ކުޅުދުއްފުށީ ހޮސްޕިޓަލުގައި އައިސީސީޔޫގެ ޚިދުމަތް ފަށައިފި
އަލަށް ހުޅުވި އައިސީސީޔޫ އަކީ 6 އެނދުގެ ތަނެއް
ކުޅުދުއްފުށީ ރީޖަނަލް ހޮސްޕިޓަލުގައި އަލަށް ތަރައްގީކުރި އައިސީސީޔޫ ހުޅުވަނީ
ކުޅުދުއްފުށީ ރީޖަނަލް ހޮސްޕިޓަލުގައި އައިސީސީޔޫގެ ޚިދުމަތް ފަށައިފިއެވެ.
ކުޅުދުއްފުށީގައި ބޭއްވި ޚާއްސަ ރަސްމިއްޔާތެއްގައި މި ފެސިލިޓީ ހުޅުއްވައިދެއްވީ ރައީސުލްޖުމްހޫރިއްޔާގެ އޮފީހުގެ މިނިސްޓަރު ޢަލީ ޝިޔާމްއެވެ. ޒަމާނީ ވަސީލަތްތަކާއެކު ކުޅުދުއްފުށީ ރީޖަނަލް ހޮސްޕިޓަލުގައި އައިސީސީޔޫގެ ޚިދުމަތް ދެނީ ކުޅުދުއްފުށީ ހޮސްޕިޓަލުގައި އަލަށް ތަރައްޤީކުރި 3 ބުރީގެ ކާނި ވިންގުގައެވެ.
ކުޅުދުއްފުށީ ރީޖަނަލް ހޮސްޕިޓަލުގައި އަލަށް ހުޅުވި އައިސީސީޔޫ އަކީ 6 އެނދުގެ ތަނެކެވެ. މީގެ ކުރިން އެ ހޮސްޕިޓަލުގައި އައިސީޔޫގެ ޚިދުމަތް ދެމުން އައީ 3 އެނދުގެ އައިސީޔޫއެއްގައެވެ.
އައިސީސީޔޫގެ ޚިދުމަތް ފެށުމަށް، އައިސީސީޔޫއަށް ޚާއްސަ ޓީމެއް ވެސް ހޮސްޕިޓަލުގައި ވަނީ އެކުލަވާލާފައެވެ.
މި ރަސްމިއްޔާތުގައި ވާހަކަ ދައްކަވަމުން ކުޅުދުއްފުށީ ރީޖަނަލް ހޮސްޕިޓަލުގެ ފިޒީޝަން ޑރ. މުހައްމަދު ނަޒީފް ވިދާޅުވީ ކާނި ވިންގްގައި ހުޅުވި އައިސީސީޔޫ އަކީ މެޑިކަލް ސްޓޭންޑަޑްގެ އައިސީސީޔޫއެއް ކަމަށާއި އެއީ އެ ސަރަހައްދުގައި ފޯރުކޮށްދޭ ކްރިޓިކަލް ކެއާގެ ފެންވަރު އިތުރުވާނެ ކަމެއް ކަމަށެވެ. އަދި ފެންވަރު ރަނގަޅު ސިއްހީ ފަރުވާ ފޯރުކޮށްދިނުމަކީ ސަރުކާރުން އިސްކަންދޭ މުހިންމު ކަމެއް ކަމަށް ވިދާޅުވިއެވެ.
ކުޅުދުއްފުށީ ހޮސްޕިޓަލުގެ 3 ބުރީގެ އައު އިމާރާތާއެކު 36 އެނދުގެ ޖާގަ ވަނީ އިތުރުވެފައެވެ. އެތަނުގެ ތިރީ ފަންގިފިލާ ބޭނުންކުރަނީ، 15 އެނދުގެ ކުޑަކުދިންގެ ވޯޑެއްގެ ގޮތުގައެވެ. ދެވަނަ ފަންގިފިލާގައި 15 އެނދުގެ މެޑިކަލް ވޯޑެއް ހިމެނޭއިރު އަލަށް ހުޅުވި އައިސީސީޔޫ ހިމެނެނީ ތިންވަނަ ފަންގިފިލާފައެވެ.
