ކުރިއަށް އޮތް ދައުރަށް އދ. ގެ އިންސާނީ ހައްގުތަކާ ބެހޭ ކައުންސިލްގެ ގޮނޑިއަކަށް ވާދަކުރުމަށްފަހު، ރާއްޖެއިން ނަން އަނބުރާ ގެންގޮސްފިއެވެ.
އަންނަ އަހަރުން ފެށިގެން 2020 ވަނަ އަހަރާއި ހަމައަށް ކުރިއަށްދާ އެ ކައުންސިލްގެ ގޮނޑިއަކަށް ވާދަކުރުމަށްފަހު، ރާއްޖެއިން ނަން އަނބުރާ ގެންގޮސްފައިވާއިރު، ޖެނީވާގައި ހުންނަ ރާއްޖޭގެ މިޝަނުން ބުނީ، 2020 ގެ ފަހުގެ ދައުރަކަށް ރާއްޖެއިން ކުރިމަތިލާނެ ކަމަށެވެ. އަދި ކުރިމަތިލާނީ ކޮން ދައުރަކަށްކަން ވަރަށް އަވަހަށް ހާމަކުރާނެ ކަމަށްވެސް ރާއްޖޭގެ މިޝަން އިން ވަނީ ބުނެފައެވެ.
ރާއްޖެއިން މީގެ ކުރިން ދެ ފަހަރެއްގެމަތިން މެންބަރުކަން ކޮށްފައިވާ، އދ. ގެ އިންސާނީ ހައްގުތަކާ ބެހޭ ކައުންސިލްގެ ގޮނޑިއަށް ވާދަ ނުކުރުމަށް ރާއްޖެއިން ނިންމި ނަމަވެސް، އދ. ގެ ސަލާމަތީ މަޖިލީހުގެ ވަގުތީ މެމްބަރުކަން ހޯދުމަށް ރާއްޖެއިން އަދިވެސް ދަނީ މަސައްކަތް ކުރަމުންނެވެ. އެ ރޭހުގައި ރާއްޖެއާއި ވާދަކުރަނީ އިންޑޮނީޝިއާއެވެ. އެ އިންތިޚާބު ބޭއްވުމަށް ހަމަޖެހިފައިވަނީ އަންނަ އަހަރުއެވެ.
ޔޫއެންއެޗްއާރްސީގެ މެންބަރުކަމުގެ ރޭހުން ރާއްޖެ އަމިއްލައަށް ބޭރުވިއިރު، ރާއްޖޭގައި އިންސާނީ ހައްގުތައް ކަށަވަރުކޮށްދިނުމަށް ދޭ އަހައްމިއްޔަތުކަން ކުޑަކަމަށާއި، ސަރުކާރުން އިންސާނީ ގިނަ ހައްގުތަކަށް އަރައިގަންނަމުންދާކަމަށް ގިނަ ޤައުމުތަކަކުން ދަނީ ތުޙުމަތު ކުރަމުންނެވެ.
