އައިލެންޑް އޭވިއޭޝަންގެ މުވައްޒަފުންގެ މުސާރަ މާރިޗް މަހުން ފެށިގެން ބޮޑުވާނެ
ކޮވިޑާއެކު މޯލްޑިވިއަންގެ މުވައްޒަފުންނަށް ކަނޑާލި އިނާޔަތްތައް ވެސް ދޭން ވަނީ ނިންމައިފައި
އައިލެންޑް އޭވިއޭޝަންގެ އެމްޑީ މުހައްމަދު މިހާދު --
މި އަހަރުގެ މާރިޗު މަހުގެ އެއްވަނަ ދުވަހުން ފަށައިގެން އައިލެންޑް އޭވިއޭޝަންގެ މުވައްޒަފުންގެ މުސާރައަށް ހެޔޮ ބަދަލުތަކެއް އަންނާނެކަމަށް އެ ކުންފުނީގެ މެނޭޖިން ޑިރެކްޓަރު މުހައްމަދު މިހާރު ވިދާޅުވެއްޖެއެވެ.
ހޮނިހިރު ދުވަހުގެ ރޭ އައިލެންޑް އެވިއޭޝަންގެ ސްޓާފް ނައިޓްގައި ވާހަކަ ދައްކަވަމުން މިހާދު ވިދާޅުވީ މާރިޗު މަހުގެ އެއްވަނަ ދުވަހުން ފެށިގެން އެ ކުންފުނީގެ މުސާރައަށް ހެޔޮބަދަލުތަކެއް އަންނާނެ ކަމަށެވެ. އަދި އަސާސީ މުސާރައަށް ރަނގަޅު ބަދަލެއް އައިސް ޕެންޝަނަށް ރައްކާ ކުރެވޭ ފައިސާ އިތުރުވެގެން ދާނެ ކަމަށް އޭނާ ވިދާޅުވިއެވެ.
މީގެ އިތުރުން، ކޮވިޑްގެ ބަލިމަޑުކަމާއެކު މެދުކަނޑާލި ބަޑީ ޓިކެޓް ވެސް މާރިޗު މަހުގެ އެއްވަނަ ދުވަހުން ފަށައިގެން ދޭން ނިންމައިފައިވާ ކަމަށާއި ޓިކެޓަށް މުވައްޒަފުން ދައްކަން ޖެހޭ ފިއުލް ޗާޖް ވެސް އެ ދުވަހުން ފަށައިގެން ކަނޑައިލައިފައިވާ ކަމަށް މިހާދު ވިދާޅުވިއެވެ. އަދި އެ ކުންފުނީގެ މުވައްޒަފުންނަށް ހަމަޖެހިފައިވާ އުސޫލެއްގެ ތެރެއިން އިންޓްރެސްޓަކާ ނުލައި ލޯން ސްކީމެއް ތައާރަފްވެގެން ދާ ކަމަށާއި އެ ސްކީމުގެ ދަށުން 25،000 ރުފިޔާ އާއި 50،000 ރުފިޔާއާ ދެމެދުގެ ލޯނު ހަމަޖެހިގެންދާނެ ކަމަށް ވެސް މިހާދު ވިދާޅުވިއެވެ.
އައިލެންޑް އޭވިއޭޝަންގެ ސްޓާފް ނައިޓްގައި އެކުންފުންޏަށް ދިގު މުއްދަތަކަށް ހިދުމަތް ކުރި ފަރާތްތަކުގެ އަގު ވަޒަންކޮށް އެފަރާތްތަކަށް ވަނީ އެވޯޑު ދީފައެވެ.
