އައިޖީއެމްއެޗުން ނުބައި އިންޖެކްޝަނެއް ދީގެން އިނގިލި ބުރިކުރަން ޖެހުނުކަމަށް ބުނާ މައްސަލައެއް!
3 މެއި 2023 | ބުދަ 02:53އައިޖީއެމްޗުން ދަނީ މައްސަލަ ތަހުގީގު ކުރަމުން
އައިޖީއެމްއެޗް
އައިޖީއެމްއެޗުގައި އުމުރުން ދުވަސްވީ އަންހެން މީހަކަށް ނުބައި އިންޖެކްޝަނެއް ދިނުމުގެ ސަބަބުން އޭނާގެ އިނގިލިތައް ބުރިކޮށްލަން ޖެހުނުކަމަށް ބުނާ މައްސަލައެއް ފެންމަތިވެއްޖެއެވެ.
ސޯޝަލް މީޑިއާގައި ދައުރުވަމުން އަންނަ ފޮޓޯތަކުން ފެންނަ ގޮތުގައި އެ އަންހެންމީހާގެ އެއް އަތުގެ ބޮޑުވައި އިނގިލި ނޫން އެހެން ހުރިހާ އިނގިޔެއް ހުރީ ބުރިކޮށްލާފައެވެ. އެ ފޮޓޯތަކާއެކު ކޮށްފައިވާ ޕޯސްޓުތަކުގައި ބުނެފައިވާގޮތުގައި އެ އަންހެން މީހާއަކީ ނުކުޅެދުންތެރިކަން ހުންނަ އުމުރުން 85 އަހަރުގެ އަންހެނެކެވެ.
މި މައްސަލައާ ގުޅިގެން އައިޖީއެމްއެޗުން އަންގާރަ ދުވަހުގެ ރޭ ނެރުނު ބަޔާނެއްގައި ބުނީ އެކަން ހިނގާފައިވާ ގޮތް ދެނެގަނެ، ބަލި މީހާއަށް ފަރުވާ ދިނުމުގައި ކްލިނިކަލް ޕްރޮޓޮކޯލްތަކާއި އެއްގޮތައް އަމަލުކޮށްފައިވޭތޯ ބަލާނެ ކަމަށެވެ. އެގޮތުން މި މައްސަލަ އެ ހޮސްޕިޓަލުން އެކުލަވާލާފައިވާ ކޮމިޓީން ތަހުގީގު ކުރަމުން އަންނަ ކަމަށް އެ ހޮސްޕިޓަލުން ބުނެއެވެ.
މި މައްސަލައިގައި ކޮމިޓީގެ ހޯދުންތައް ކަމާބެހޭ ފަރާތްތަކާ ހިއްސާ ކުރާނެ ކަމަށް ވެސް އައިޖީއެމްއެޗުގެ ބަޔާނުގައި ވަނީ ބުނެފައެވެ.
