ހިރިލަންދުއަކީ ޗާޓުން ގެއްލިފައި އޮތް ރަށެކޭ ބުނާ ބުނުމަށް ބަދަލު އަތުވެއްޖެކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވިދާޅުވެއްޖެއެެވެ.

އެމަނިކުފާނު މިހެން ވިދާޅުވީ ހިރިލަންދޫ ސްކޫލުގެ 71 ވަނަ އަހަރީ ދުވަހުގެ ޖަލްސާގައި ވާހަކަފުޅުދައްކަވަމުންނެވެ.

ރައީސް ވިދާޅުވީ ހިރިލަންދޫ ރައްޔިތުންގެ މުހާވަރާއަކަށް މިހާރު ވެފައި އޮތް އެއް ކަމެއް އޮންނަ ކަމަށެވެ. އެއީ، ހިރިލަންދުއަކީ ޗާޓުން ގެއްލިފައި އޮތް ރަށެކޭ ބުނާ ބުނުން ކަމަށެވެ. ނަމަވެސް މިހާރު އެކަމަށް ބަދަލު އަތުވެއްޖެ ކަމަށާއި، އޭރު ވެފައި އޮތް ގޮތަކީ ޗާޓުގައި އޮތަސް، ވަކި ބައެއްގެ ދުރުމިއަށް މި ރަށް ނާރައި މިހައި ދުވަހު އޮތުން ކަމަށެވެ.

ރައީސް ވިދާޅުވީ ހިރިލަންދޫ ރައްޔިތުންގެ ބޯހިޔާވަހިކަން ކަށަވަރުކޮށްދިނުމަށް، މި ރަށުގެ ބިން ހިއްކުމުގެ މަސައްކަތް ފެށިގެން މިހާރު ކުރިއަށްދާ ކަމަށެވެ. މި އަހަރުގެ މެދުތެރޭގައި އެ މަސައްކަތް އެމް.ޓީ.ސީ.ސީން ކޮށް ނިންމާނެކަމަށް އުންމީދުކުރައްވާ ކަމަށާއި، އޭރުން ރަށުގެ މަސްވެރިކަމަށްވެސް، އަދި ފައިބަރު މަސައްކަތާއި، އެހެން ސިނާއީ ކަންކަމަށް ވެސް އިތުރު މަގުތައް ތަނަވަސްވެގެން ދާނެ ކަމަށެވެ.

ރައީސް ވިދާޅުވީ ރާއްޖޭގެ ގިނަ ރަށްރަށެކޭ އެއްގޮތަށް، ހިރިލަންދޫގެ ރައްޔިތުން ވެސް ދިރިއުޅެމުން އައީ ރައްކާތެރި ސާފު ބޯފެން ލިބޭނެ ރަނގަޅު އިންތިޒާމެއް، އަދި ނަރުދަމާ ނިޒާމެއް ނެތި ކަމަށެވެ. އެ ޚިދުމަތް ގާއިމުކުރުމުގެ މަސައްކަތް ފެށިގެން މިހާރު ކުރިއަށްދާ ކަމަށާއި، އިރާދަކުރެއްވިއްޔާ އެކަމުގެ ލުއިފަސޭހަވެސް މި އަހަރުގެ ތެރޭގައި ރައްޔިތުންނަށް ލިބިގެންދާނެ ކަމަށެވެ.

ރައީސް ވިދާޅުވީ ހިރިލަންދޫ މިހާރު މާ ރަނގަޅަށް ވެސް ޗާޓަށް އަރައިފި ކަމަށެވެ. އެމަނިކުފާނު ގެންގުޅުއްވާ ޗާޓުން އެންމެ ރަށެއް އަދި އެންމެ ފަރުދެއްވެސް ބޭރުނުވާނެކަމުގެ ޔަގީންކަން، ރާއްޖޭގެ ހުރިހާ ލޮބުވެތި ރައްޔިތުންނަށް ދެއްވާކަމަށެވެ.

މި ރާއްޖެ، ޖަޒީރާގެ ހާރަކަށް މިވަނީ، މި ހުރިހާ ރަށްތަކެއް ގުޅި ލާމެހިގެން ކަމަށާއި، މި ރަށްތަކުގެ ރައްޔިތުން އެއް ބަޔަކު އަނެއް ބަޔަކާވެސް ގުޅި ލާމެހިގެން ކަމަށް ރައީސް ވިދާޅުވިއެވެ.