ޗެލްސީގެ އެސިސްޓެންޓް ކޯޗުކަމުގެ މަގާމުގައި ހުރި އެންތަނީ ބާރީ ޖަރުމަނުގެ ބަޔާން މިއުނިކްގެ އެސިސްޓެންޓް ކޯޗުކަމާ ހަވާލުވެއްޖެ އެވެ.

އުމުރުން 36 އަހަރުގެ ބާރީ ބަޔާންގެ އެސިސްޓެންޓް ކޯޗުކަމާ ހަވާލުވުމުގައި އެންމެ އިސް ދައުރެއް އަދާކޮށްފައި ވަނީ ކުރިން އޭނާއާއެކު މަސައްކަތް ކުރި ތޯމަސް ޓުޗެލް އެވެ. ބަޔާންގެ ކޯޗުކަމާ ޓުޗެލް ހަވާލުވުމަށްފަހު އޭނާ ބޭނުންވީ އެސިސްޓެންޓް ކޯޗަކަށް ބާރީ ގެންނާށެވެ. އެކަމާ ގުޅޭ ގޮތުން ވާހަކަ ދައްކަމުން ޓުޗެލް ބުނީ، ބާރީ މިހާރު ބަޔާނާ ގުޅިފައިވާ ކަމަށާއި، އޭނާ އައުމުން ވަރަށް އުފާވާ ކަމަށެވެ. އެގޮތުން އޭނާ އަކީ މަސައްކަތަށް ފަރުވާތެރި، އެސިސްޓެންޓަކަށް ވެސް އެންމެ އެކަށީގެންވާ މީހާ ކަމަށް ޓުޗެލް ވަނީ ބުނެފަ އެވެ.

މީގެ އިތުރުން ޓުޗެލް ބުނީ އޭނާ އަކީ، ފެންވަރު ރަނގަޅު، ކޮލެޓީ ކޯޗެއް ކަމަށެވެ. އެހެންކަމުން އޭނާއާއެކު މަސައްކަތްކޮށްގެން ބަޔާނާއެކު ކުރިއަށް ދެވޭނެ ކަމުގެ ޔަޤީންކަން އޮންނަ ކަމަށް ވެސް ޓުޗެލް ބުންޏެވެ. އިތުރަށް ވާހަކަ ދައްކަމުން ޓުޗެލް ބުނީ، ބާރީ އަކީ އެކުގައި މަސައްކަތްކޮށްފައިވާ މީހަކަަށްވުމުން އޭނާގެ ފެންވަރާއި، މަސައްކަތު ލެވެލް ވަރަށް ރަނގަޅަށް އިނގޭ ކަމަށެވެ. ޓުޗެލް އޭނާގެ ކުރީގެ ކުލަބު ޗެލްސީގައި މަސައްކަތް ކުރި އިރު، ބާރީ ވެސް ހުރީ އެ ޓީމުގަ އެވެ. ޗެލްސީއާއެކު ޓުޗެލް ހޯދި ގިނަ ކާމިޔާބީތަކުގެ ފަހަތުގައި ބާރީ ހުރި ކަމަށް ވެސް ޓުޗެލް ވަނީ ބުނެފަ އެވެ.

ޗެލްސީގެ ކޯޗުކަމާ ޓުޗެލް ހަވާލުވި ފަހުން އެ ޓީމު ވަނީ މިހާތަނަށް ހަ މެޗު ކުޅެފަ އެވެ. އޭގެ ތެރެއިން މޮޅުވެފައި ވަނީ އެންމެ ދެ މެޗުންނެވެ. ދެ މެޗުން ބަލިވީއިރު، ދެ މެޗު ނިމުނީ އެއްވަރުވެގެންނެވެ. ބަޔާން ވަނީ މި ސީޒަންގެ ޖަރުމަނު ކަޕުންނާއި، ޔުއެފާ ޗެމްޕިއަންސް ލީގުން ވެސް ކަޓައިފަ އެވެ.