އެމްޑީއޭއިން ކޯލިޝަން ހަދަން ނިންމި ނިންމުމަށް ރައީސްގެ ޝުކުރު
ރައީސް ވަނީ އެމްޑީއޭގެ ނިންމުމަށް މަރުހަބާ ވިދާޅުވެފައި
ޝިޔާމާއި ރައީސް ސާލިހް
ކުރިއަށް އޮތް ރިޔާސީ އިންތިޚާބުގައި މޯލްޑިވިއަން ޑިވެލޮޕްމެންޓް އެލަޔަންސް (އެމްޑީއޭ)އިން އެމްޑީޕީއާއެކު ކޯލިޝަން ހެދުމަށް ނިންމި ނިންމުމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު މަރުހަބާ ދަންނަވައިފިއެވެ.
އެމްޑީއޭގެ ނިންމުމަށް މަރުހަބާ ވިދާޅުވެ ކުރެއްވި ޓްވީޓުގައި ރައީސް ވަނީ އެމްޑީއޭގެ މި ނިންމުމަށް ޝުކުރު އަދާކުރައްވާފައެވެ.
މަސައްކަތްކުރައްވާނީ ރާއްޖޭގެ ހަމަޖެހުމާއި، ތަރައްގީއާއި ކުރިއެރުމަށް ކަމަށް ރައީސް ވިދާޅުވިއެވެ. އަދި ފެއްޓެވި ދަތުރުފުޅު މަޑުނުޖައްސަވައި ކުރިއަށްގެންދެވުމަށް ކަމަށް ރައީސް ވިދާޅުވިއެވެ.
އެމްޑީއޭއިން އެމްޑީޕީއާއެކު ކޯލިޝަން ހަދަން ނިންމާފައިވާކަން އިއުލާނުކޮށް އެ ޕާޓީން ކުރި ޓުވީޓެއްގައި ވަނީ، ދިވެހި ރައްޔިތުންގެ ލާބަޔާއި މަންފާއަށްޓަކަޔާއި ދިވެހި ރާއްޖޭގައި ސިޔާސީ ހަމަޖެހުން ގާއިމުކުރުމަށްޓަކައި، ރައީސުލްޖުމްހޫރިއްޔާ އިބްރާހިމް މުހައްމަދު ސާލިހަށް އިތުރު ދައުރެއް ދިނުމަށް މަސައްކަތް ކޮށްދިނުމަށް އެމްޑީޕީއާއެކު ކޯލިޝަން ހެދުމަށް، އެމްޑީއޭގެ ކައުންސިލް ބައްދަލުވުމުން ނިންމާފައިވާކަމަށެވެ.
އެމްޑީއޭއިން މިހެން ބުނެފައިވާއިރު ކުރިޔަށް އޮތް ރިޔާސީ އިންތިޚާބުގައި އެމްޑީޕީގެ ކެންޑިޑޭޓަށް ތާއީދު ކުރުމަށް ނިންމައި އެ ޕާޓީއާއެކު ކޯލިޝަން ހެދުމަށް އަދާލަތު ޕާޓީންވެސް ވަނީ ނިންމާފައެވެ.
