ލޯގަނޑެއްގެ ކުރިމައްޗަށް ހުއްޓި، މި ސިފައަށް ހުންނަނީ ކީއްވެބާއޭ ހިތަށް އެރިތަ؟

ޣައްޒާގެ ދެކުނުގައި އޮންނަ ޚާން ޔޫނިސްގައި ކުރިއަށްގެންދާ ފުޓުބޯޅަ ތަމްރީނުތަކަށް، ހައިސަމް އައްސަގާ ތައްޔާރުވަނީ ނުހަނު ޝައުގުވެރިކަމާ އެކުގައެވެ. ނޫކުލައިގެ ފުޓުބޯޅަ ބޫޓަށް އަރައި، ނާޑުވާ އައްސަމުން ދާ ދިއުމަކީ ކޮންމެ ހަފުތާއެއްގެވެސް އާދައެވެ.

އުމުރުގެ އެހެން މީހުންނަށްވުރެ އިސްކޮޅުން ކުރުކޮށް ހެދިބޮޑުވެފައި ހުއްޓެއްކަމަކު، އެއީ ކުޅިވަރުގެ ރޮނގުން ކުރިއަށް ދިއުމަށް އައްސަގާއާއި އޭނާފަދަ އެހެން އެކުވެރިންނަށް އޮތް ހުރަހަކަށް ފަހަރެއްގައިވެސް ނުހަދައެވެ. އޭނާފަދަ އެހެން އެކުވެރިން އެއްތަންވެ، އަމިއްލަ ފުޓުބޯޅަ ސްކޮޑެއް އެކުލަވާލަން ނިންމައި، އަމަލީގޮތުން އެ މަސައްކަތް ފެށީ ސާބިތުކަމާއެކުގައެވެ. ކޮންމެވެސް ދުވަހަކުން ބައިނަލްއަގުވާމީ ފެންވަރުގެ މުބާރާތްތަކުގައި ވާދަކުރަން ލިބޭނެކަމުގެ ވަރުގަދަ އަޒުމުގައެވެ.

3 ދަރިންގެ ބައްޕަ، އައްސަގާ ފާހަގަކުރިގޮތުގައި ޓީމު އެކުލަވާލެވުމަކީ މުޅި ދިރިއުޅުން ބަދަލުކޮށްލި ކަމެކެވެ. މުޖުތަމައުގައި އޮތް ގަބޫލުކުރުންތަކެއްގެ ސަބަބުން، އައްސަގާފަދަ މީހުންނަކީ ތަފާތު ބައެއްކަމަށް ދެކެމުން ދިޔަނަމަވެސް، ސްކޮޑް އެކުލަވާލައި، އެކުގައި މަސައްކަތްކުރަން ފެށުނު ހިސާބުން އެމީހަކު ގަޔާވެ، ލޯބިކުރާ ކަމެއް، އިތުރު ކަމަކާ ވިސްނަންނުޖެހި ކޮށްލެވޭކަމަށް އޭނާ ބުންޏެވެ.

ޓީމުގެ ކޯޗުގެ މަގާމުގައި ހުރި މުހައްމަދު ޒަގުތު ފާހަގަކުރިގޮތުގައި އެންމެ 3 މީހުންނާއެކު ފެށި ސްކޮޑްގެ މެންބަރުންގެ އަދަދު 9ށް އިތުރުވީ އެންމެ 2 މަސް ދުވަހުގެ ތެރޭގައެވެ. ސްކޮޑްގެ ފަރިތަކުރުންތައް ކުރިއަށްގެންދަނީ، ހަފުތާއަކު 1 ފަހަރު، ކޮންމެ ދުވަހަކު 2 ގަޑިއިރަށެވެ.

އައްސަގާގެ ޓީމުން ދާދިފަހުން ވަނީ ލުބްނާނުގައި ދިރިއުޅެމުންދާ ފަލަސްތީނުގެ އެފަދަ މެންބަރުންގެ ޓީމަކާ ގުޅި، އިސްކޮޅުން، އެ އުމުރުގެ އެހެން މީހުންނަށްވުރެ ކުރު މީހުންގެ ގައުމީ ޓީމެއް އެކުލަވާލާފައެވެ.

ޣައްޒާގެ މަގުތައް މަތީގައި ފުޓުބޯޅަ ކުޅެމުން ބޮޑުވަމުން އައި، މިހާރު އުމުރުން 34 އަހަރު ފުރިފައިވާ އައްސަގާގެ އުއްމީދަކީ އަރަބި އަދި ބައިނަލްއަގުވާމީ ދުނިޔޭގެ މުބާރާތްތަކުގައި ވާދަކުރުމެވެ. އެ ހުވަފެންތައް ހަގީގަތަކަށް ވުން އިހުނަށްވުރެ ގާތްވެފައިވާކަމުގެ އިހުސާސް ކުރެވޭކަން އައްސަގާ ވަނީ ފާހަގަކޮށްފައެވެ.

އައްސަގާ ފަދައިން، އުމުރުގެ އެހެން މީހުންނަށްވުރެ އިސްކޮޅުން މާ ކުރުކޮށް ތިބޭ މީހުންނަކީވެސް އެންމެ ކުޑަ ދުވަހުން ފަށައިގެން ބާކީނުކޮށް ގެންގުޅެފިނަމަ، އެހެން މީހުންނެކޭ އެއްވަރަށް ނުވަތަ އެއަށްވުރެވެސް ފުރިހަމައަށް ކަންކަން ކުރެވޭނެ ބައެކެވެ. މިކަމަށް ގިނަ ފަހަރަށް އެޅިފައި އޮންނަ އެންމެ ބޮޑު ހުރަހަކީ، "ކުޅެދުމާއި ނުކުޅެދުމުގެ" މެދުގައި އެ މުޖުތަމައުން ގެންގުޅޭ ނަޒަރެވެ.