ދިހަވަރަކަށް އަހަރު ފަހުން ތަފާތު ތަޖުރިބާތަކަކާއި އިހުސާސްތަކެއް ދިވެހީންނަށް މި ލިބެނީ އެހެން ލެވެލްއެއްގައި: ފައިސަލް
11 ފެބުރުއަރީ 2023 | ހޮނިހިރު 05:37ފައިސަލް ވިދާޅުވީ ދިވެހީންނަށް ޕިކްނިކް އައިލެންޑެއް 10 އަހަރު ފަހުން މި ލިބެނީ އެހެން ލެވެލްއެއްގައި ކަމަށް
ކުޑަގިރި ޕިކްނިކް އައިލެންޑް ހުޅުވުން
ދިހަވަރަކަށް އަހަރު ފަހުން ޕިކްނިކް އައިލެންޑަކާއެކު ދިވެހީންނަށް ތަފާތު އިހުސާސްތަކަކާއި ތަޖުރިބާތަކެއް މި ލިބެނީ އެހެން ލެވެލްއެއްގައި ކަމަށް ނައިބު ރައީސް ފައިސަލް ނަސީމް މިއަދު ވިދާޅުވެއްޖެއެވެ.
ކުޑަގިރި ޕިކްނިކް އައިލެންޑް ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުން ނައިބު ރައީސް ވިދާޅުވީ މިދިޔަ އަހަރުގެ ޖުލައި މަހު މާލެ ކައިރިން ފަޅެއް އޮތްތޯ ބެލުމަށްފަހު ޕިކްނިކް އައިލެންޑެއް ދިވެހީންނަށް އެންމެ ކަމުދާ ގޮތަށް ޑިޒައިންކޮށް އެ މަސައްކަތައިގެން ކުރިއަށް ދިއުމަށް rރައީސް އެދިވަޑައިގެންނެވި ކަމަށެވެ.
ފައިސަލް ވިދާޅުވީ ރައީސް އެ މަސައްކަތް ހަވާލުކުރެއްވުމުން ފުރަތަމަ ހައުސިން މިނިސްޓަރު މުހައްމަދު އަސްލަމްއަށް ގުޅުއްވައި ފަޅެއް ހޯދުމުގެ މަސައްކަތް ފެއްޓެވިކަމަށެވެ. ފިނޭންސް މިނިސްޓަރު އިބްރާހިމް އަމީރާއި އޭރުގެ އެޗްޑީސީގެ އެމްޑީ ސުހައިލް އަހްމަދާއި އެމްޓީސީސީގެ މެނޭޖިން ޑިރެކްޓަރު އާދަމް އާޒިމް އާއި އޭރު ސްޓެލްކޯގެ އެމްޑީ ހަސަން މުޣުނީ އާއި އެމްޑަބްލިއުއެސްސީގެ އެމްޑީ ހަަސަން ޝާހާއި ފެނަކައިގެ އެމްޑީ އަހްމަދު ސައީދާއެކު ހަމަ އެ ދުވަހު އެ މަސައްކަތް ފެށުނު ކަމަށް އެމަނިކުފާނު ވިދާޅުވި އެވެ.
"އަޅުގަނޑުމެން ބޮޑުވީ ގޮނޑުދޮށްތަކުގައި، އަޅުގަނޑުމެން ބޮޑުވެގެން އައީ މަގޫގަސްތަކުގެ ދަށުގައި، ރުއްތަކުގެ ދަށުގައި، ނޫ ވިލުތަކުގައި، ކޮންމެ ދުވަހަކީ ވެސް އަޅުގަނޑުމެންގެ ހަޔާތުގައި މެދުއުމުރަށް އައިސްފައި ތިބިއިރު ގޮނޑުދޮޑަކަށް ވައިރޯޅިއެއްގެ އިހުސާސްކޮށްލުމަށް ޓަކައި ނުދެވޭ އެންމެ ދުވަހެއް ވެސް ނެތް، އެއީ ދިވެހީން،" ފައިސަލް ވިދާޅުވި އެވެ.
ފައިސަލް ވިދާޅުވީ ދިވެހީންނަކީ ޖަޒީރާވަންތަ ބައެއް ކަމަށާއި ދިވެހީންނަށް މޫދާއި ނުލައި، މަގޫގަސްތަކާއި ނުލައި އަދި ޗާލޫ ރުއްތަކާ، ދޮންވެލިގަނޑާ ނުލައި ދިވެހީންނަށް ނުވާނެ ކަމަށެވެ. އެހެންކަމުން ރައީސްގެ ވައުދުފުޅަަކަށްވީ ކުރީ ސަރުކާރެއްގައި ރައްޔިތުންގެ އަތުން ނަގައިފައިވާ ކުޑަބަނޑޮހުގެ ބަދަލުގައި ޒަމާނީ ގޮތަކަށް އެއަށްވުރެ ބޮޑުކޮށް ޕިކްނިކް އައިލެންޑެއް ތަރައްގީ ކުރަން ކަމަށެވެ.
ކުޑަގިރި ޑިޒައިން ކުރި އިރުގައި އެންމެ ބޮޑަށް ބެލީ ސަރުކާރުގެ ސިޔާސަތާ އެއްގޮތަށް އެއްވެސް މީހަކު ބާކީ ނުކޮށް، މި ހިދުމަތް ދެވޭނެ ގޮތަކަށް ޑިޒައިން ކުރަން ކަމަށެވެ. ރާއްޖޭގައި ދިިރިއުޅޭ ކޮންމެ ރައްޔިތަކީ ރައީސް ޞާލިހު ދެކިވަޑައިގަންނަވާ ގޮތުގައި އެންމެ މުހިންމު މީހާ ކަމަށާއި ދިވެހީންގެ ތެރެއިން މީހެއްގެ ހާލަތު ހުންނަ ގޮތަކުން އެ މީހަކަށް އެއްވެސް މީހަކަށް ހިދުމަތް ނުލިބި ނުދާނެ ކަމަށް ވިދާޅުވި އެވެ.
"ޔަގީންކަން އަރުވަން ބޭނުންވަނީ މި ރަށް ޑިޒައިން ކުރެވިފައި މިވަނީ އިރާދަކުރެއްވިއްޔާ ޒަމާނީ ޕިކްނިކް އައިލެންޑެއްގެ ގޮތުގައި އާއިލާތަކަށް ހިތްހަމަޖެހިގެން ރައްޓެހިންނާއެކު ވަގުތު ހޭދަކުރެވޭ ގޮތަށް،" ފައިސަލް ވިދާޅުވި އެވެ.
