އެމްޑީޕީން އެދުނަސް އެކަނި އެއް މެންބަރަކަށް މާ ދިގުކޮށް ވާހަކަދައްކަން ފުރުސަތު ދެވޭކަށް ނެތް - ނަޝީދު
އެމްޑީޕީ އަށް ވަގުތު އޮތް ނަމަވެސް، 30 މިނިޓަށް ވާހަކަދައްކަން ފުރުސަތު ނުދެއްވާނެ ކަމަށް ނަޝީދު ވިދާޅުވި
މުހައްމަދު ނަޝީދު - ރައްޔިތުންގެ މަޖިލީހުގެ ރައީސް
އެމްޑީޕީން އެދުނު ނަމަވެސް ރައްޔިތުންގެ މަޖިލީހުގައި އެކަނި އެއް މެމްބަރަކަށް މާ ދިގުކޮށް ވާހަކަދައްކަވަން ފުރުސަތު ދެވެން ނެތް ކަމަށް މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
އޭނާ އެފަދައިން ވިދާޅުވީ ބުދަ ދުވަހުގެ ޖަލްސާގެ ރިޔާސަތުގައި އިންނަވާ ވާހަކަދައްކަވަމުންނެވެ.
ނަޝީދު ވަނީ މަޖިލީހުގައި އެމްޑީޕީގެ މެމްބަރުން މާ ދިގުކޮށް ބަހުސް ކުރައްވާ ކަމަށް ބުނެ ނުރުހުން ފާޅުކުރައްވާފައެވެ. އަދި އެއީ މަޖިލީހުގެ ނިޒާމާ ހިލާފު ކަމެއް ކަމަށް ވިދާޅުވެ، އެގޮތަށް ވަގުތު ނުދެއްވާނެ ކަމަށް ވަނީ ވިދާޅުވެފައެވެ.
މަޖިލީހަށް ހުށަހަޅާ މައްސަލަތަކަށް ބަހުސްކުރަނީ ފުރުސަތަށް އެދޭ މެމްބަރުންގެ ތަރުތީބަށް ބަލައިގެންނެވެ. އަންގާރަ ދުވަހު މަޖިލީހުގައި މަރަދޫ ދާއިރާގެ އެމްޑީޕީގެ މެމްބަރު އިބްރާހިމް ޝަރީފް ވަނީ ވަރަށް ދިގުކޮށް ވާހަކަދައްކަވާފައެވެ. އޭރު ރިޔާސަތުގައި އިންނެވީ ވިލުފުށި ދާއިރާގެ މެމްބަރު ހަސަން އަފީފްއެވެ.
އޭނާ ވިދާޅުވީ ޝަރީފަށް އެގޮތަށް ފުރުސަތު ދެއްވީ އެމްޑީޕީގެ ޕީޖީ ގުރޫޕުން އެ ޕާޓީގެ މެމްބަރަކު ވާހަކަ ދައްކަވާ ނިމެންދެން ބަހުސްކުރަން އެ ޕާޓީ އަށް ލިބޭ ވަގުތު ދިނުމަށް ނިންމެވުމުން ކަމަށެވެ. ނަމަވެސް ނަޝީދު ވަނީ މެމްބަރުންނަށް ފުރުސަތު ލިބޭނީ ވަކި ހަމައެއްގެ ތެރެއިން ކަމަށް ވިދާޅުވެފައެވެ.
ބުދަ ދުވަހުގެ ޖަލްސާގައި ދަނޑުވެރިންނަށް ދޫކުރި ދަނޑުވެރިންގެ ސަބްސިޑީ އަލުން އަނބުރާ އިޔާދަކޮށް ދިނުމަށް ހުށަހަޅާފައިވާ ގަރާރުގެ ބަހުސްގައި، އެމްޑީޕީ އަށް ނިސްބަތްވެވަޑައިގަންނަވާ ހުޅުމާލެ ދާއިރާގެ މެމްބަރު އަލީ ނިޔާޒް ވާހަކަަދައްކަވަނިކޮށް ނަޝީދު ވަނީ އޭނާގެ ވާހަކަ ހުއްޓުވާފައެވެ.
އެމްޑީޕީ އަށް ވަގުތު އޮތް ނަމަވެސް، 30 މިނިޓަށް ވާހަކަދައްކަން ފުރުސަތު ނުދެއްވާނެ ކަމަށް ނަޝީދު ވިދާޅުވިއެވެ.
މަޖިލީހުގެ ގަވައިދުގައި ބުނާ ގޮތުން، ބަހުސް ކުރަން ލިބޭ ހަތަރު ގަޑި އިރު ބަހާލާފައި ވަނީ އެ ވަގުތުގެ ހަތަރުބައިކުޅަ އެއްބައި ވަގުތު ބަހާފައި ވަނީ ރާ ސިޔާސީ ޕާޓީތަކަށާއި ވަކި ޕާޓީއަކަށް ނިސްބަތް ނުވާ މެމްބަރުންގެ މެދުގައި ހަމަހަމަކޮށެވެ.
