ހިފެހެއްޓި ދެ ބާޖުގެ މައްސަލަ ހައްލުކުރަން ރާއްޖެއިން ޓީމެއް އެރިޓްރީއާއަށް ދިޔުމުގެ މަޝްވަރާތައް ކުރިއަށް
17 މެއި 2023 | ބުދަ 02:52ބާޖު ހިފަހައްޓާފައިވަނީ މިދިޔަ މަހުގެ 26 ވަނަ ދުވަހު
އެފްއެސްއެމްގެ ބާޖެއް
މިސްރުން ފުރައިގެން ރާއްޖެއަށް ދަތުރުކުރަމުންދަނިކޮށް އެފްރިކާގެ ގައުމެއްކަމުގައިވާ އެރިޓްރީއާއިން ހިފެހެއްޓި ފިއުލް ސަޕްލައި މޯލްޑިވްސް (އެފްއެސްއެމް) ގެ ދެ ބާޖުގެ މައްސަލަ ހައްލުކުރަން ރާއްޖެއިން ޓީމެއް އެރިޓްރީއާއަށް ދިޔުމުގެ މަޝްވަރާތައް ކުރިއަށްދާ ކަމަށް އެފްއެސްއެމް އިން ބުނެފިއެވެ.
ރާއްޖެއެމްވީއަށް އެފްއެސްއެމްގެ މެނޭޖިން ޑިރެކްޓަރު މުހައްމަދު ގަސަމް ވިދާޅުވީ ރާއްޖެއިން ޓީމެއް އެރިޓްރީއާއަށް ދިޔުމުގެ މަޝްވަރާތައް ފަށާފައިވާއިރު މި ޓީމުގައި ހިމެނެނީ އެސްޓީއޯ ވަކީލަކާއި އެފްއެސްއެމްގެ އިސްބޭފުޅެއްގެ އިތުރުން ފޮރިން ފޮރިން މިނިސްޓްރީގެ އިސްބޭފުޅެއް ކަމަށެވެ.
އެރިޓްރީއާއިން އެ ދެ ބާޖު ހިފަހައްޓާފައިވަނީ މިދިޔަ މަހުގެ 26 ވަނަ ދުވަހުއެވެ. އެ ދެ ބާޖު ހިފެހެއްޓިއިރު އޭގައި ހަތަރު ދިވެހިންނާއި ހަތަރު މިސްރުގެ ފަޅުވެރިން ތިބި ކަމަށް މައުލޫމާތު ލިބެއެވެ.
އެ ދެ ބާޖު ހިފެހެއްޓީ ހުއްދަ ނުހޯދާ އެރިޓްރީއާގައި ބަނދަރުކުރުމުންނެވެ. ގަސަމް ވިދާޅުވީ އެ ދުވަހު މޫސުން ވަރަށް ގޯސްވި ކަމަށާއި އެ ޕޯޓަށް ވަނުމުގެ ކުރިން ކަމާ ބެހޭ ފަރާތްތަކަށް ގުޅަން މަސައްކަތްވެސް ކުރި ކަމަށެވެ. އެހެންނަމަވެސް އެ ދެ ބާޖަށްވެސް އެ ޕޯޓާއި ގުޅޭ ގޮތް ނުވީ ކަމަށާއި އަދި އެތަނުން އެއް ބާޖުގެ ހުންގާނު ސިސްޓަމަށް މައްސަލައެއް ދިމާވެގެން އެ ބާޖު ދުއްވަމުން ގެންދިޔައީ މެނުއަލްކޮށް ކަމަށްވެސް ގަސަމް ވިދާޅުވިއެވެ.
ފަޅުވެރިންގެ ހާލު ރަނގަޅުކަން ފާހަގަކުރައްވާ ގަސަމް އިތުރަށް ވިދާޅުވީ ހުއްދަ ނުހޯދާ ބާޖުތައް ބަނދަރުކުރުމުން އެ ޤައުމުން މިހާރު ތަހުޤީޤު މަރުހަލާ ފަށާފައިވާ ކަމަށެވެ.
