮއިންޓް ހޯދިނަމަވެސް ފައިދާ ގޯލުން ކުރިލިބެނީ ޑައިމަންޑަށެވެ. ވެންގާޑަށް ސެމީގެ ޖާގަ ހޯދަން ޖެހޭނީ ގްރޫޕް އޭއިން ތިންވަނަ ހޯދާ ޓީމާ ޕްލޭއޮފް މެޗެއް ކުޅޭށެވެ. ގްރޫޕް އޭގެ ސެމީގެ ދެވަނަ ޖާގައާއި ޕްލޭއޮފްގެ ފުރުސަތު ލިބޭ ޓީމެއް ޔަގީންވާނީ ހޮނިހިރު ދުވަހުގެ މެޗަށްފަހުއެވެ.