މާފަންނު އުތުރު ދާއިރާގެ މެންބަރު އިމްތިޔާޒް ފަހުމީ ދޮގު ތުހުމަތުތަކެއްގެ މައްޗަށް ބިނާކޮށް ޓެރަރިޒަމްގެ އަމަލެއް ހިންގާ ރައީސް މުހައްމަދު ނަޝީދު މަރާލަން އުޅޭކަމުގެ ނުރައްކާތެރި ތުހުމަތު މީދޫ ދާއިރާގެ މެންބަރު ރޮޒައިނާ އާދަމްގެ ބޮލުގައި އެޅުވުމުން އޭނާގެ ފުރާނައަށް ނުރައްކާވެފައިވާ ކަމަށް ވިދާޅުވެ ރޮޒައިނާ އާދަމް ފުލުހަށް މައްސަލަ ހުށަހަޅުއްވައިފިއެވެ.
ކޮމިޝަނަރ އޮފް ޕޮލިސް މުހައްމަދު ހަމީދަށް ފޮނުވި ސިޓީއެއްގައި ވިދާޅުވީ ރޮޒައިނާ އަކީ މީހަކަށް އަނިޔާއެއްދިނުމަށް ދުވަހަކުވެސް މަސައްކަތެއްކުރި، ނުވަތަ އެފަދަ ކަމެއްކުރަން ހިތައްއެރުވި ނުވަތަ އެފަދަ ކަމެއްކުރަން ރޭވި މީހެއްނޫން ކަމަށެވެ.
އަދި ރައިސް ނަޝީދުއަށް ދިން ބޮމުގެ ހަމަލާއަކީ އެދުވަހު ވެސް މިއަދު ވެސް ހަރުކަށިއިބާރާތުން ކުއްވެރިކުރާ ކަމެއް ކަމަށާއި ސިޔާސީ ދާއިރާގައި މީހުންނާއި ސިޔާސީ ގޮތުން ހިޔާލު ތަފާތުވުމަކީ އެއްވެސް މީހަކާ ދޭތެރޭ ޒާތީ ވާންޖެހޭ ކަމެއްކަމަށް ނުވަތަ އަނިޔާވެރިވާންޖެހޭ ކަމެއްކަމަށް ނުވަތަ އެމީހާއާއި މެދު ނަފްރަތު ކުރަންޖެހޭ ކަމެއްކަމަކަށް އެއްވެސް އިރެއްގައި ގަބޫލެއްނުކުރާކަމަށް ރޮޒައިނާ ވިދާޅުވިއެވެ.
މާފަންނުއުތުރު ދާއިރާގެ މެންބަރު އިމްތިޔާޒް ފަހުމީ ތުހުމަތުކުރައްވާ ފައިވާފަދައިން، ރައީސް ނަޝީދަށް ސެކިއުރިޓީ ދޭން ނުޖެހޭކަމަށްވެސް، އަދި ދިނުން ހުއްޓާލަށްވެސް، އަދި ދޭގޮތަށް ބަދަލެއް ގެންނާކަށްވެސް ވަކާލާތު ކޮށްފައި ނުވާނެ ކަމަށް ރޮޒައިނާ ވިދާޅުވިއެވެ.
ސިޔާސީ ގޮތުން ނަޝީދާއި އެއްބަސް ނުވެވޭ ގިނަ ކަންތައްތަކެއް އެބަހުރި ކަމަށާއި އެކަންކަންކަމަށް ފާޑުކިޔުން އަދިވެސް ކުރިއަށް ގެންދާނެ ކަމަށް ރޮޒައިނާގެ ސިޓީގައި ވިދާޅުވެފައި ވެއެވެ. ނަމަވެސް އޭގެ މާނައަކީ ޖިސްމާނީ ގޮތުން އެމަނިކުފާނަށް ގެއްލުމެއްދޭން ބުނުން ނޫން ކަމަށް ރޮޒައިނާ ވިދާޅުވިއެވެ.
"ރައީސް ނަޝީދުގެ ޓީމުން ސިޔާސީ ގޮތުން އަޅުގަނޑާއި ބަހުސް ކޮށް ކުރިނޭރުނީމާ، އަޅުގަނޑުގެ އަބުރު . ކަތިލަން އެތައްމަސައްކަތެއްކޮށް، އެގޮތުވެސް ކުރި ނޭރުނީމާ ސިޔާސީގޮތުން އަޅުގަނޑު ފަހަތަށް ޖެއްސުމަށް، މާފަންނު އުތުރު ދާއިރާގެ މެންބަރު އިމްތިޔާޒް ފަހުމީ އަޅުގަނޑުގެ ބޮލުގައ ރައީސް ނަޝީދު މަރާލަން ރޭވުމުގެ އިލްޒާމް އެޅުވުމަކީ ވަރަށް ފިނޑި، ނާތަހުޒީބު އަދި ހަމަ އެހާ ނުރައްކާތެރި އަމަލެކެވެ. އެހެނީ އެއްވެސް ހެއްކަކާއި ނުލައި އަޅުގަނގެ ބޮލުގ ރައީސް ނަޝީދު މަރާލަން ރާވާކަމުގެ އިލްޒާމް އެޅުވުމުން، އެބޭފުޅާ އަޅުގަނޑު އެހުށައެޅި އަޅުގަނޑަށް ބަޔަކު ޖިސްމާނީ ހަމަލާއެއް ދީފާނޭ ހާލަތަކަށެވެ." ރޮޒައިނާ ވިދާޅުވިއެވެ.
ރޮޒައިނާ ވިދާޅުވީ އެފަދަ ތުހުމަތެއް އޭނާގެ މައްޗަށް ކުރުމުން ނަޝީދަށް ތާއިދު ކުރާ ބަޔަކު އޭނާ އަށް ހަމަލާއެއް ދިނުމަކީ ވަރަށް އެކަށީގެންވާ ކަމެކެވެ.
އެހެންކަމުން ރައީސް ނަޝީދު މަރާލަން ރޮޒައިނާ އުޅޭކަމަށް އިމްތިޔާޒް ކުރި ތުހުމަތުގެ މައްސަލަ ފުލުހުން ބަލައި ދިނުމަށް ރޮޒައިނާގެ ސިޓީގައި ވަނީ އެދިވަޑައިގެންފައެވެ.
ރައީސް ނަޝީދު އަވަހާރަކޮށްލަން ދިން ބޮމުގެ ހަމަލާއާ ގުޅިގެން ސެކިއުރިޓީ ވަރުގަދަކޮށްފައި ވަނިކޮށް، އެކަމާ ދެކޮޅަށް މަޖިލީހުގެ މީދޫ ދާއިރާގެ މެންބަރު ރޮޒައިނާ އާއި ހެންވޭރު ދެކުނު ދާއިރާގެ މެންބަރު ހުސައިން ޝަހީމް (އަނދުން ހުސައިން) ވާހަކަ ދެއްކެވުމަކީ އިތުރު ހަމަލާއެއްގެ ބިރު އޮތް ކަމެއް ކަމަށް ވިދާޅުވެ އިމްތިޔާޒް ވަނީ ބުދަ ދުވަހު މައްސަލައެއް ފުލުހަށް ހުށަހަޅާފައެވެ.
އިމްތިޔާޒް ފުލުހުންނަށް ހުށަހެޅުއްވި މައްސަލައިގައި ވިދާޅުވީ ބޮމެއް ގޮއްވާލައި ފުރާނަ ނުރައްކަލަކަށް ހުށަހެޅުނު ރައީސް ނަޝީދަށް ދައުލަތުން ފޯރުކޮށްދޭން މަޖުބޫރުވި ސެކިއުރިޓީ ހުއްޓާލަން ބާރުއަޅައި ރޮޒައިނާ އާއި އަނދުން ހުސެއިން ތަކުރާރުކޮށް ގެންދަވަނީ ވާހަކަ ދައްކަވަމުން ކަމަށެވެ.
