މި ނުކުންނެވީ ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ދެވަނަ ދައުރަކަށް އިންތިޚާބުކުރުމަށް ކުރަންޖެހޭ މަސައްކަތްތައް ކޮށްދެއްވުމަށް ކަމަށް، ރައީސް އޮފީހުގެ މިނިސްޓަރު އަހުމަދު ސަމީރު ވިދާޅުވެއްޖެއެވެ.
ޖުމްހޫރީ ޕާޓީން އަންނަ ސެޕްޓެމްބަރު މަހުގެ ރިޔާސީ އިންތިޚާބުގައި ވަކިން ވާދަކުރަން ނިންމުމާއެކު ސަމީރު ވަނީ އެ ޕާޓީން އިސްތިއުފާދެއްވާފައެވެ. "ރާއްޖެޓީވީ"އަށް ދެއްވި އިންޓަރވިއުއެއްގައި ސަމީރު ވިދާޅުވީ، އޭނާ އެ ނުކުންނެވީ ރައީސް ސާލިހަށް ރިޔާސީ އިންތީޚާބު ކާމިޔާބުކޮށްދިނުމަށް ކުރަންޖެހޭ މަސައްކަތްތައް ކުރެއްވުމަށް ކަމަށާއި، މިކަން ކުރުމަށް ކުރަންޖެހޭ ކޮންމެ ކަމެއް ކުރައްވާނެ ކަމަށެވެ.
ސަމީރު ވިދާޅުވީ މި މަސައްކަތް ކުރުމުގައި ވަކި ޕާޓީއަކަށް ނިސްބަތްވުމަކީ މުހިންމު ކަމެއްގެ ގޮތުގައި ދެކެވަޑައިނުގަންނަވާކަމަށެވެ. އެހެންނަމަވެސް އެއީ މުހިންމު ކަމެއްކަމަށް ރައީސް ސާލިހު ދެކެވަޑައިގަންނަވާ ހާލަތުގައި އެކަންވެސް ކޮށްދެއްވާނެ ކަމަށް ސަމީރު ވިދާޅުވިއެވެ.
ރައިސުލްޖުމްހޫރިއްޔާއާއެކު ކުރެވޭ މަސައްކަތްތަކަކީ ރައްޔިތުންނަށް ވަރަށް ފައިދާހުރި، އަދި ރާއްޖެއަށްވެސް ދުރު މުސްތަގުބަލަށް ބަލާއިރު އެންމެ ރަނގަޅު ގޮތްކަމަށް އަޅުގަނޑު ދެކޭތީ އެމަގަށް މި ދަނީ.ރައީސް އޮފީހުގެ މިނިސްޓަރު އަހުމަދު ސަމީރު
ސަމީރު އިސްތިއުފާ ދެއްވީ ޖޭޕީން ވަކިން ވާދަކުރުމަށް އަންގާރަ ދުވަހު އެ ޕާޓީގެ ކައުންސިލް ބައްދަލުވުމުގައި ނިންމުމާއެކު، އެ ބައްދަލުވުމުގެ ތެރެއިންނެވެ. އެކަމަށްޓަކައި ހުށަހަޅަންޖެހޭ ލިޔެކިޔުންތައް ރަސްމީކޮށް ހުށަހަޅުއްވާނެ ކަމަށް އޭނާ ވިދާޅުވިއެވެ.
