"އަހަރުމެންނެއް ނޫން ވަޒީފާ ޚިޔާރު ކުރަނީ، ވަޒީފާ، އަހަރުމެން ޚިޔާރު ކުރަނީ"

މިހާރު ޢުމުރުން 51 އަހަރު ފުރިފައި ވާ ޞަބްޙީ މުސާޢިދު ނިސްބަތް ވަނީ، ފެހުމުގެ މަސައްކަތުގައި އެތައް ޖީލެއް ހޭދަ ކޮށްފައި ވާ މިޞްރު ޢާއިލާއަކަށެވެ. ޞަބްޙީގެ ޢާއިލާ ޚާއްޞަ ވަނީ މިޞްރުގެ ޘަޤާފީ ހެދުމެއް ކަމަށް ވާ ޖިއްލާބިޔާ ބަލާދީއޭ ކިއާ ވައްތަރުގެ ހެދުން ފެހުމުގެ މަސައްކަތަށެވެ. އެއީ ދިރިއުޅުމުގެ ކަންކަމަށް އާމްދަނީ ހޯދަންވެސް ކުރާ މަސައްކަތެވެ.

މިޞްރުގައި އާންމުކޮށް ޖިއްލާބިޔާ ލާ އުޅެނީ އައްސޭރިފަށުގެ ރަށްފުށު ހިސާބުތަކާއި، މިޞްރުގެ އުތުރުކޮޅާ ވީ ހިސާބުގަނޑަށް ނިސްބަތްވާ ފިރިހެނުންނެވެ. ޖިއްލާބިޔާއަކީ ގަޔަށް ދޫކޮށް، އަތް ދިގުކޮށް، ގިރުއާން ނާޅާ ހުންނަ ހެދުމެކެވެ.

ޢާއިލީ ވިޔަފާރީގެ ތެރެއަށް ޞަބްޙީ ވަނީ އޭނާގެ ޢުމުރުން އެންމެ 11 އަހަރުގައެވެ. އުފަން ވަޒަން ކަމަށް ވާ ޤީނާއިން، އައްސޭރިފަށުގެ ސިޓީއެއް ކަމަށްވާ އިސްކަންދަރިއްޔާއަށް އޭނާގެ ދިރިއުޅުން ބަދަލު ކުރީ މީގެ 14 ވަރަކަށް އަހަރު ކުރިންނެވެ. ޢާއިލީ މަސައްކަތް، ކުރިއަށް އޮތް ޖީލުތަކަށް ވާރުތަކޮށްދިނުމުގެ މަޤްޞަދުގައި، ޞަބްޙީ ވަނީ، އޭނާގެ 4 ދަރިންނަށްވެސް ޖިއްލާބިޔާގެ ފަންނުވެރިކަން ދަސްކޮށްދީފައެވެ.

ޖިއްލާބިޔާ ފެހުގެ ޢާއިލީ ވިޔަފާރިއާއި މަސައްކަތުގެ ތެރެއަށް ވަނުން،ޞަބްޙީގެ 26 އަހަރުގެ ފިރިހެން ދަރިފުޅު، ހާނީ މުސާޢިދަށް އެންމެ ފުރަތަމަ، މާ ފަސޭހަ ކަމަކަށް ނުވިއެވެ. ނަމަވެސް، މިޞްރުގެ ތަރިކަ ދެމެހެއްޓުމުގައި އޭނާގެ ޢާއިލާއިން އަދާ ކުރަމުންދާ މުހިންމު ދައުރުގެ އަގު ވަޒަން ކުރެވި، އެ މަސައްކަތާ ގުޅުނީއެވެ.

ޖިއްލާބިޔާ ފެހުމުގެ މަސައްކަތުގައި ހާނީގެ ޢުއްމީދުތައް ކިތަންމެހާވެސް ފޮންޏެވެ. އޭނާ ހުރީ، ޢާއިލީ ވިޔާފަރިއަކީ ނަން ހިނގާ ބްރޭންޑަކަށް ހެދުމުގެ ވަރުގަދަ ޢަޒުމުގައެވެ.

ޖިއްލާބިޔާއަކީ ނީލަ ކޯރު ސަރަޙައްދުގެ ޘަޤާފީ ތަރިކައެކޭވެސް ބުނެވިދާނެއެވެ. މިޞްރުގެ އިތުރުން ސޫދާންއާއި އެރިޓްރިއާ ފަދަ ޤައުމުތަކުގައި ޖިއްލާބިޔާއަކީ މަޤުބޫލު ހެދުމެކެވެ. ޖިއްލާބިޔާއަކީ އާންމުކޮށް ހުދު ފޭރާމުގައި ފަހާ އެއްޗަކަށް ވީ ނަމަވެސް، މިޞްރުގައި އެކި ކުލަކުލައިގެ ޖިއްލާބިޔާ ފަހާ އުޅެއެވެ. އަދި އެކި ފަރުމާތަކުން އެ ޖިއްލާބިޔާތައް ޒީނަތްތެރި ކުރާ އިރު، އަންހެނުންނަށް ޚާއްޞަ ޖިއްލާބިޔާތައްވެސް މިޞްރުގައި ހުރެއެވެ.