ރަޖިސްޓަރީނުކޮށް ހިންގާ ސްކީމަކުން ގެއްލުންވިނަމަ ޝަކުވާ ހުށަހަޅަން އެދިއްޖެ
ސީއެމްޑީއޭއިން ވަނީ އެފަދަ ސްކީމެއްގެ ސަބަބުން ގެއްލުން ލިބިފައިވާ ނަމަ މިމަހުގެ 30 ވަނަ ދުވަހުގެ ކުރިން ޝަކުވާ ހުށަހަޅަން އެދިފައި
ދިވެހި ފައިސާގެ ނޫޓުތަކެއް
ކެޕިޓަލް މާކެޓް ޑިވެލޮޕްމަންޓް އޮތޯރިޓީ (ސީއެމްޑީއޭ) ގައި ރަޖިސްޓްރީ ނުކޮށް ހިންގާ އިންވެސްޓްމަންޓް ސްކީމެއްގައި ބައިވެރިވެގެން ގެއްލުން ލިބިފައިވާ ނަމަ އެކަމުގެ ޝަކުވާ ހުށަހަޅަން ސީއެމްޑީއޭއިން އެދެފިއެވެ.
ސީއެމްޑީއޭއިން ނެރުނު ބަޔާނެއްގައި، ބުނެފައިވަނީ އޮތޯރިޓީގެ މަސްއޫލިއްޔަތުތަކުގެ ތެރޭގައި ދިވެހިރާއްޖޭގެ މާލީ ސެކިޔުރިޓީޒް އާ ބެހޭ ގާނޫނުގެ ދަށުން ރާއްޖޭގެ ހިއްސާގެ ބާޒާރު ރެގިޔުލޭޓްކޮށް، ސެކިއުރިޓީޒްގެ ޚިދުމަތް ފޯރުކޮށްދިނުމުގެ އެންމެހާ ހުއްދަތައް ދޫކުރުމާއި އިންވެސްޓަރުންގެ މަސްލަހަތު ހިމާޔަތްކޮށް ރައްކާތެރިކުރުމަށްޓަކައި ސެކިއުރިޓީޒްގެ މުއާމަލާތްތަކުގައި ނޭދެވޭ އަމަލުތައް ކުރިޔަ ނުދިނުމާއި، ސެކިއުރިޓީޒްގެ ބާޒާރާމެދު އިތުބާރު ގެއްލޭފަދަ އަމަލު ހިންގިޔަ ނުދިނުމަށް އަޅަންޖެހޭ ފިޔަވަޅުތައް އެޅުން މަތިކޮށްފައިވާކަމަށެވެ.
މާލީ ސެކިއުރިޓީޒްގެ މުއާމަލާތުގެ ތެރޭގައި ހިމެނޭ އެއްވެސް ބާވަތެއްގެ މުއާމަލާތެއް ރާއްޖޭގެ މާލީ ސެކިއުރިޓީޒްއާ ބެހޭ ގާނޫނާއި އެ ގާނޫނުގެ ދަށުން ހަދާފައިވާ ގަވާއިދުތަކާއި އެއްގޮތަށް އެކަމަށް ނަގަންޖެހޭ ހުއްދަ ނުވަތަ ލައިސަންސް ނުނަގައި ހިންގުމަކީ ނުވަތަ އެގޮތަށް ދޭހަވާފަދަ ގޮތަކަށް އިސްތިހާރުކޮށް އަމަލުކުރުމަކީ މަނާކަމެއްކަން މީގެކުރިންވެސް ވާނީ އަންގާފައިކަމަށް ބަޔާނުގައި ބުނެފައެވެ.
ސީއެމްޑީއޭއިން ވަނީ އެފަދަ ސްކީމެއްގެ ސަބަބުން ގެއްލުން ލިބިފައިވާ ނަމަ މިމަހުގެ 30 ވަނަ ދުވަހުގެ ކުރިން ޝަކުވާ ހުށަހަޅަން އެދިފައެވެ.
އެ ބަޔާނުގައިވާ ގޮތުން އެފަދަ ޝަކުވާތަކެއް އެ އޮތޯރިޓީން މިހާރު ވެސް އަންނަނީ ބަލަމުންނެވެ.
އެ ބަޔާނުގައިވާ ގޮތުން ސެކިއުރިޓީޒްގެ މާނައިގެ ތެރޭގައި ފައިސާއިން ފައިދާ ހޯދުމަށްޓަކައި އިންވެސްޓް ކުރުމާއި އެފަދަ ހުރިހާ މުއާމަލާތްތަކެއް ހިމެނޭނެ އެވެ.
ސީއެމްޑީއޭއިން މިގޮތަށް ބަޔާނެއް ނެރެފައިވާއިރު ރައްޔިތުންގެ މަޖިލީހުގެ ފޭދޫ ދާއިރާގެ ކުރީގެ މެމްބަރު އަލްހާން ފަހުމީގެ މަސްލަހަތު އޮތް ކުންފުންޏަކުން ގިނަ ބައެއްގެ އަތުން ފައިސާ ނަގައިގެން އިންވެސްޓްކުރި ސްކީމެއްގެ މައްސަލަ ފުލުހުން ވެސް އަންނަނީ ބަލަމުންނެވެ. އަދި އޭގެ މައްސަލަތަކެއް ސީއެމްޑީއޭއިން ވަނީ ބަލަމުންނެވެ.
އެމައްސަލަތައް ބަލަމުން އަންނަނިކޮށް އަނެއްކާވެސް އެކުންފުނިން ވަނީ އައު ސްކީމެއް ފަށާފައެވެ. އެސްކީމް ނުހުއްޓުވާތީ އެކަމުގެ ކަންބޮޑުވުން އާންމުން އަންނަނީ ފާޅުކުރަމުންނެވެ.
