ޕިއޭ-އެމެރިކް އޮބާމަޔަން ހޯދުމަށް ސައުދީ ޕްރޯ ލީގުގެ އަލް އަހްލީ އާއި އަލް ޝަބާބުން މަސައްކަތް ކުރަމުން އަންނަ ކަމަށް މީޑިއާތަކުން ބުނެފި އެވެ.

ބާސެލޯނާ ދޫކޮށް އޮބާމަޔަން ޗެލްސީ އަށް ބަދަލުވީ 2022 ވަނަ އަހަރު އެވެ. ދެ އަަހަރު ދުވަހަށް އެކުލަވާލި އެއްބަސްވުމުގެ މުއްދަތު ހަމަވާނީ އަންނަ އަހަރު އެވެ. އެއްބަސްވުމުގައި ބާކީ އެއް އަހަރު އޮތް ނަމަވެސް، އޮބާމަޔަން ބޭނުންވަނީ ޗެލްސީ ދޫކޮށްލުމަށެވެ. އެއީ އެ ކުލަބުގައި އޭނާ އަށް އެންމެ އެކަށީގެންވާ މިންވަރަށް ކުޅުމުގެ ފުރުސަތު ނުލިބޭތީ އެވެ. ނަމަވެސް ޗެލްސީ ދޫކޮށް އޮބާމަޔަން ދާނެ ވަކި ކުލަބެއް ހާމެވެފައި ނެތް ނަމަވެސް، މީޑިއާތަކުން ބުނާ ގޮތުގައި އޭނާ ބޭނުންވަނީ ޔޫރަޕުގެ ކުލަބަކަށް ބަދަލުވުމަށެވެ. އެގޮތުން މުސާރަ ކުޑަކޮށް ނަމަވެސް އޭނާ ބޭނުންވަނީ ކުރީގެ ކުލަބު ބާސެލޯނާ އަށް ބަދަލުވާން ކަމަށް ވަނީ ބުނެފަ އެވެ. އެހެން ނަމަވެސް ބާސެލޯނާ އިން އޭނާ އަލުން ގެންދިޔުމަކީ ދުރު ކަމެކެވެ.

އޭނާ ވަނީ އެމެރިކާ ލީގުގެ ލޮސް އެންޖަލަސް އިން މިދިޔަ ފެބްރުވަރީ މަހު ހުށަހެޅި ހުށަހެޅުން ވެސް ދޫކޮށްލައިފަ އެވެ. އޮބާމަޔަން ހޯދުމުގެ ސައުދީ ލީގުގެ އަލް އަހްލީ އާއި އަލް ޝަބާބުން ކުރަމުން އަންނަ މަސައްކަތަކީ އޭނާއާ މަޝްވަރާ ކުރުން ކަމަށާއި، ނަމަވެސް އޮބާމަޔަން ގޮތެއް ނުނިންމާ ކަމަށް ވަނީ ބުނެފަ އެވެ. ދެ ކުލަބުން ވެސް އޭނާ އަށް ބޮޑު މުސާރައެއް ދޭން އޮތީ ތައްޔާރަށް ކަމަށް ވަނީ ބުނެފަ އެވެ.

ޗެލްސީ އަށް އޮބާމަޔަން ކުޅެދިނީ 21 މެޗެވެ. އޭނާ އަށް ޖެހިފައި ވަނީ އެންމެ ތިން ލަނޑެވެ. އޭގެ ތެރެއިން 15 މެޗަކީ އިނގިރޭސި ޕްރިމިއާ ލީގުގައި އޭނާ ކުޅުނު މެޗެވެ.