މާރާމާރީތަކާއި ގުޅިގެން ހައްޔަރުކުރި 8 މީހަކު ކޯޓުން ދޫކޮށްލައިފި

ސިލްސިލާ މާރާމާރީތަކާއި ގުޅިގެން ހައްޔަރުކުރި 8 މީހަކު ކޯޓުން ދޫކޮށްލައިފިއެވެ.

ފުލުހުން ބުނީ ތޫނު ހަތިޔާރާއި ނުރައްކާތެރި ހަތިޔާރު ބޭނުންކޮށްގެން، ސިލްސިލާކޮށް މާލެ ތެރޭގައި ހިންގަމުންދާ މާރާމާރީތަކާއި ގުޅިގެން މި މަހުގެ 10 ވަނަ ދުވަހު 8 މީހަކު ހައްޔަރުކޮށްފައިވާ ކަމަށެވެ.

އެމީހުންގެ ބަންދަށް ކްރިމިނަލް ކޯޓުން ދިން 15 ދުވަހުގެ ބަންދުގެ މުއްދަތު ހަމަވުމުން، ދެވަނަ ފަހަރަށް އެމީހުންގެ ބަންދާ މެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން ކޯޓުން އެމީހުން ދޫކޮށްލާފައިވާ ކަމަށް ފުލުހުން ބުނެއެވެ.

ކްރިމިނަލް ކޯޓުން މި 8 މީހުން ދޫކޮށްލާފައިވަނީ ހޮނިހިރު ދުވަހުއެވެ. ސަބަބެއްގެ ގޮތުގައި ބުނެފައިވަނީ، ކޮންމެވެސް މިންވަރެއްގެ ހެކި ހުރެގެން 15 ދުވަހުގެ މުއްދަތަށް މި މީހުން ބަންދުކޮށްފައިވާއިރު، އެ މުއްދަތު ފާއިތުވި އިރު ތުހުމަތުކުރެވޭ ކުށާ ގުޅޭ އެއްވެސް ހެއްކެއް ހުށަހެޅިފައި ނުވާ ކަމަށެވެ. ހަމައެކަނި ހުށަހެޅިފައި ހުރީ ފުލުހުންގެ އިންޓެލިޖެންސަށް ލިބުނު މައުލޫމާތުގެ މައްޗަށް އެކުލަވާލާފައިވާ އިންޓެލިޖެންސް ރިޕޯޓްތައް ކަމަށެވެ.

އަދި އެމީހުން ހުރި އެޕާޓްމަންޓުގެ ތެރެއިން ކަތިވަޅިއާއި ވަޅި ފެނިފައިވީނަމަވެސް، އެޕާޓްމަންޓެއްގެ ތެރެއިން އެފަދަ ތަކެތި ފެނުމަކީ އިތުރު ހެއްކަކާ ނުލައި އެތަކެއްޗަކީ މާރާމާތީ ހިންގަން ގެންގުޅޭ ތަކެތި ކަމަށް ބެލެވިދާނެ ތަކެއްޗެއް ނޫން ކަމަށެވެ. އަދި އަނިޔާލިބިފައިވާ ފަރާތްތަކެއްގެ ފޮޓޯ ހުށަހެޅިފައިވީނަމަވެސް، އެ ފަރާތްތަކަށް އަނިޔާދިނުމުގައި އެމީހުން ބައިވެރިވެފައިވާ ކަމަށް ބެލިދާނެ އެއްވެސް ހެއްކެއް ހުށަހެޅިފައި ނުވާކަމަށް ކްރިމިނަލް ކޯޓުން ވަނީ ބުނެފައެވެ.