ގޭންގް މާރާމާރީތަކާއި ގުޅިގެން ފުލުހުން ބޮޑު އޮޕަރޭޝަނެއް ހިންގައިފިއެވެ.
ބުރާސްފަތި ދުވަހުގެ ރޭ މި އޮޕަރޭޝަން ކުރިއަށް ގެންގޮސްފައިވާއިރު ފުލުހުން ބުނީ ކުރިއަށް ގެންގޮސްފައިވަނީ ސަރޗް އޮޕަރޭޝަނެއް ކަމަށެވެ.
ބައެއް މީޑިއާތަކަށް ކޮމިޝަނާ އޮފް ޕޮލިސް މުހައްމަދު ހަމީދު ވިދާޅުވެފައިވަނީ ހެންވޭރު ރޯޝަނީ މަގާއި ދީފުރަމް ގޯޅި އަދި މެހެލި ގޯޅި ބަންދުކޮށް މޫނު ނިވާކޮށްގެން ތިބި ގިނަ އަދަދެއްގެ ފުލުހުން ހަރަކާތްތެރިވި, މި އޮޕަރޭޝަނަކީ ފިހާރައެއްގެ ތެރޭ މީހަކު މަރާލި މައްސަލަ އާގުޅޭ އޮޕަރޭޝަނެއް ކަމަށެވެ.
ފިހާރައެއްގެ ތެރޭ މީހަކު މަރާލި މައްސަލަގައި ފެބްރުއަރީ 26 ގައި ވަނީ އެކަކު ހައްޔަރުކޮށްފައެވެ. ފުލުހުން އެދުވަހު މައުލޫމާތު ދިން ގޮތުގައި ހައްޔަރުކުރީ 20 އަހަރުގެ ދިވެހި ފިރިހެނެކެވެ. އަދި އޭނާގެ ބަންދަށް ކްރިމިނަލް ކޯޓުން 15 ދުވަހުގެ މުއްދަތެއް ދީފައިވެއެވެ.
އެ މާރާމާރީގައި ލިބުނު ޒަހަމްތަކަށް އައިޖީއެމްއެޗުގެ އައިސީޔޫގައި ފަރުވާދެމުން ދަނިކޮށް އުމުރުން 30 އަހަރުގެ ދިވެހި ފިރިހެނެއް ވަނީ ފެބްރުއަރީ 27 ވަނަ ދުވަހު މަރުވެފައެވެ.
ގޭންގުތަކުގެ މީހުންގެ ނުފޫޒު ކޯޓުތަކުގައިވެސް އެބައޮތް ކަމަށާއި އެ މީހުން ގާޒީންނަށްވެސް ބިރުދައްކާކަމަށް ކޮމިޝަނަރ އޮފް ޕޮލިސް މުހައްމަދު ހަމީދު ވަނީ މީގެކުރިން ވިދާޅުވެފައެވެ. ސީޕީ ވިދާޅުވީ، ގޭންގުތަކުގެ މީހުން ދޫވުމުގެ ސަބަބަކީ އެ މީހުންގެ ބާރުވެރިކަމާއި ނުފޫޒު ކަމަށެވެ. އަދި ކޯޓު ތެރެއަށްވެސް އެ މީހުން "އަތްބާނާ" ކަމަށާއި ކޯޓުތަކުުގެ ގާޒީންނަށްވެސް ބިރުދައްކާކަމަށް ސީޕީ ވިދާޅުވިއެވެ.
އެހެން ދައުލަތްތަކުގައި ވެސް، ކުށްކުރާ މީހުންނާއި ބިރުވެރިކަން ފަތުރާ މީހުންގެ ހުންނަ އާޑުފާޑު އެއީ ރާއްޖޭގައިވެސް ބީރައްޓެހި ކަންތައްތަކެއް ނޫންކަމަށް ހަމީދު ވިދާޅުވިއެވެ. އެ މީހުންގެ ބާރު ހުރިހާ ދިމަދިމާއަކަށް ވެސް ފޯރުވާ ކަމަށާއި، އެކަމުގެ އަސަރުވެސް އެބަ ފެންނަކަމަށް ވިދާޅުވިއެވެ. އެ ގޮތުން ބޮޑެތި ކުށްތަކަށް އަރައިގަންނަ މީހުންނާމެދު ފިޔަވަޅުއަޅަން ތަންފީޒީ އިދާރާތަކުން މަސައްކަތްތަކެއް ކުރިނަމަވެސް އެ ކަމުގެ ސަބަބުން އެކަމަށް ހުރަސްތަކެއް ހުންނަކަމަށް ސީޕީ ވިދާޅުވިއެވެ.
ސީޕީ އިތުރަށް ވިދާޅުވީ 2010 ވަނަ އަހަރު އެކުލަވައިލާފައިވާ ގޭންގު ކުށްތަކާބެހޭ ގާނޫނަކީ މިހާރު ބޭނުންކުރަން އެކަށީގެންވާ ގާނޫނެއް ނޫންކަމަށެވެ. އެ ގާނޫނަށްވެސް ބަދަލުތަކެއް ގެނެސް ތަންކޮޅެއް، ވަށާޖެހޭ ރަނގަޅު ނިޒާމެއްގެ ތެރެއިން ތަންފީޒުކުރެވޭ ގާނޫނަކަށް ހެދުމަށްވެސް މަސައްކަތް ކުރަމުންދާ ކަމަށް ސީޕީ ވިދާޅުވިއެވެ.
