މާލޭ ލީގުގައި ކްލަބް އީގަލްސްއާ ދެކޮޅަށް ނިކުންނަ މެޗަކީ ގަދަ ހަތަރަކަށް އަރަން ލިބޭ އެންމެ މުހިންމު މެޗުކަމަށް ޓީސީގެ ކޯޗު މުހައްމަދު ނިޒާމް (ނިޒާމްބެ) ބުނެފި އެވެ.

މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން ނިޒާމްބެ ބުނީ މާލޭ ލީގާ މެދު އެއްޗެއް ބުނަން އެނގޭނީ ކުރިޔަށް އޮތް ތިން މެޗު ނަގައިގެން ކަމަށާއި، އެގޮތުން އީގަލްސް މެޗަކީ ގަދަ ހަތަރެއްގެ ޖާގައެއް ހޯދަން ބޭނުންނަމަ ކާމިޔާބުކުރަންޖެހޭ އެންމެ މުހިންމު މެޗުކަމަށެވެ.

ނިޒާމްބެ ބުނީ އެހެން ޓީމުތަކާ އަޅާބަލާއިރު ޓީސީ އަށްވެސް އޮތީ ހަމަހަމަ ފުރުސަތެއް ކަމަށާއި، ކަލްކިއުލޭޝަންތައް ހަދާއިރު ޕޮއިންޓްތަކެއް ހޯދައިގެން ގަދަ ހަތަރެއްގެ ޖާގަ ކަށަވަރުކުރުމުގެ ފުރުސަތު އަދިވެސް އެބައޮތް ކަމަށެވެ.

ނިޒާމްބެ ބުނީ، މިދިޔަ ސީޒަނަށްވުރެ މި ސީޒަނުގައި ޓީސީގެ ބައެއް ކަންތައްތައް ރަނގަޅު ކަމަށާއި، އެހެންނަމަވެސް ޕޮއިންޓް ތާވަލަށް ބަލާއިރު، އެހެން ސީޒަންތަކަށްވުރެ މި ސީޒަނުގައި ޓީސީ ދަށުގައި އޮތް ކަމަށެވެ. އެގޮތުން އޭނާ ބުނީ ވަރަށް ބައިވަރު ކަންތައްތައް އެބަހުރި ކަމަށާއި، އެކަންތައްތައް ރަނގަޅުކުރުމުގެ މަސައްކަތްކުރަމުން އަންނަ ކަމަށެވެ.

މާލޭ ލީގާ ބެހޭގޮތުން ނިޒާމްބެ ބުނީ މިއީ ފާއިތުވެދިޔަ ފަސް އަހަރެއްގެ ތެރޭގައި ބޭއްވުނު އެންމެ ވާދަވެރި ލީގު ކަމަށާއި، ކުއްލިއަކަށް ބްރޭކްތައް ނައިނަމަ ލީގު އަދި މިއަށްވުރެ ފޯރިގަދަވާނެ ކަމަށެވެ.

ލީގުގައި ޓީސީ އޮތީ ކުޅުނު 11 މެޗުން ލިބުނު 15 ޕޮއިންޓާއެކު ޕޮއިންޓް ތާވަލުގެ ހަ ވަނައިގައެވެ.