މޯލްޑިވިއަންގެ ދަތުރުތައް 4 އަހަރަށްފަހު ދަރަވަންދޫއަށް!

ދިވެހިރާއްޖޭގެ ގައުމީ އެއަރލައިން މޯލްޑިވިއަންއިން 4 އަހަރު ފަހުން ބ. ދަރަވަންދޫއަށް ދަތުރުތައް ބާއްވަން ފަށައިފިއެވެ.

އެ އެއަރލައިންގެ ދަތުރުތައް ދަރަވަންދޫއަށް ފެށީ ބުރާސްފަތި ދުވަހު ދަރަވަންދޫ ޑޮމެސްޓިކް އެއަރޕޯޓުގައި ބޭއްވި ރަސްމިއްޔާތަކުންނެވެ.

މޯލްޑިވިއަނުން ބުނީ ކޮންމެ ދުވަހަކުވެސް މާލެއިން ދަރަވަންދޫއަށް އަދި ދަރަވަންދޫއިން މާލެއަށް ދަތުރުތައް ބާއްވާނެ ކަމަށެވެ.

މޯލްޑިވިއަންއިން ދަރަވަންދޫއަށް ދަތުރުތައް ފަށާފައިވާއިރު ދަރަވަންދޫއަށް ދިއުމަށް ކޮޅަކަށް ނަގަނީ 849 ރުފިޔާއެވެ. މޯލްޑިވިއަންގެ ވެބްސައިޓް، މޯބައިލް އެޕް، ކޯލް ސެންޓަރ އަދި ޓިކެޓް ވިއްކަން ހުއްދަ ދީފައިވާ ފަރާތްތަކަށް މެދުވެރިކޮށް ޓިކެޓް ގަނެވޭނެ ކަމަށް މޯލްޑިވިއަނުން ބުނެއެވެ.

މޯލްޑިވިއަންއިން ދަރަވަންދޫއަށް ދަތުރުކުރުން މެދުކަނޑާލީ 2019 ވަނަ އަހަރުއެވެ.

މޯލްޑިވިއަނުން ދަނީ ރާއްޖޭގެ 16 މަންޒިލަކަށް އެ އެއަރލައިންގެ ދަތުރުތައް ކުރަމުންނެވެ.