ރައީސަށް އެނގިވަޑައިގެން ނަޝީދަށް ހަމަލާދިނުމަށް ފުރުސަތު ނުދެއްވާނެކަން އެންމެ ރަނގަޅަށް އެނގިވަޑައިގަންނަވާނީ ނަޝީދަށް- މިއުވާން
އެއީ ސިޔާސީ ބޭނުމެއްގައި ދައްކާ ވާހަކަތައް ކަމަށް ސަރުކާރުން ބުނޭ
ރައީސް ސާލިހު އަދި ކުރީގެ ރައީސް ނަޝީދު
ރައީސް އިބްރާހީމް މުހައްމަދު ޞާލިހަށް އެނގިވަޑައިގެން މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދަށް ހަމަލާދިނުމަށް ފުރުސަތު ނުދެއްވާނެކަން އެންމެ ރަނގަޅަށް އެނގިވަޑައިގަންނަވާނީ ނަޝީދަށް ކަމަށް ސަރުކާރުން ބުނެފިއެވެ.
ރައީސް އޮފީހުގެ ތަރުޖަމާން މިއުވާން މުހައްމަދު އެފަދައިން ވިދާޅުވީ ބުދަ ދުވަހު މަޖިލީހުގައި ނަޝީދު ދެއްކެވި ބައެއް ވާހަކަތަކާއި ގުޅިގެން "ރާއްޖެ އެމްވީ" އިން ދެންނެވި ސުވާލަކަށް ޖަވާބުދެއްވަމުންނެވެ. ކެނެރީގޭގެ އިތުރުން މޭރީބްރައުންއާއި ޔާގޫތުގެ ކައިރީގައި ބޮމެއް ގޮއްވާލައިގެން އެ މަނިކުފާނު މަރާލަން އުޅޭކަމުގެ މައުލޫމާތު ސަރުކާރަށް އެނގިފައި އޮތް ކަމަށް ރައްޔިތުންގެ މަޖިލީހުގައި ބުދަ ދުވަހު ނަޝީދު ވިދާޅުވިއެވެ. ނަޝީދު އެފަދައިން ވިދާޅުވީ 2021 ވަނަ އަހަރު މޭއި 6ގައި އެމަނިކުފާނަަށް ދިން ހަމަލާ ދިނުމުގައި ސަރުކާރުގެ އިހުމާލު އޮތް ކަަމަށް މެންބަރުން ދެއްކެވި ވާހަކަތަކަށް ތާއީދުކުރައްވާ ދެއްކެވި ވާހަކަފުޅުގެ ތެރެއިންނެވެ.
ނަޝީދަށް ތާއީދުކުރާ މެންބަރުން ވަނީ އެ މައްސަލައިގައި ސަރުކާރުގެ އިހުމާލުން ކަމަށް ވިދާޅުވެ ސަރުކާރާއި ރައީސަށް ވަރަށް ބޮޑަށް ފާޑު ވިދާޅުވެފައެވެ. ނަޝީދު އެފަދައިން ވިދާޅުވެފައިވީނަމަވެސް ނަޝީދަށް ހަމަލާދޭން އުޅޭ ކަމުގެ މައުލޫމާތު ރައީސަށް ލިބިވަޑައިގަންނަވާފައި ނުވާ ކަމަށް މިއުވާން ވިދާޅުވިއެވެ. އަދި އެއީ ސިޔާސީ ބޭނުމެއްގައި ދައްކަވާ ވާހަކަތައް ކަމަށް ވެސް ވިދާޅުވިއެވެ.
އެ ހަމަލާއާ ގުޅިގެން މަޖިލީހުގެ 241 ކޮމިޓީ އިން ޚާއްސަ ރިޕޯޓެއް އެކުލަވާލިއެެވެ. އަދި އެ ރިޕޯޓްގައި ސެކިއުރިޓީ ބެލެހެއްޓުމުގައި ގެންގުޅޭ ފަރުވާކުޑަ ނިޒާމުތަކާއި، އަދި އިންޓެލިޖެންސް މައުލޫމާތު އެއްކުރުމުގައި އުފެދިފައިވާ ނިޒާމީ ބާގަނޑު އަދި މައުލޫމާތެއް ލިބުމަށްފަހު އެމްއެންޑީއެފްއިން އަމަލު ކުރާ ގޮތްތަކުގައި ހުރި ފުށު އެރުން ފަހަގަކޮށް އެކަންކަން އިސްލާހު ކުރުމަށް ލަފާ ދީފައި ވެއެވެ.
