ތަރައްގީގެ ގިނަ މަޝްރޫއުތަކެއް ސަރުކާރުން ހިރިލަންދޫގައި ހިންގާފައިވޭ - ކައުންސިލް
2 މާރިޗު 2023 | ބުރާސްފަތި 13:09ސަރުކާރުން ހިރިލަންދޫގެ ތަރައްގީއަށް ރާވާފައިވާ މަޝްރޫއުތަކާގުޅޭ މައުލޫމާތު ހިއްސާކުރެއްވި
ރައީސް ހިރިލަންދޫ ކައުންސިލާއި އަންހެނުންގެ ތަރައްގީއަށް މަސައްކަތްކުރާ ކޮމިޓީއާ ބައްދަލުކުރައްވަނީ
ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު، ކޮޅުމަޑުލު ހިރިލަންދޫ ކައުންސިލާއި އަންހެނުންގެ ތަރައްގީއަށް މަސައްކަތްކުރާ ކޮމިޓީއާ ބައްދަލުކުރައްވައިފިއެވެ.
މިބައްދަލުކުރެއްވުން އޮތީ ބުރާސްފަތި ދުވަހުގެ މެންދުރު، ހިރިލަންދޫ ސްކޫލުގައެވެ. މިބައްދަލުވުން ފައްޓަވައިދެއްވަމުން ރައީސުލްޖުމްހޫރިއްޔާ ވަނީ ހިރިލަންދޫއިން އެމަނިކުފާނަށާއި ވަފުދުގައި ހިމެނޭ ބޭފުޅުންނަށް ދެއްވި މެހެމާންދާރީއަށް ޝުކުރު އަދާކުރައްވާފައެވެ. އަދި ހިރިލަންދޫގެ ކައުންސިލާއި އ.ތ.މ ކޮމިޓީގެ ފަރާތުން، ރަށުގެ ތަރައްގީއަށް ބޭނުންވެފައިވާ ކަންކަމާ ގުޅޭގޮތުން ރައީސުލްޖުމްހޫރިއްޔާ މައުލޫމާތު އޮޅުން ފިލުއްވިއެވެ.
މިބައްދަލުވުމުގައި ހިރިލަންދޫ ކައުންސިލުން ވަނީ، މިހާރުވެސް އެރަށުގައި ތަރައްގީގެ ގިނަ މަޝްރޫއުތަކެއް ހިންގަމުންދާކަމަށާއި، އަދި ބައެއް މަޝްރޫއުތައް ނިމިފައިވާކަން ފާހަގަކުރައްވާފައެވެ. ކައުންސިލުން އިތުރަށް ފާހަގަކުރެއްވި ކަންކަމުގެ ތެރޭގައި; ދަތުރުފަތުރުގެ ދަތިކަމާއި، ބަނދަރުގެ ދަތިކަމާއި، ރަށްގިރުމުގެ މައްސަލައާއި، މަސްކިރުވުމުގައި ދިމާވާ ދަތިތަކާއި، ރަށާ ކައިރީގައި ރިސޯޓެއް ނެތުމުންް ޒުވާނުންނަަށް ވަޒީފާގެ ފުރުސަތުތައް ލިބުމުގައި ހުރި ދަތިތައް ހިމެނެއެވެ. މީގެ އިތުރުން މިބައްދަލުވުމުގައި އ.ތ.މ ކޮމިޓީން ވަނީ، ރަށުގެ ސިއްހީ ޚިދުމަތް އިތުރަށް ރަނގަޅު ކުރުމަށް ބޭނުންވާކަން ފާހަގަކުރައްވާފައެވެ.
ރައީސުލްޖުމްހޫރިއްޔާ ހިރިލަންދޫ ކައުންސިލާއި އ.ތ.މ ކޮމިޓީއާއެކު ބޭއްވި މިބައްދަލު ކުރެއްވުމުގައި، ސަރުކާރުން ހިރިލަންދޫގެ ތަރައްގީއަށް ރާވާފައިވާ މަޝްރޫއުތަކާ ގުޅޭ މައުލޫމާތު ހިއްސާކުރެއްވިއެވެ. އަދި ކައުންސިލުންނާއި އ.ތ.މ ކޮމިޓީން ފާހަގަކުރެއްވި ކަންކަމުގައި ސަރުކާރުގެ ކަމާގުޅުންހުރި އިދާރާތަކާ ގުޅިގެން ހައްލެއް ހޯއްދަވައިދެއްވުމަށް މަސައްކަތްކޮށްދެއްވާނެ ކަމުގައި ވިދާޅުވިއެވެ.
ރައީސުލްޖުމްހޫރިއްޔާ ހިރިލަންދޫއަށް ކުރެއްވި މި ދަތުރުފުޅުގައި، ހިރިލަންދޫ ކައުންސިލާއި، އ.ތ.މ ކޮމިޓީއާއެކު ބޭއްވެވި ބައްދަލު ކުރެއްވުމަށްފަހު ވަނީ ހިރިލަންދޫ ވޮލީ ކޯޓު ހުޅުއްވައި ދެއްވައި، މޯލްޑިވްސް ވޮލީބޯލް ވެޓެރެންސްޓީމާ ހިރިލަންދޫ ވޮލީޓީމާ ދެމެދު ކުޅެވުނު ވޮލީ މެޗުގައި ބައިވެރިވެވަޑައިގެންފައެވެ.
