ކ. މާލެ
|
15 ފެބްރުއަރީ 2023 | ބުދަ 15:53
ޣައްޒާއިންފެނުނު ރޫމީންގެ ޒަމާނުގެ ތިމަރަ ސަންދޯއް
ރޫމީންގެ ޒަމާނުގެ ތިމަރަ ސަންދޯއް
ރޫމީންގެ ޒަމާނުގެ ތިމަރަ ސަންދޯކެއް ޣައްޒާއިން ފެނިއްޖެ
 
ރޫމީންގެ ދުވަސްވަރުގެ މަތީ ފަންތީގެ މީހަކަށް ނިސްބަތްވާ ސަންދޯކުގެ މަތިގަނޑު އަދި ހުޅުވާފައެއް ނުވޭ
 
ބެލެވޭ ގޮތުގައި އެ ސަންދޯކުގައި އޮތީ އެ ޒަމާނުގެ ޤަދަރުވެރިއެއް

ޔަހޫދީ އިޒްރޭލުން އަތްގަދަ ކުރަމުންދާ ފަލަސްޠީނުގެ ޣައްޒާގައި ހުރި ޤާދީމީ އަދި ތާރީޚީ ތަރިކައާ ގުޅުންހުރި ވާހަކަތަކަކީ މާ އާންމުކޮށް ދައްކާތީ އަޑު އިވޭ ވާހަކަތަކެއް ނޫނެވެ. ނަމަވެސް، މި ފަހަރު މިއީ އެކަހަލަ ވާހަކައެކެވެ. މި ފަހަރު ޣައްޒާއިން ފެނިގެން މި އުޅެނީ ރޫމީންގެ ޒަމާނުގެ، މާ ސިންގާ، ސަންދޯކެކެވެ. ބެލެވޭ ގޮތުގައި އެ ސަންދޯކުގައި އޮތީ އެ ޒަމާނުގެ ޤަދަރުވެރިއެކެވެ.

މި ސަންދޯއް ފެނިފައި ވަނީ، މިދިޔަ އަހަރު ޣައްޒާއިން ފެނުނު ޤަދީމީ ޤަބުރުސްތާނެއްގެ ތެރެއިންނެވެ. 2000 އަހަރު ވެފައި ވާ އެ ޤަބުރުސްތާނަކީ ރޫމީން ބޭނުން ކުރި ޤަބުރުސްތާނެކެވެ. ޤަބުރުސްތާނު ފެނުނީ މިޞްރުގެ އެހީގައި ހައުސިންގް ޕްރޮޖެކްޓެއް ހިންގަން އުޅުމުގެ ތެރޭގައި، އެކަމުގައި ޝާމިލުވެ އުޅުނު މަސައްކަތްތެރިންނަށެވެ.

ފަރަންސޭސި ތަޖުރިބާކާރުންގެ ޓީމަކުން ބަލަހައްޓަމުންދާ އެ ސައިޓުން މިހާތަނަށް ފެނިފައިވާ ވަކިވަކި ސަންދޯކާއި އެއް ވަޅުގަނޑެއްގައި ބައިވަރު ހަށިތައް ވަޅުލާފައިވާ ކަށްވަޅުތަކުގެ ޢަދަދު 90 އަށް އަރައެވެ.

ޣައްޒާގެ ތަރިކައާ ބެހޭ ވުޒާރާއިން އާންމު ކުރި ބަޔާނެއްގައި ބުނެފައި ވަނީ، ސަންދޯއް ހަދާފައި ވަނީ ތިމަރައިން ކަމަށް ޤަބޫލު ކުރެވޭ ކަމަށެވެ. ރޫމީންގެ ދުވަސްވަރުގެ މަތީ ފަންތީގެ މީހަކަށް ނިސްބަތްވާ ސަންދޯކުގެ މަތިގަނޑު އަދި ހުޅުވާފައެއް ނުވެއެވެ. އެ ސަންދޯއް މިހާރު ލާފައި ވަނީ ލަކުޑި ފޮއްޓެއްގެ ތެރެއަށް ކަމަށް މަޢުލޫމާތު ލިބެއެވެ. އެއީ އެ ސަންދޯކަށް އިތުރު ރައްކާތެރިކަން ދިނުމުގެ ގޮތުން ކަމަށް މަޢުލޫމާތު ލިބެއެވެ. ސަންދޯކާ ބެހޭ އިތުރު ހޯދުންތައް ހޯދަމުންދާނީ ފަލަސްޠީނުގެ އިތުރުން ބައިނަލްއަޤުވާމީ ތަޖުރިބާކާރުންގެ ޓީމުތަކުންނެވެ.

ސަންދޯއް ހަލާކުވިޔަ ނުދީ ދެމި ހުންނާނެ ގޮތް ހަދަންވެގެން، ވުޒާރާއިން މިހާރު ވަނީ އެ ސަރަޙައްދު ބަންދުކޮށް، ޤަދީމީ ތަރިކަ ރައްކާ ކުރާ ޔުނިޓަށް ސަންދޯއް ބަދަލު ކޮށްފަ ވާނީ. މިކޮޅަށް އަންނަ ފަރަންސޭސި ތަޖުރިބާކާރުންގެ ޓީމު އައިމަ، ސަންދޯކާ ބެހޭ ކަންކަން ދެނެގަނެވޭނެ އޭރުން.
ޠާރިޤު އަލް-ޢާފް؛ ޣައްޒާގެ ތަރިކައާ ބެހޭ ވުޒާރާގެ ތަރުޖަމާނު

ޣައްޒާގެ ތަރިކައާ ބެހޭ ވުޒާރާގެ ތަރުޖަމާނު، ޠާރިޤު އަލް-ޢާފް ވިދާޅުވީ، ސަންދޯކުގެ މަތިގަނޑު ނުނަގާ މަޑު ކުރަމުން ދަނީ، މައުދަނާ ބެހޭ ބައިނަލްއަޤުވާމީ ތަޖުރިބާކާރުންގެ ޓީމެއް ޣައްޒާއަށް ދަތުރު ކުރަންދެނެވެ. އަލް-ޢާފް ވިދާޅުވީ، އެ ސަރަޙައްދުން ފެނުނު މަށީގެ ޖާޑިއާއި އެނޫންވެސް އެފަދަ ތަކެއްޗަށް ބަލާއިރު، އެއީ މީގެ 2000 އެއްހާ އަހަރު ކުރީގެ ތަކެތި ކަމަށް ބެލެވޭ ކަމަށެވެ.

ޣައްޒާގެ އުތުރުގައި އޮތް ޤަބުރުސްތާނަކީ ގްރީކްއާއި ރޫމީންގެ ޒަމާނުގައި ބޭނުން ކުރި ބަނދަރު ސަރަޙައްދު ކަމަށްވެވެ. ޣައްޒާއަކީ އާޘާރީ ތަރިކައިގެ މުއްސަނދިކަން ލިބިފައިވާ ސިޓީއެކެވެ. އެކި ޙަޟާރާތްތަކާ ގުޅިފައިވާ ވިޔަފާރީގެ މައިދާނެކެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: ފާޠިމަތު ޒުހައިރާ
8%
38%
8%
31%
8%
8%
ކޮމެންޓް