ޗަމްޕާއިން ހަދިޔާ ކުރި ކާށި އަންގާރަ ދުވަހު ބަހަން ފަށަނީ

ޗަމްޕާ ބްރަދާސް އިން ހަދިޔާކޮށްފައިވާ ކާށި އަންގާރަ ދުވަހުން ފެށިގެން ބެހުމަށް މާލެ ސިޓީ ކައުންސިލުން ނިންމައިފިއެވެ.

ދިވެހި ރައްޔިތުންނަށް ބެހުމުގެ ބޭނުމުގައި ޗަމްޕާއިން ކާށި ހަވާލު ކުރީ މާލެ ސިޓީ ކައުނސިލާއެވެ. އެގޮތުން 30،000 ކާށި އެ ކައުންސިލާ ހަވާލު ކޮށްފައިވާ ކަމަށް މާލެ ސިޓީ ކައުންސިލުން ބުންޏެވެ.

އެ ކައުންސިލުން ހޯމަ ދުވަހު ބުނީ 11 އޭޕްރިލް އިން ފެށިގެން 16 އޭޕްރިލްއަށް ކާށި ބަހާނީ އިސްލާމިކް މިނިސްޓްރީގެ ފަގީރުންގެ ދަފްތަރުގައި ރަޖިސްޓްރީވެފައިވާ ފަރާތްތަކަށް ކަމަށެވެ. ކަށި ބަލާ ދާއިރު ފަގީރުންގެ ލިސްޓުގައި ހިމެނޭ މީހެއްކަން އެނގޭނެ ފަދަ ލިޔުމެއް ގެންދިއުމަށް ކައުންސިލުން ވަނީ އެދިފައެވެ.

މީގެއިތުރުން 17 އޭޕްރިލް 2023 އިން ފެށިގެން ހުރިހާ އެންމެނަށް ކާށި ބެހުމަށް ހުޅުވާލާނެއެވެ. މި ފުރުސަތުގައި ކާށި ބަލާ ދާއިރު އައި.ޑީ ކާޑު ގެންދަން ޖެހޭނެއެވެ.

ކާށި ބެހުން ކުރިއަށްދާނީ ބޮޑުތަކުރުފާނު މަގުގައި ހުންނަ މާލެސިޓީ ކައުންސިލުގެ ޢާންމު ޚިދުމަތްތަކާއި ބެހޭބައިން ހުކުރު ދުވަސް ފިޔަވައި ކޮންމެ ދުވަހެއްގެ ހެނދުނު 09:30 ން 13:30 އަށް އަދި ރޭގަނޑު 21:30 ން 23:30 އަށް ކަމަށް ސިޓީ ކައުންސިލުން ބުނެއެވެ.

ޗަމްޕާއިން ހަދިޔާ ކޮށްފައިވާ ކާށި ބަހަން ނިންމާފައިވާކަން އިއުލާންކުރި ނަމަވެސް ބަހާނެގޮތުގެ މާބޮޑު ތަފްސީލެއް މާލެ ސިޓީ ކައުންސިލުން ހާމައެއް ނުކުރެއެވެ.