އުފެއްދުންތެރިކަން ކުރިއެރުވުމަށް ދިވެހީންނަށް ކުރެވެން ހުރި ހުރިހާ މަސައްކަތެއް ކުރުން މުހިންމު - ކާބަފައިން ވެފައިވަނީ ނަމޫނާ މަސައްކަތްތެރިންނަށް

މަސައްކަތްތެރިންގެ ދުވަސް ފާހަގަކުރާއިރު ރާއްޖޭގެ މަސައްކަތު އާބާދީގައި ބިދޭސީ މަސައްކަތްތެރިން ގިނަކަމުގެ މައްސަލައަކީ އެންމެ މައްސަލައެކެވެ. ރާއްޖޭގެ މަސައްކަތްތެރިކަމާއި އުފެއްދުންތެރިކަން ކުރިއެރުވުމަށް ދިވެހީންނަށް ކުރެވެން ހުރި ހުރިހާ މަސައްކަތެއް ކުރުމަށް އަޒުމު ކަނޑައެޅުން މުހިންމެވެ. ގައުމަށް ލާބަޔާއި މަންފާހުރި ކޮންމެ މަސައްކަތެއް ކުރުމަކީ އުފަލެއްކަމުގައި ދެކެން އެބަޖެހެއެވެ. ޚާއްސަކޮށް ދިވެހި ޒުވާނުންގެ ތެރެއިން މަސައްކަތު އާބާދީގައި ނުހިމެނޭ ޒުވާނުން މަސައްކަތު އާބާދީގައި ހިމެނުން މުހިންމެވެ. ދިވެހިންނަކީ އެންމެ ކުރީ ޒަމާންތަކުން ފެށިގެން ހީވާގި މުރާލި މަސައްކަތްތެރި ބައެކެވެ. މަސްވެރިކަމެވެ. ދަނޑުވެރިކަމެވެ. ރާވެރިކަމެވެ. ކަނބުރުވެރިކަމެވެ. ތިލޭރުކަމެވެ. ގަލުވަޑާމެވެ. ކިއްސަރުވަޑާމެވެ. ތެދުއިވަޑާމެވެ. އަތްތެރިކަމުގެ ތަފާތު މަސައްކަތްތަކެވެ. މިހުރިހާ މަސައްކަތްތަކަކީ ދިވެހީން މީގެ 1000 އަހަރު ކުރިންވެސް ވަރަށް މޮޅުކޮށް ކުޅަދާނަކަމާއެކު ކޮށްއުޅުނު މަސައްކަތްތަކެކެވެ.

މަސްވެރިކަމުގެ މަސައްކަތްތަކާއި ދަނޑުވެރިކަމުގެ މަސައްކަތްތައް ހިމެނިފައިވަނީ، އެންމެ ކުރީގެ ޒަމާންތަކުން ފެށިގެން 1970ގެ އަހަރުތަކާއި ހަމަޔަށް ރާއްޖޭގެ އެންމެ ބޮޑު ސިނާއީ މަސައްކަތްތައް ކަމުގައެވެ.

މީގެ 111 އަހަރު ކުރިން ރާއްޖޭގެ ފުރަތަމަ ބޯހިމެނުމުގެ ތަފާސްހިސާބުތަކަށް ބަލާއިރު، 1912ގައި ރާއްޖޭގެ 72،000ގެ އާބާދީގެ މަސައްކަތު ފިރިހެނުންގެ 40 އިންސައްތަ މީހުންގެ މަސައްކަތަކީ މަސްވެރިކަމެވެ. އެއީ 14،000ށްވުރެ ގިނަ ފިރިހެނުންނެވެ. އަދި 1912 ގަައި ރާއްޖޭގެ މަސައްކަތު އަންހެނުންގެ އާބާދީގެ 34 އިންސައްތަ އަންހެނުންނަކީ ބޮނބިތަޅައި ރޯނުވެށުމުގެ މަސައްކަތްކުރި އަންހެނުންނެވެ. އެއީ 10،000ށްވުރެ ގިނަ އަންހެނުންނެވެ.

މިއިން ސާބިތުވަނީ ދިވެހި ފިރިހެނުންނާއި ދިވެހި އަންހެނުންގެ މުރާލިކަމާއި މަސައްކަތްތެރިކަމެވެ. ރާއްޖޭގެ އަމިއްލަ ދާއިރާ (ޕްރައިވެޓް ސެކްޓަރ)ގައި ނިޒާމީ ލޭބަރ ފޯހެއް ނުވަތަ ވަޒީފާ އަދާކޮށް މުސާރަ ލިބޭ ނިޒާމެއް، ރާއްޖޭގައި ފުރަތަމަ ތަޢާރަފުވީ 1950ގެ އަހަރުތަކުގެ ފަހުކޮޅު އައްޑުއަތޮޅުގައެވެ. މީގެ 51 އަހަރުކުރިން، 1970ގެ އަހަރުތަކުގައި ރާއްޖެއަށް ފަތުރުވެރިކަން ތައާރަފުވުމާއެކު ރާއްޖޭގައި ޒަމާނީ ލޭބަރ ފޯހެއް އުފެދުނެވެ.

އަދި ރާއްޖޭގެ ފަތުރުވެރިކަމަށް 20 އަހަރުވީއިރު، ފަތުރުވެރިކަން ވަނީ ރާއްޖޭގެ އިގުތިސާދުގެ 1 ވަނަ ސިނާއަތަށް ވެފައެވެ. ފާއިތުވެ މިދިޔައީ ފަތުރުވެރިކަމުގެ 50 އަހަރު ފުރުނު ރަންޔޫބީލު މުނާސަބަތު ކަމަށްވީ ހިނދު، މީގެ 20 އަހަރުކުރިން 2000ގެ އަހަރުތައް ފެށުނުއިރު، ރާއްޖޭގެ ފަތުރުވެރިކަމަށް ދުނިޔޭގެ ފެންވަރުގެ އެވޯޑްތައް ލިބެން ވަނީ ފަށާފައިކަން ފާހަގަކުރެއެވެ.

އޭގެ ފަހުގެ އަހަރުތަކާއި މިހާރު ރާއްޖޭގެ ފަތުރުވެރިކަން މިވަނީ އެތައް ރޮނގަކުން ދުނިޔޭގެ 1 ވަނަ ދަރަޖާގައިކަން ފާހަގަކުރެވެއެވެ. ރާއްޖޭގެ އިގްތިސާދުގެ އަދި ވަޒީފާގެ ބާޒާރާއި މަސައްކަތްތެރިކަމުގެ މައިގަނޑު ސިނާއަތްތަކަށް ބަލާއިރު؛ ފަތުރުވެރިކަމުގެ ސިނާއަތު، ދަތުރުފަތުރާއި މުވާސަލާތާއި ޓެކްނޮލޮޖީގެ ސިނާއަތު، އިމާރާތްކުުރުމުގެ ސިނާއަތު، އާންމު ވިޔަފާރީގެ ސިނާއަތު، މަސްވެރިކަމުގެ ސިނާއަތު، ދަނޑުވެރިކަމުގެ ސިނާއަތު ހިމެނެއެވެ. މިއަދު ރާއްޖޭގެ ލޭބަރ ފޯހުގައި ދިވެހީންނަށްވުރެ ބިދޭސީން ގިނައެވެ. ވީމާ، ދިވެހި މަސައްކަތްތެރިންގެ މަސައްކަތުގެ ސުލޫކު ރަނގަޅުކޮށް ދިވެހި މަސައްކަތްތެރިން ވަނީ އިތުރުކުރަން ޖެހިފައެވެ. ކޮންމެ މަސައްކަތަކީވެސް މުހިންމު މަސައްކަތެކެވެ. މިގައުމު ކުރިއެރުން ވަނީ މަސައްކަތުންނެވެ. މިތާނގެ ހުނަރުވެރިންގެ ހިންމަތުންނެވެ.