މާފަންނު ފިހާރައެއްގެ ތެރޭގައި ތޫނު އެއްޗަކުން މީހަކަށް ޙަމަލާދިން އެކަކު ހައްޔަރުކޮށްފި

މާލެސިޓީގެ މާފަންނުގައި ހުރި ފިހާރައަކަށް ވަދެ ތޫނު އެއްޗަކުން މީހަކަށް ހަމަލާދިން މައްސަލައިގައި މީހަކު ހައްޔަރުކޮށްފިއެވެ.

އެކަން ހާމަ ކުރައްވާފައިވަނީ ކޮމިޝަނަރ އޮފް ޕޮލިސް މުޙައްމަދު ހަމީދު ކުރެއްވި ޓްވީޓެއްގައެވެ.

ސީޕީ ވިދާޅުވީ، ފެބުރުވަރީ 24 ވަނަ ދުވަހުގެރޭ، މާފަންނު ފިހާރައެއްގެ ތެރޭގައި ތޫނު ހަތިޔާރު ބޭނުންކޮށްގެން މީހަކަށް ހަމަލާދިނުމުގައި އަމަލީ ގޮތުން ބައިވެރިވި އެކަކު ހައްޔަރު ކޮށްފައިވާ ކަމަށެވެ.

އޭނާ ހައްޔަރުކޮށްފައިވަނީ ފުލުހުންގެ ތަހުގީގަށް ހޯދުނު ހޯދުމުގެ މައްޗަށް، ކޯޓު އަމުރެެއްގެ ދަށުންނެވެ.

އަދި އޭނާ ހައްޔަރު ކޮށްފައިވަނީ ހޮނިހިރު ދުވަހުގެ ރޭގައި ކަމަށް ސީޕީ ވިދާޅުވިއެވެ.

ހުކުރު ދުވަހުގެ ރޭ 09:20 ހާއިރު މާފަންނުގައި ހުންނަ ފިހާރައެއްގެ ތެރެއަށް ވަދެ, ވަޅި ޖަހައި ޒަހަމްކޮށްލާފައިވަނީ 30 އަހަރުގެ ޒުވާނެއްކަމަށް ފުލުހުން ބުނެއެވެ.  އެ ފިހާރަ ތެރޭގައި އޭނާ ހުއްޓައި ދެ މީހަކު އައިސް އޭނާއަށް ވަޅިން ހަމަލާދިނެވެ.

އެ މީހާ އައިޖީއެމްއެޗަށް ގެންގޮސްފައިވާއިރު، އޭނާ އޮތީ ވެންޓިލޭޓަރުގައިކަމަށް މައުލޫމާތު ލިބެއެވެ. އަދި އޭނާއަށް ސީރިއަސް ޒަޚަަމްތަކެއް ވަނީ ލިބިފައެވެ.

މި ޙާދިސާއާ ގުޅޭ ވީޑިއޯއިން ފެންނަ ގޮތުގައި އޭނާ ފިހާރަ ތެރޭގައި ވެއްޓިފައި އޮންނައިރު، އެތަނުގައި ގިނަ އަދަދެއްގެ ލޭ ހުއްޓެވެ. އަދި އޭނާގެ ހަށިގަނޑުގެ ގިނަ ތަންތަނަށް ވަޅި ހަރާފައިވެއެވެ.