"ލޯބިވެވިއްޖެ" ފިލްމް ބަލާލަން ބޮލީވުޑްގެ ބަތަލް އާފްތާބް ރާއްޖެ އަށް - "ހުރީ ވަރަށް އުންމީދުގައި"

ލޯބިވެވިއްޖެ ފިލްމް ބަލާލަން ބޮލީވުޑްގެ ބަތަލް  އާފްތާބް ޝިވްދަސާނީ ރާއްޖެ އަށް އައިސްފިއެވެ.

އާފްތާބް އެ ފިލްމް ބަލާލަންދާ ޝޯއަކީ ޚާއްސަ ސްކްރީނިން އެއްގެ ގޮތުގައި ކުރިއަށް ގެންދަން ލޯބިވެވިއްޖެގެ ޓީމުން ވަނީ ނިންމާފައެވެ. އެގޮތުން ލޯބިވެވިއްޖެގެ ޚާއްސަ ސްކްރީނިން ބޭއްވުމަށް ހަމަޖެހިފައި ވަނީ ވަރަށް ކުލަގަދަކޮށެވެ. މި މަހުގެ 16 ވަނަ ދުވަހު ބާއްވާ އެ އިވެންޓް ކުރިއަށް ގެންދަން ހަމަޖެހިފައި ވަނީ ރަތް ދޫލައިގައެވެ. އެ އިވެންޓް އޮންނާނީ 20:00ގައެވެ.

އޭނާ ރާއްޖެ އައިސްފައި ވަނީ ބުދަ ދުވަހު މެންދުރުގެ ވަގުތެއްގައެވެ.

ރާއްޖެ އައުމަށް ފަހު މީޑިއާ އާއި ވާހަކަދައްކަމުން އޭނާ ބުނީ ރާއްޖެ އަށް އައިސް ރާއްޖޭގެ ފަންނާނުންތަކެއް ކޮށްފައިވާ މަސައްކަތެއް ބަލާލުމަކީ އޭނާ އަށް ލިބޭ ވަރަށް ބޮޑު އުފަލެއް ކަަމަށެވެ. ފަންނާނުންނަކީ އޭނާ ވަރަށް ގަދަރުކުރާ ބައެއް ކަމަށާއި ލޯބިވެވިއްޖެ ފިލްމާއި މެދު އޭނާ ކުރާ އުންމީދު ވަރަށް ބޮޑު ކަމަށް ވަނީ ބުނެފައެވެ. އާފްތާބް ބުނީ މި ފިލްމުގެ ބަތަލު އަދި ޑައިރެކްޓަރ އަލީ ސީޒަން އަކީ އޭނާގެ ގާތް ރަހުމަތްތެރިޔަކަށް ވުމަކީ މި ފިލްމާއި މެދު އޭނާގެ ޝައުގުވެރިކަން އިތުރުވާކަމެއް ކަމަށެވެ.

އާފްތާބް ވަނީ ރާއްޖޭގެ ފިލްމް އިންޑަސްޓްރީ އަށް ތައުރީފްކޮށްފައެވެ. އަދި އޭނާ ވަނީ މި އިންޑަސްޓްރީގައި އޭނާގެ ގާތް ރަހުމަތްތެރިން ތިބިކަމަށް ވެސް ބުނެފައެވެ. އޭނާ އިތުރަށް ބުނީ ރާއްޖޭގައި އޭނާ ދުވަސް ހޭދަކުރާނެ ވަކި ގޮތެއް ނިންމާފައި ނުވާ ކަމަށާއި އެނާ ގަބޫލުކުރާ ގޮތުން ރާއްޖޭގައި ހޭދަކުރާ ދުވަސްތައް އެންމެ ފުރިހަމަ ވަނީ ޕްލޭނެއް ނެތި ކުރިއަށް ދިއުމުން ކަމަށެވެ.

ގިނަ ބަޔަކު އިންތިޒާރުކުރަމުން އައި މި ފިލްމް ލޯންޗްކޮށްފައިވަނީ މޭއި މަހުގެ 3 ވަނަ ދުވަހުއެވެ. އެސް ޕްރޮޑަކްޝަންސްއާއި ސެޓަރން ސްޓޫޑިއޯ ގުޅިގެން އުފައްދާފައިވާ މި ފިލްމުން ފެނިގެންދާ ތަރިންގެ ތެރޭގައި ސީޒަން އަލީ، އާމިނަތު ރިޝްފާ، މަރިޔަމް އައްޒަ އަދި އަހްމަދު އީސާ (އާނަންދު) ފަދަ ތަރިން ފެނިގެންދާ މި ފިލްމަކީ އަލީ ސީޒަން ގެ ޑައިރެކްޝަނެވެ.

ސްކްރީން ރައިޓަރ އަހުމަދު ޒަރީރުގެ ސްކްރީން ޕްލޭ އަކަށް ތައްޔާރުކޮށްފައިވާ މި ފިލްމު ކެމެރާކޮށްފައިވަނީ އިބްރާހީމް މޫސާ (ދަބަ)އެވެ. މި ފިލްމުން ރާއްޖެއާއި ސްރީލަންކާގެ ރީތި މަންޒަރުތައް ފެނިގެންދާނެއެވެ.

ސަސްޕެންޝަން ބޮޑު، އާއްމުންގެ ޝައުގުވެރިކަން ދަމައިގަންނާނެ ފަދަ ފިލްމަކަށް މި ފިލްމް ވާނެ ކަމަށް ފިލްމުގެ ޕްރޮޑަކްޝަން ޓީމުން ބުނެއެވެ. އަދި ލޯބީގެ ފިލްމެއްގެ ގޮތުގައި ގެނައިނަމަވެސް މި ފިލްމަކީ ތަފާތު ވާހަކައެއްގެ މައްޗަށް ބިނާކޮށްފައިވާ ފިލްމެއް ކަމަށް، ފިލްމުގެ ޕްރޮޑަކްޝަނުން ވަނީ ބުނެފައެވެ.

"ލޯބިވެވިއްޖެ" ފިލްމުގެ ޓިކެޓް އޮލިމްޕަސް ކައުންޓަރުން ލިބެން ހުންނާނެއެވެ. އަދި އެ ފިލްމުގެ ޓިކެޓު ގަތުމަށް ޚާއްސަ ނަންބަރު 7458800ށް ގުޅައިގެންވެސް ޓިކެޓު ގަނެވޭނެއެވެ.