ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ވެރިކަމަކީ، މިހާތަނަށް ރާއްޖޭގައި ކުރަމުން އައި ވެރިކަމުގެ ތެރެއިން، ޖުމްހޫރީ ޕާޓީގެ ލީޑަރު ގާސިމް އިބްރާހީމަށް އަނިޔާއެއް، ދުއްތުރާ އަދި ގެއްލުމެއް ނުދިން ހަމައެކަނި ވެރިކަން ކަމަށް ރައީސް އޮފީހުގެ މިނިސްޓަރު އަހުމަދު ސަމީރު ވިދާޅުވެއްޖެއެވެ.

ޖުމްހޫރީ ޕާޓީން އަންނަ ސެޕްޓެމްބަރު މަހުގެ ރިޔާސީ އިންތިޚާބުގައި ވަކިން ވާދަކުރަން ނިންމުމާއެކު ސަމީރު ވަނީ އެ ޕާޓީން ވަކިވެވަޑައިގަންނަވާފައެވެ. އަދި ރާއްޖެޓީވީއަށް ދެއްވި އިންޓަރވިއުއެއްގައި ސަމީރު ވިދާޅުވީ، އޭނާ މި ނުކުންނަވަނީ ރައީސް ސާލިހަށް ރިޔާސީ އިންތިޚާބު ކާމިޔާބުކޮށްދިނުމަށް ކުރަންޖެހޭ މަސައްކަތްތައް ކުރެއްވުމަށް ކަމަށާއި، މިކަން ކުރުމަށް ކުރަންޖެހޭ ކޮންމެ ކަމެއް ކުރައްވާނެ ކަމަށެވެ.

ސަމީރު ވިދާޅުވީ ޖުމްހޫރީ ޕާޓީގައި އުޅުއްވާ ގިނަ ބޭފުޅުން ޖުމްހޫރީ ޕާޓީއަށް ފަހި ފުރުސަތުތަކެއް އޮތްކަމަށް ދެކެވަޑައިގެންނެވިޔަސް، ތަކުރާރުކޮށް ވިދާޅުވާނީ އެ މަންޒަރު ފެނިވަޑައިނުގަންނަވާ ކަމަށެވެ. އަދި ރާއްޖޭގައި މިހާރު އޮތް ހަމަޖެހުމާއި، ރާއްޖެއަށް ލިބިފައިހުރި ކުރިއެރުމާއި، އަދި ރައީސުލްޖުމްހޫރިއްޔާގެ ކެތްތެރިކަމާއި، ކޮވިޑްގެ ހާލަތުގައި އެމަނިކުފާނު އަމަލުކުރެއްވި ގޮތަށް މި ޤައުމު މިދާ މިސްރާބަށް ކުރިއަށް ގެންދިއުމަށް ކުރައްވާފައި ހުންނެވި މަސައްކަތްޕުޅުތައް ސަމީރު ފާހަގަކުރެއްވިއެވެ.

ސަމީރު ވިދާޅުވީ މާޒީވެދިޔަ އެތައް ސަރުކާރުތަކެއް ތެރޭގައި، ހާއްސަކޮށް ރައީސް މައުމޫންގެ ވެރިކަމުން ފެށިގެން ރައީސް ނަޝީދާއި ރައީސް ޔާމީންގެ ވެރިކަމާއި ހިސާބަށް އައި އިރު، މި ހުރިހާ ބޭފުޅުން ވެސް ވެރިކަން ކުރައްވާފައި ހުންނެވީ ގާސިމް އިބްރާހީމް ޖަލަށްލައި، އެމަނިކުފާނުގެ މުދާ ނަގައި އެމަނިކުފާނުގެ އާއިލާއަށް ދުއްތުރާކޮށް، އެކިކަންކަން ކޮށްގެން ކަމަށެވެ.

އަދި މިއީ މާފަންނުވިލާ ގާސިމް އިބްރާހީމާއި ޖުމްހޫރީ ޕާޓީގެ ލީޑަރަށް ދުއްތުރާއެއް ނުކޮށް އެމަނިކުފާނުގެ އާއިލާއަށް އަދި ވިޔަފާރިއަށް ގެއްލުމެއް ނުދެއްވާ ރާއްޖޭގެ ރައީސުލްޖުމްހޫރިއްޔާގެ މަގާމުގައި ބޭފުޅަކު 5 އަހަރުގެ ދައުރެއް ފުރިހަމަކުރައްވާ ފުރަތަމަ ފަހަރު ކަމަށެވެ. އެހެންވީމާ މި ހާލަތަށް ބަލާއިރު ޖުމްހޫރީ ޕާޓީ އެހެން ގޮތަކަށް ނުކުމެ ކާމިޔާބީއެއް ލިބިދާނެ މަގެއް ފެނިވަޑައިނުގަންނަވާ ކަމަށް ސަމީރު ވިދާޅުވިއެވެ.

ސަމީރު ވިދާޅުވީ މިކަމުގައި ގަބޫލުކުރަންޖެހޭ ހަގީގަތަކީ އޭނާއަށް ފެނިވަޑައިނުގަންނަވާ ކިތައްމެ ކަމެއް ޕާޓީގެ ބޭފުޅުންނަށް ފެނިވަޑައިގަންނަވާނެކަމަށެވެ. އެހެންކަމުން އެބޭފުޅުން އެ މަގުން އެގޮތަށް ނިންމަވާފައި، ޖުމްހޫރީ ޕާޓީގެ ލީޑަރު ވެސް އެގޮތުގެ މަތިން ގޮތެއް ނިންމެވީ ކަމަށާއި، އަދި އެ ނިންމެވުމަށް އިހްތިރާމްކުރައްވާކަމުގައި ސަމީރު ވިދާޅުވިއެވެ. އަދި އޭނާގެ ޚިޔާލު ހިއްސާކުރެއްވުމަށްފަހުގައި ޕާޓީން ވަކިވެވަޑައިގެންނެވީ ކަމަށް ވެސް ރާއްޖެޓީވީއަށް ދެއްވި އިންޓަވިއުގައި ސަމީރު ވިދާޅުވިއެވެ.